РШІЫЙАРА МГІВА ДЖЬАЩАХЪВА АМЫЗДАЗ АРТИСТ

Асквш 1939 январь
агІан Апсуа кыт апны дйытІ
Къарча-Черкес Республикала йахъазымкІва зыхьыз бергьльу артистка
УАЗ Льильа Рамазан
йпхІа. Ауи данчкІвыныз
йгІашІарышвта закІ шгІалылцІуашыз гьымгІващузтІ.
Черкесск город йаныргІалу
апхьарта-интернат данапхьуз йанакІвызлакІгьи йапшым агвыргъьахъвква
рагІан пшдзата уыса
дгІапхьун, аргылчІвква
рпны дгІахъвмарлун. Ауаъа дангІалга Ленинград
атеатр, амузыка йгьи акинематография къральыгІва
институт йыцІалырныс зынасып йгІанакІыз агвып
дрылашватІ. Асквш 1962
агІан аинститут дахІврала дгІалган, лынцІра шабгаз Къарча-Черкес аурышв театр апны дынхатІ. Ауи хІреспублика апны адрама театр ащаквгылра йгьи атшауацІыхра къару щарда алазцІаз
дрыуапІ. Артистка сквш
50 руацIала дызлагІахъвмарыз атурасква 200
йрайхІапІ. Ауи лыршІыйара зны тшахазыргІвазаз анцІрала ргвы йгІатахатI, апшыгІвчва зымгІвагьи швабыжта бзи
дырбун.
Льильа Рамазан йпхІа
атеатр нхара дшалагуз
атурас хъадаквала дгІахъвмарырныс гІалызхъарцІауа йджвыквылтІ. Айтматов Чингиз – «Тополек
мой в красной косынке»,
Мустай Карим – «В ночь
лунного затмения», Вишневский Всеволод – «Растянулось море широко»,
Шатров Михаил – «Именем революции», Тренев
Константин – «Любовь
Яровая» гIвыраква рыщатала аспектакльква
рпны бзидздзата дгІахъвмартІ. АпшыгІвчва анцІрала ргвы йгІатахатІ адуней хьапщ драматургия
йалу Вольтер йтрагедия
апны Заира лтурасы шгІахъылтІыз. Мольер ЖанБатист – «Тартюф», Чехов
Антон – «Дядя Ваня»,
Шекспир Уильям – «Отелло» пьесаква рпынгьи
Льильа Рамазан йпхІа
атурасква бзидздзата
йгІалдахІвтІ. Ауи лылшараква шхІаракІу гІанарбатІ Островский Александр йпьеса «Таланты и
поклонники» апны Негина лтурасыла дангІахъвмар.
Ауи лгвымчІвара, луыс
адгылща гІарпхьадзауата асквш 1982 агІан «Россия Федерацияла гІатгара зму артист», уадыргІвана «Къарча-Черкес Республика ауагІа
рартист» чІахІра хьызква гІалквнадыргатІ.
Льильа Рамазан йпхІа
лынцІра шабгаз аурышв
театр апны дынхазтынгьи лцри абаза уагІахъа
уыста йгІаджвыквырцІалакІгьи рквта далан. Абаза театр ангІандырша
швабыжта дайгвыргъьун
йгьи артист шІаква кьангьашагІв-уасаражвта дырзалуан.
Уаз Льильа асквш 1976
йгІашІарышвта асквш 1980-
дза СССР азъазара анхагІвчва рпрофсоюз а-ЦК
далан, уыс бзита йлырхъйазгьи гьмачІым.
Асквш 1962 агІан Ленинград атеатр, амузыка
йгьи акинематограф къральыгІва институт йацгІалгаз артистква КІьыщмахва ХІамзат, Барокъва
Тамара, Уаз Льильа, Тохчуков Борис, Аджиев Амби, Кумратова Дженетхан йпшдзаквата, ршІыйара рылата, анхара йазгІашыкъта асцена йанацгІаквыл Къарча-Черкес
апны адрама театр зынла апхъала йчІвырхъатІ,
йгІакъагІатІ. Аурышв театр атурых зыншвалыз
«Очерки истории Русского театра драмы и комедии Карачаево-Черкесии» книга апны зыхьыз хьдзыла йану артистква рпхьадзара далапІ Уаз Льильа Рамазан
йпхІагьи.
Аурышв драма театр
артистква хІреспубликала йахъазымкІва хІкъральла йаныргІалу анахьанат
агород дуква рпынгьи
йгІахъвмаруан йгьи йгІахъвмаритІ. ХІыгІвычІвгІвысква Уаз Льильа, Барокъва
Тамара, КІьыщмахва ХІамзат злаз аспектакльква
ъагІадырбазлакІгьи апшыгІвчва зджьарагьи гвалымста йыгьгІанымхатІ.
Россияла гІатгара змаз
артистка Уаз Льильа Рамазан йпхІа асквш 2019
январь агІан сквш 80
лхъыцІуашын. Ауи сквш 76
дыртата адуней лхІваджьтІ.
ЙанакІвызлакІгьи знашх
лашараз, йацІарпххаз,
лкIгIара пшдза змаз артистка хІхаквлагІвчва ныбыжьта дызтагылазлакІгьи сквш 45 драйхІата
заджвгьи йгвы гьымгІватІ.
Аурышв театр анхагІвчва, лыршІыйара йахагІвазаз апшыгІвчва йгьи
абаза уагІахъа Уаз Льильа Рамазан йпхІа анцІрала ргвы дтазлуштІ.