КъЧР-ни Башчысыны Администрациясыны эмда Правительствосуну тамадасыны биринчи заместители Надежда Пивоварова сакъатла бла ветеранланы ишлерини хакъындан советни кенгешин бардыргъанды. Белгилисича, бу совет Къарачай-Черкес Республиканы Башчысында къуралгъанды.
Аны кёзюулю кенгешинде Джёгетей Аягъы эмда Зеленчук муниципал районланы администрацияларыны башчылары Уллу Ата джурт къазауатда уруш этгенлеге къаллай къайгъырыу танытханларындан хапар айтхандыла.
Кенгешде КъЧР-ни урунуу бла социал ёсюмюню министри Мурадин Кемов да сёлешгенди. Ол 419-чу номерли федерал закон бла сакъатланы эркинликлерини юсюнден конвенцияда айтылгъанны джашауда къалай толгъанларыны хакъындан айтханды.
Джыйылгъанла джуртларын джаудан къоруулай уллу джигитлик, ётгюрлюк танытхан джердешлерибизге бюгюнлюкде турист маршрутланы джарашдырыу баргъанына уллу эс бёлюб тынгыладыла. Бу джумушну КъЧР-ни Туризмини, курортла бла джаш тёлю политикасыны министерствосу къолгъа алгъанын сакъатланы джамагъат организациясыны келечилери да джаратханларын джашырмадыла.
Сакъатла эмда къарыусуз къартла шахар транспортха тынчыракъ минер ючюн, ала тохтаучу джерлени игирек джарашдырыргъа, таксиледен тазаларгъа кереклиси да чертилгенди кенгешде.
Комментарии