Актуально В ФСБ России по КЧР рассказали как распознать телефонных злоумышленников  СКФО Новый логотип курорта Эльбрус в КБР представили в студии Артемия Лебедева СКФО В Северной Осетии прошла донорская акция Актуально В КЧР родители старшеклассников сдали ЕГЭ Общество Карачаево-Черкесия наращивает объемы производства тепличных овощей

«САРА СЗАЧIВДЗАЗ ГЬШВЫЗДЫРХУАШЫМ ЗЫНГЬИ...»

20.05.2019 238
«САРА СЗАЧIВДЗАЗ ГЬШВЫЗДЫРХУАШЫМ ЗЫНГЬИ...»
АсуратчпагIвчва рыршIыйара ашвыгаквала йгIандыршузтын, ауысагIвчва рхъвыцща апхьагIв йзынадырдзара ахIатырла йазалху ажваква гIадрысабапитI. Кьангьашра гьалам ауысара гIвычIвгIвысипхьадза лахIвара пшдзакI шгIайыланацIауа, хъвыцрата йгIанаршIыцхуагьи гьмачIым. ХIызту азаман ауацIала Инстаграми Интернети акнигаква йранкъвакъвуазшва йцатI. Ауи йгIалцIла, йбзу ажва ауагIа йырзыназырдзауа актерква дара ауысагIвчва йрапшдзата хвы рымапI, йдырхъйауа ауыс амагIны швабыжта йцIолапI. Совет актерква йрыуата апшыгIвчва зыргъаруаз ауысаква дгIарыпхьарныс бзи йбун Казаков Михаил, уахьчIвала зыхьыз бергьльу збарла апхьагIвчва йрыуапI Демидова Алла, Белый Анатолий. Ауат рхъазы асцена йаныквгылугьи театркI шабгу гIандыршарныс рылшитI. Ауи апш уыс пшдзакI адыргалтI Абаза район актова зал апынгьи. Къарча-Черкес Республика ауагIа руысагIв Мыхц Кьарим йхъыцIуашыз асквш 70 йазынархата хъмаштылра хъвлапны акIвдыршатI. Ауи йалан Абаза район ахъада Архагъ Къвырман, администрация анхагIвчва, арайон аквтанай апхьартаква рарыпхьагIвчви апхьагIвчви, ауысара бзибагIвчва, ахабарргагаква рынхагIвчва. Ахъвлапын Къарча-Черкес Республикала гIатгара зму акультура анхагIвы, актер, асуратчпагIв Быджь Амир Мыхц Кьарим йуысаквала йыргылыз «Сара сзачIвдзаз гьшвыздырхуашым зынгьи...» апьесала йгIахъыртIытI. Араъа зынла йгIалхIкIгIара атахъыпI Амир йрыхIазырыз аспектакль апш хIреспубликала зынгьи йшакIвымшас. Асценарий ащтацащагьи йара Быджь Амир йгIахъвмарщагьи апшыгIвчва швабыжта йыргвапхатI, дгIазпхьаз ауысаква 20 йрайхIан. Быджь Амир йапшым агвацчпа литература гIвыраква рыхъазла сурат йгIвитI, асабиква дрыдынхалитI, ауагIахъа театр апны дгIахъвмарлитI. Ауи йыршIыйара ужвыгьи хъатакIла тшгIахънатIытI, «Театр одного актера» ахьызта йщаквгылу азъазара квпшыра бзидздзата йгIайдахIвтI. Ауи Мыхц Кьарим йыршIыйара шабгу йгви йакъыльи йрылстI, ауагIа рыцIа рхъа йтазырхъвыцуашыз гIарылихын спектакльта йыргылтI, адекорация йадынхалызгьи йара йакIвпI. «ГIагвалашвахра» поэма йгIалху ашIчIвараква, «Сазыжвбжьахуа йацы йсчпара атахъыз», «Иуда», «УасакI ачва йгьахъырхуам гIван», «ЙгIашарыквын – йгьхъвладзахуам», «ЙыздыритI, сыгьчкIвынхым», «Чвамза», «Заджвы йхIваща», Съатадрийыз», «СыгIвзачва» датшагьи дгIазпхьаз ауысаква азал йыгIвназ заджвгьи гвалымста дгьгIанырымжьтI, напIасра дулагьи йнардастI. Ахъмаштылра хъвлапны йгIадгылыз тшырзынайырхауата дгIачважватI Абаза муниципальна район ахъада Архагъ Къвырман. – Абаза уысагIв бергьльы Мыхц Кьарим дгIадриищтара йцIыз асквш 70 хIыцзыртлапIарныс йгIадгылыз зымгIвагьи швызгIвадахатI. Кьарим Леонид йпа йцIоладзу длирикын, йыршIыйара классика гIаншарапI, йуысаквала йаларцIаз ашваква щарда йнадзитI, абаза гIвгIвчва рыршIыйара йауата урышв бызшвала йатаркIызгьи гьмачIым. Ауи йыршIыйара хIреспубликала йахъазымкIва Россия ауацIалагьи йбергьльыпI. ЙхъыцIуашыз асквш 70 йадахIвуата Абаза район администрация арайон библиотека йыхьыз ахъырцIарныс щаквыргылра нарахвтI, – йгIаликIгIатI Архагъ Къвырман. Абаза муниципальна район ахъада Ставрополь «Абаза» уагIахъакультура автономия ргIаджвыквцIарала йакIвшаз «Айрышта бзи хIабашвырба» флешмоб апны бзита тшгIазырбаз КIвращын Амалия, Тобыль Имран, ХIачвыкъва Амина, Татаршвауа Альберт, Пщмахва Лиана, ЧкIала Ирина, ХIасарокъва Бильаль асогIакви артшхъвага сальамшвъакви ритхтI. Ауи акIвымкIвагьи, Архагъ Къвырман Абаза муниципальна район администрация ахъада Ныр МухIаджьыр йразыра сальамшвъаква аршIыйагIв Быджь Амир йгьи «Абазашта» газет аредактор Къвыл Фардауыс йырквнайыргатI. Ахъвлапын ауысагIв Мыхц Кьарими акомпозитор Йуан Мусси йыргIвыта Къарча-Черкес Республикала гIатгара зму артист Меремкъвыль Ачар йхIваз «Дуней» ашвала йалдыргахтI. «Сара сзачIвдзаз гьшвыздырхуашым зынгьи...» ахьызта Кьарим йуысаква разкIкIра асквш 1994 агIан йгIацIцIтI. АршIыйагIв Быджь Амир йпьесагьи йара ауаса йахьицIатI. Ауи аргылра йацыркIтI Абаза муниципальна район аунашвачпагIвчва йгьи «Алашара» адкIылара Черкесск городла аъачIвагIагIвчва.
238 просмотров


Комментарии

Написать
Комментарии >



Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный
Вступайте в сообщество RIAKCHR в “Telegram” Получайте свежие статьи и новые публикации на свой мобильный