ШВБЗАЗАРА МЫГIВХЪЫЗГУШ «АКЪАПГIАН» ТШАШВМЫРКIЫН

Апхьартаква рынхагIвчвагьи ажвлара адкIыларквагьи збальыгъ йнамдзас асабиква гватра рзалырхитI. Ауат йшшIаркIву йгIашIарышвта йтамаму мгIва йыквыжьра магIын ду амапI. ЧкIвыныргIа анаркомания, аркъажвра, атутынчвара, СПИД ашIашIкIгIара йырчвыхчара ахъазла хIреспублика ауацIала уыс щарда акIвдыршитI. Арат амшква Черкесск йхпахауа апхьарта апны анаркомания гIашIакIра йазынархата айззара акIвшатI. Ауи йалан «Реабилитационный центр «Общество без наркотиков» агенеральна директор СТРАХ Виктор Алексей йпа, СПИД абакIрала ареспублика Квта апсихолог КОЛЕСНИКОВА Елена Вячеслав йпхIа, ареспублика наркология диспансер агIащтийыгIв ДМИТРИЕВА Инна Николай йпхIа, ареабилитация Квта аунашвачпагIв САЛПАГАРОВ Динислам Алексей йпа йгьи а-Квта анхагIвы БОТАШЕВ Рашид Идрис йпа, апхьарта аунашвачпагIв ВАСЮК Анастасия Дмитрий йпхIа. Айззара ъакIвшуз азал абльынква апхьагIвчва йдрыхIазырыз йызгIваду абзазаща, анаркотикква тшхънадымрыхра шатахъу йаквгIазшIызтуа аплакатква кIыдын. «Новая жизнь без наркотиков» хъата йызмаз анйара «Реабилитационный центр «Общество без наркотиков» анхагIвчва йдрыхIазырыз проектпI. Ауи асоциальна магIны гIалыркIгIауата ареспублика грант цхърагIара гIатнагатI. Анаркотикква агIвычIвгIвыс йызгIвадара лдзгIарата йадрадзауа, ауи зны уапшрыквын уадыргIвана йшузыкIамрышвхуа, рыцхIагIара щарда шащтагIайуа апхьагIвчва йрархIвырныс йапшым аъачIвагIагIвчва гIадгылтI. Страх Виктор йшихIвазла, анаркотикква йрыланадырхIвара ахъазла ауи атйыгIвчва чкIвыныргIа зларжьуш йапшым амальква гIадрысабапитI. – ДакъикъакI ауацIа уъанквынхата анаркотик уапшырныс зны йгIауахвырквын, убзазара гIвбата йагIвшахитI. УахьчIвала йдрыхIазыруа асинтетика наркотикква зны ахIа урымпшуата урыланахIвитI, йуыдуымгалкIва йамуата уырчпитI. АгIвычIвгIвыс гIван–хын ахIа ауи йыдйымгалызтынгьи сквшбжакI айхIата хIреабилитация Квта апны дщтIапI. Ауи ймахъащахъаква ракIвымкIвагьи йхъвыцщагьи ацанакIитI, – йрыбагъьатI ауи. Салпагаров Динислам йшихIвазла, аркъажвра ззыкIамрышвхуата цхърагIара йазыбжу абзазагIвчва щардахитI. – СквшигIадза акъыль ацазкIуа апкъыгIваква рквпшыраква щардахитI. АгIвычIвгIвыс «Сара йанскъычIра йсзыкIарышвхуаштI», – йхIвауамцара йхъа йжьитI. Ауи зхIвуз щардагIвы ареабилитация Квта апынгьи сыршIашвалитI. АгIвычIвгIвыс ауи даланамхIвушызшва, щцалрата йзамылуашызшва йбитI. Ауи гIващагIара дупI. «АкъапгIан» зны уакIрыквын, угIаунащтхра ахъазла къару щардагьи замангьи атахъхуштI. Ауаса азгIва р ы л а д м ы р ш ы к I ьу а т а цхърагIара йшазыбжула тшгIахIзынадырхарквын, зымгIвагьи хIкъаруква адхIкIылта рбзазара атара йтахIыргылхуаштI, – йхIватI ареабилитация Квта аунашвачпагIв. ЗгIвадарахчарала а-Министерства аъачIвагIагIвчва йакIвдыршаз архъвыхраква ргIарбараква швабыжта йгврыдзгапI. Астатистика йшгIанахIвауала, й-XXI-хауа асквшышв аламгаскIва хIкъральла наркотик здызгалуаз абзазагIвчва рпхьадзара хмильуанкI йгIашIарышвта хвмильуанкIдза йнадзитI. Ауат рыуа апроцент 60 жвагIсквша йгIашIарышвта сквш 30-дза зныбжьу ракIвпI. Апроцент 20 апхьартаква йрапхьагIвчвапI. Колесникова Елена йшылхIвазла, ауыжвгIанчIвиква йызшIашвауа анаркотиккви СПИД ашIашIкIгIари йаларпата йгIамгIвайситI. – СПИД зхьуата ашвъа йанхIцIаз дзачIвызлакIгьи зны наркотик рыдыргалтI. Ауат зымгIвагьи: «Сара зынгьи сгьазымхъвыцуазтI ауи азгIва гIасахвуашта. Анаркотик хъвмаргата акIвын йшызбуз. Йанстахъхара йшсзыкIарышвхуашла чакь гьазгIазымгуазтI» – рхIвитI. ЗынзаджвыкIгьи нахъуштI агIвычIвгIвыс СПИД ашIашIкIгIара, агепатитква В, С, гIарыдсылра ахъазла. Ауи амщтахь агIвычIвгIвыс йбзазаща псахра щарда гIалалитI. КъарчаЧеркес Республикала асквш 1989 йгIашIарышвта асквш 2020-дза ВИЧ ашIашIкIгIара зхьуата 1065-гIвы ашвъа йанырцIатI. Асквш 2020 ауацIа 67-гIвы ВИЧ рыхьуата йгIахIрыбергьыльтI. ЗызгIвадара зырхъвыхра зтахъу дзачIвызлакIгьи хвыдъа архъвыхраква йырхъысырныс рылшуштI. ДзачIвызлакIгьи швызгIвадара швазсакъра, анаркотикква тшхъдшвымрыхырнысла тшшвзынасырхитI, – лхIватI ауи. Адуней статистика йгIаквухырквын, наркоманкI 12–15-гIвкI ауи ауыс гвымха йаланайырхIвитI. Дмитриева Инна йшгIалылкIгIазла, анйара зымгIва йрапхъата йыззынархаз апхьагIвчва ракIвпI, ауат рызгIвадара шырхчуш, анаркомания, аркъажвра, атутынчвара штша лана д мырхIву ш уыс хъадапI. – Наркотик здызгалуа агIвычIвгIвыс йбзазара айшысхитI. Ауи квтанайта хысквша акIвпI дъадзабзазахуа. Ауи йалу ахимия пкъыгIваква агIвычIвгIвыс йакъыль, йхъвыцща аладырпIатIитI, йызгIвадара щаквдрыситI. Йыдйымгалырквын ймахъащахъаква тшдырхъауа дарычмазагIвитI. ДгIакIвзыршауа ажвлара рыхъазлагьи дшварагIварахитI. Анаркотикква ргIашIакIра ауысква рпны ауат абзазагIвчва йрылазгауа, курьерта йынкъвызгауа рабакIрагьи магIын ду амапI. РыцIа щардала Интернет апны уызшIашвалауа ахча ласы йгIауынха ъауаш йапщылу ахабарргагаква шврызсакъра атахъыпI. Ауат апхьагIвчва рыцIа йаланадырхIвауа йалагатI. «Биологически активные добавки, спортивное питание» йапщылу апкъыгIваква нкъвугара атахъыта рхIвауамцара, швыржьата наркотик пшцIыщтра шваланадырхIварныс закIы гьазхIвам. УахьчIвала збальыгъ йнамдзас чкIвыныргIа йырзынархата гIвуголовна уыскI акIвшахьатI. Ауи ачкIвынчва рбзазара апны щапIшIархата йырзалуаштI. Наркотик зтиуа швара швхъахIара йахъгвыргIвауата, швбзазаща агъьырчIвра ртахъыта гьакIвым йшаъу, ауат дара рхъахIара акIвымкIва швызгIвадарагьи швбзазарагьи гьрымагIальаматым. Заджвгьи тшишвмыржьан. ШвгIакIвзыршауа агвып магIын ду амапI. Аспорт тшадшвкIыл, швмурад бзиква швшырзынадзуш швазхъвыц, – тшырзыналырхатI чкIвыныргIа аъачIвагIагIв. Анйара апны йгIачважваз зымгIвагьи анаркотик агIвычIвгIвыс йызгIвадара шщаквнарысуа, йакъыль дахвитхымкIва дшачпауа дрыбагъьатI, ашIаква згIвадата йгIадзынгылра ахъазла йырчпауа чIвырхъипхьадза йазхъвыцра шатахъула тшырзынадырхатI. ЙгIайззаз зымгIва СПИД йгьи анаркомания тшырчвыхча шауаш зныз абуклетква, цхърагIара йазыбжу тшъарзынадырхуш адкIылараква, ауат ртелефонква зныз абгъьыцква рыларшатI.