«РОССИЯ, АПХЪАЛА УЧIВЫРХЪА!»

Ноябрь а 4 Черкесск апны ауагIахъаква рацзакIыра а-Мш гвыргъьахъв пшдзата йакIвшатI. Ареспублика драмтеатр апшцIа йгIайззаз ауагIа гвщтIыхра ду гIарыларцIатI Россия, ацзакIыра, амамыр йырзынархата йгуз ашваква. Черкесск амэрия аплощадьла угIалагата Ленин йыхьыз зхъу аурамла дута йауацIыхыз Россия йгьи Къарча-Черкес рбаракъква рымата апатриот шIаква ргIамгIвайсра зымгIва рыхъазлагьи змагIны дуу гIаншарахатI. Апша йарыббуан йапшым аполитика партиякви ажвлара адкIыларакви рбаракъквагьи. ЧкIвыныргIа ауатыкв йызлагIаталыз «Россия, вперед!» музыка ргылчIв ауагIа рнашх рахIагьи йгIащтIнахтI. АчIахIра мшы йадахIвуаз агвыргъьахъв акIвзыршуз Разин Артем Россия а-Президент Путин Владимир Къарча-Черкес а-Хъада йгьи ауи абзазагIвчва йхIзыгIанайырхаз ахIвахIвра ажваквала йджвыквицIатI. «АуагIахъаква рацзакIыра а-Мшла сшвайхIвахIвитI. Запш заманызлакIгьи Россия апатриотра цIасквали ауагIахъаква рацзакIырали йымчын. Агвбайара, ачхIара, азцIабыргра хIапхъанчIвиква баргвырата йзынйалакIгьи рхъа надмыркъвуата йгIарылсырныс, ркъральыгIва ахъахвитра дрыбагъьарныс йгIарцхърагIун. ХIара закIгьи йузашIмырпшуаш хIтурыхи хI-Абашта йазхъазцIауа къвырльыкъв азызхаз ауагIакви хIхъмаштылра йалазлара атахъыпI, апхъала хIчIвырхъарныс, хачIвыта хIпахь йхIыргылуа ацIыхъва йнахIырдзарныс хIыхъвдаквпI» – йаныпI Путин Владимир йхIвахIвра сальамшвъа. ХIреспублика абзазагIвчва ахIвахIвра сальамшвъаква рзыгIазгIвыз йрыуапI РФ а-Правительства а-Председатель Медведев Дмитрий, РФ а-Федеральна Айззара а-Федерация а-Совет а-Председатель Матвиенко Валентина, РФ а-КъральыгIва Дума а-Председатель Володин Вячеслав, РФ а-Президент й-Администрация а-УнашвачпагIв Вайно Антон, СКФОла РФ а-Президент йгIащтийыгIв Матовников Александр. ХIреспублика а-Хъада Темрезов Рашид йыхьызла амитинг йалаз драйхIвахIвтI КЧР а-Правительства а-Председатель Уаз Аслан. «Атурых йшгIанахIвауала, ацIабыргра, ахъамайгьдзара, Абашта бзи йбара хIуагIахъаква йырцIасын. ХIкъраль агъа дгIагвыквсма йа баргвыра йашIашвама, хIцри хагIагв ахчара уагIахъипхьадза азгылырныс йанакIвызлакIгьи йхIазырын. Россия абзазагIвчва зымгIва йазакIу турых йгьи йазакIу уачIвымш зму уагIахъакIта хIаларпапI. АуагIахъаква рацзакIыра а-Мшгьи акъыльаквшварати айгварати йхIызбжьу йгьи хIкъраль алахь азгвалымсрата йазхIыму йыргIарбагапI» – йаныпI Уаз Аслан дгIазпхьаз Темрезов Рашид йсальамшвъа. КЧР а-Правительства а-Председатель йгIачважвара апны йшгIаликIгIазла, асквш 2018 РФ а-Президент Путин Владимир йунашвала адоброволецква йгьи аволонтерква йрысквшта йакIвшитI, чкIвыныргIа дасугьи рджьгарра гIадырбарныс йашымтапI. Къарча-Черкес апны ауагIа рбзазара агъьызчIвуаш волонтер проектта, къральыгIва программата щарда нхитI. АуагIахъаква рацзакIыра а-Мш йазынархаз амитинг апны йгIачважватI КЧР АуагIа Айззара (а-Парламент) адепутат, «Единая Россия» политика партия Черкесск городла ахъвшара аполитсовет асекретарь Ганшин Алексей, КЧР ажвлара адкIылараква р-Совет апредседатель, «Кали-Архи» агрекква рыжвлара организация аунашвачпагIв Кузнецов Владимир, «Единая Россия» политика партия КЧР-ла ашIыпIа хъвшара а-Исполком аунашвачпагIв йхъвдаквцIараква зырхъйауа Джамбаев Руслан, Черкесск й-7-хауа квтанай апхьарта адиректор Къвапсыргьан Шамель, ареспублика перинатальна Квта аполиклиника унашва ахъызцIауа Борсова ФатIима. ЧкIвыныргIа рыхьызла йгIачважваз Черкесск город й-5-хауа Гимназия апхьагIв Карасов Амин йширыбагъьазла, ауагIахъаква рацзакIыра хIкъральыгIва дахIврала атшауацIыхри акъагIари йрыщатапI, ауи амч йакъарупI. АчIахIра митинг амщтахь «АдзыгIвбжьа ЙачIва» тшпсщара-культура парк апны йа- дыргалыз агвыргъьахъв хъвмар- раква рахIагьи уагIа щарда гIазыркIкIытI. Ари атшын амитингкви аконцерткви хIреспублика агородкви арайонкви зымгIва рпынгьи йакIвшатI.