«СГIАКIВЗЫРШАУА ЗЫМГIВА ПШДЗАЗЛАРНЫС СТАХЪЫПI»

Щымта щажьыта зымгIва рапхъа МЕРЕМКЪВЫЛЬ ФатIима ХIазратали йпхIа анхарта дцитI. Ахвыцква асабигIзарта йгIадымгылскIва ауи дъагIвнанхауа апещ ахъышвква зымгIва лтIитIта ахIауа цкьа налжьылитI. ФатIима асабиква швабыжта бзи йылбитI, лынхарта гвщтIыхра лылата дцалитI. Ауи Черкесск йаныргIалу «Журавлик» сабигIзарта апны абжьагIвы дылцхърагIагIвта дынхитI. ФатIима асквш 1977 агIан Эрсакон кыт дйытI. Лаба ХIазратали аколхоз апны машинанкъвцагIвта дынхатI, лан Назифа дсекретарьын. ФатIима тгIачва ду апны дгIадзынгылтI, гIвахщчви ащакIи лымапI. Ауат абагвынгIвыри ацацхърагIари рызбжьата йбзазитI. Апхьарта бзита дапхьун, ауи ауысква джьгарта дрылалуан, волейболла анкъвакъвраква йанакIвызлакIгьи дцалун. Апхьарта дангIалга дзахгIвы йгьи бухгалтер-экономист ъачIвагIаква гIацIылгатI. – Сара схвыцищтара адзахра бзи йызбитI. Ауаса бухгалтерта сынхарныс гIалсхлун, ауи йгIалцIла, агIвъачIвагIакIгьи гIацIызгушта йщаквсыргылтI, – лхIвитI ФатIима. Асквшква 1997 йгIашIарышвта 2006-дза Сургут апны бухгалтерта дынхатI. Лцри шта дангIахъынхIвых Меремкъвыль Исмаили лари унагIвара йалалтI. ФатIима лпа йаргванта даъазлара ахъазла асаби дъалгуз «Ветерок» хъатачIв сабигIзарта апны бжьагIвыта нхара далагатI. – АсабигIзарта апны акIвпI сара ауи ауыс зымгIва рацкIыс гвщтIыхра ду шгIасыланацIауа анщаквсыргыл. Асабиква срылазларныс бзи йызбитI, ауат рылачкIвынквала йангIасхъапшылуа агвалагIваласраква гIасыларцIитI, – йгIалылкIгIитI апхIвыс. ФатIима ауаъа сквшквакI данынха «Журавлик» сабигIзарта лпагьи ларгьи цахтI. Ауи асабигIзарта ауацIа уысква джьгарта дрылалитI. Дъанхауа аунашвачпагIвчвагьи йызнымкIва лгIатгараква гIалыркIгIауата аразыра сальамшвъаква лквнадыргатI, анкъвакъвраква рпны дапхъагылагIвхатI. ЙылрыхIазырыз ацIисква ъатачуш акормушка зымгIва йрагъьхатI. Асквш шIыц йазынархата йакIвшуз анкъвакъвра апны лпа Дамири лари йырчпаз «ХIтгIачва Асквш шIыц ахъвмарга» йгьи «Асквш шIыц акалейдоскоп» йапхъахауа агылартаква гIатыргатI. АпхIвыс напIлачпара щарда гIалдахIвитI. Амхвквала йапшым ахIврапшдзаква, ацIлаква лрыхIазыритI, акIьанджьква аъахвтанква рзылдзахитI, атацанадылраква рпны атаци амхIви йгIадрысабапуа афужерква лрыпшдзитI. – Сара, йалкIгIата, акIьанджьква сырзыдзахырныс бзи йызбитI. Ауат йрыдызгалуаш атурасква акIьанджьква дара рлактаква йгIасархIвитI. АкIьанджьква хъахIаракI гIалсхырныс гьакIвым йызсчпауа, ауат айхIара согIата йрыститI. Ужвы хIзаман аткванква рпны йумауаш гьаъам, рыхвлагьи рчпащалагьи йапшымкIва кIьанджь щарда ртйитI. Ауаса уара унапIыла йурыхIазырыз асогIа рыцIа йтлапIата йспхьадзитI. Мхвгьи хъыздитI, ауаса ауи рыцIа заман щарда сыквнахитIта, санахамдзауагьи щардапI. ХIаргванкви хIыгвлачвакви рыхайырквагьи схатI рыласцIалитI, ахIальыуа хъылпаква срыпшдзалитI, ауатгьи акIьанджьква рызсрыхIазыритI. Сара ауат ауысква санрылу гвщтIыхра гIасыларцIитI, заджвы сйысабапхарныс магIын ду азызбитI, – лхIвитI дгвыргъьауа ФатIима. АсабигIзарта апны рыцIа йайцIбадзу агвып ракIвпI ФатIима дыздынхалуа. Ауи йшылпхьадзауала, пычIвта зани заби рыцымкIва асабигIзарта йгIаныржьуа ахвыцква йалкIгIата гватра рзалухра атахъыпI. Ауат урыдынхалырныс ага рыцIа йхIатлазтынгьи, апхIвыс ахвыцква гвхътIыла дырзаъапI. – Щымтала асабиква агагIвгьи йчIвыуата йгIардитI, сара ауат ахвыцква агвып рахьыла йгIахъскъьалуата йапшым амальква гIасрысабапитI. Аллергия рымата йапшым афачIвква зфа амуаш асабиква йшымламщиуаш апшта азакI рфа амуазтын, йгIвбахауа рыцIа щардата йрыститI. ХIынхара джьауапкIра ду алапI, ауаса хъвлапныла ахвыцква рпны йцахырныс ртахъымкIва йанырхIвауагьи гIаншалитI. Ауи агIан щымта спахь йсыргылыз смурадква шсырхъйаз гIасгвынгIвитI, – лхIвитI апхIвыс. «Семицветик» гвып апны ФатIима дызцынхауа абжьагIвчва Шиянова Татьяна йгьи ХвытI Юлия швабыжта йылзыразпI, лхъвдаквцIараква йнардзата йшлырхъйауа, асабиква швабыжта бзи дшырбауа гIалыркIгIитI. Ауи дъагIвнанхауа асабигIзарта апещгьи лрыпшдзауата анапIлачпараква лрыхIазыритI, ахъышвпрапсаква дрыдынхалитI. – Сара сгIакIвзыршауа зымгIва пшдзазларныс стахъыпI, ауи сара йсхъазымкIва йгIайуа ахвыцквагьи йрылархIвитI, ашIыцраква мшигIадза сырзыпшгIитI, схъвдаквцIараква сырхъйауа акIвымкIвагьи сынхара алахIвара пшдзаква шгIасыланацIуш сащтапI, – лхIвитI ФатIима. Ауи апш збзазара гвщтIыхра азлымата, зымш дгвыргъьауа йгIатазжьуа, анур пхаква гIазхъыцIуа апхIвыс дгIакIвзыршауа зымгIвагьи лпхара рылархIвитI. Зуыс бзи йызбауа, адуней зрыпшдзауа ауагIаква хIщардазтI.