РКІКІАРА ХІЫЗГІАНЫРЖЬУАМЦА АЙАЧІВАКВА АЖВГІВАНД ЙАЛАДЗХИТІ

Байрамыкъва Халимат лыхьыз зхъу ареспублика библиотека апны акъарча литератури акультури рымчыбыжь апкъ йтата агІвгІвы, ауысагІв, Абашта айсра Ду аветеран, ажвлара уыснкъвгагІв бергьльы ХВБИ Осман ЙахІйа йпа йхъыцІуашыз асквшы 100 дыртлапІатІ. Ауи йалан культурала Къарча-Черкес Республика аминистр БАРОКЪВА Рамазан, ауагІахъа уысквала, ажвлара коммуникацияквала йгьи печатьла КЧР аминистр йзаместитель ХВБИ Ислам, ареспублика библиотека адиректор ХАПЧАЕВ СальыхІ, Черкесск город Дума апредседатель йзаместитель ГІАШОКЪВА Иналь, КъарчаЧеркес Республика ауагІа руысагІв ХВБИ Назир, апхьахьаква агІвгІвчва, ажвлара уыснкъвгагІвчва, ареспублика астолица йаныргІалу аквтанай апхьартаква рапхьагІвчви рарыпхьагІвчви. Акъарча литератури акультури рымш йадахІвуата йкъытхаз йгьи йгІацІцІгІвацаз акнигаква йгьи Хвби Осман йыршІыйара йазынарху ргІарбараква адыргалтІ. Айззара йалаз ргватра агІвгІвы йынцІра-бзазара йазынадырхатІ. Хвби Осман асквш 1918, февраль а 17 Верхняя Теберда кыт апны дйытІ. Ауи йаба ЙахІйи йан Мамырхани йгІадзындыргылыз агІгІвсабичва рпны ахыгІв – Осман, Магомет, Назир зыхьыз бергьльу ршІыйагІвчвахатІ. Осман 16 сквша дыртата уыса йгІвуа йджвыквицІатІ йгьи йапхъахуз «Комсомольские песни» зхьзыз йазкІкІра асквш 1938 агІан йгІацІцІтІ. Йара ауи асквш агІан ауи йхабаргІвыра «Абрек» «Къызыл Къарачай» газет апны йгІаншвалтІ. Йара ауи асквш ауи СССР агІвгІвчва р-Союзгьи днарахвтІ. Осман ЙахІйа йпа Ворошилов город йаныргІалыз арыпхьагІвчва ъадрыхІазыруаз аинститут дангІалга ар къвырльыкъвхара дызшІырттІ. Абашта айсра Ду ангІалага анамыцаква дырпшІагылата дайсытІ. Дубно город аргванква йакІвшаз айбащраква рпны дхвхатІ. ХъацІарата йгІайырбаз йаквшахІатхауата «Орден Отечественной войны» йгьи медаль щарда гІайквнадыргатІ. Осман ЙахІйа йпа йызгІвадара аъащала ауи ахІа дайсых шамуашыз щаквдыргылын, йунагІва дгІарщтихтІ. Ауи къарча бызшвала йгІацІцІуаз агазет апны ответсекретарьта йынхара джвыквицІатІ. Асквш 1943 агІан акъарча уагІахъа рыцІхІагІа гІархьыдзан, Квта Азия йыргатІ. Ауаъа ауи Киргизия йаланакІуаз акытква рпны арыпхьагІвта, Сукулукск район апартия арайком лекторта дынхатІ. Асквш 1956 агІан апартиягьи днарахвтІ. Йцри шІыпІаквала дангІахъынхІвых къарча бызшвала йгІацІцІуаз «Ленин байрагъы» («Къарачай») газет аредакция дынхатІ. Москва город апны асквш 1957 агІан йакІвшаз Къарча-Черкес ауагІахъаква рлитератури разъазари йырзынархаз агвыргъьахъв далан. Осман ЙахІйа йпа йанакІвызлакІгьи ажвлара уысква рквта далан, интернационалист гвымчІвата йгьи патриотта тшгІайырбун. Асквш 1960 йгІашІарышвта ауи КъарчаЧеркес агІвгІвчва радкІылара апны кьангьашагІвта, асквш 1964 агІан Хвби Осман КъарчаЧеркес автоном область телебарали арадиуагІатраквали р-Комитет апредседатель дизаместительта дынхатІ. Ауи нхарала йгвымчІвара йаквшахІатта «Знак почета», «Дружбы народов» орденква, «За доблестный труд», «30 лет Победы» медальква йгьи чІахІра грамота щарда, асквш 1995 агІан «Къарча-Черкес Республикала ауагІа рыгІвгІвы» ЧІахІра хьзы гІайквнадыргатІ. Хвби Осман ршІыйара байа гІайтынхатІ. Ауи йахъазымкІва аурышв классикква руысаква къарча бызшвала йатайкІуан, бзидздзатагьи йгІайдахІвуан. Ауи акомпозиторква Кочкаров Марати Ногалиев Маджити дрыцынхун, ашвата йацыгІандыршаз 60 йрайхІапІ. Хвби Осман йгІвыраква аквтанай апхьартаква рпрограммаква йрылапІ, асабиква, астуденткви апхьахьакви йддырдыритІ. Ауи асквш 2001 агІан адуней йхІваджьтІ, ауаса акъарча уагІахъа ртурых апны зыхьыз йанакІвызлакІгьи пхата йгІаргвалашвахуаш дрыуапІ. Акъарча литератури акультури йырзынархаз айззара апны дгІачважватІ Барокъва Рамазан. Ауи ареспублика библиотека анхагІвчва уыста йакІвдыршауа магІныта йаму гІаликІгІатІ йгьи Хвби Осман йыршІыйара йгІадзынгылуа чкІвыныргІа рыхъазла магІныта йаму даквгІашІастІ. УыжвгІанчІви къарча литература аъащата йызту гІалхІватІ апхьахьа Мамчуева ФатIима. Акъарча литература атшауацІыхра агІвгІвы Хвби Осман ЙахIйа йпа къарута йалайцІаз йгІаквчважватІ Хапчаев СальыхІ, Хвби Ислам, ГІашокъва Иналь, агІвгІвчва АбытІ Хзыр, Аппаев Бильаль, Хвби Назир. Ахъвлапын йалаз апхьагІвчва сквшы 100 зхъыцІуашыз ауысагІв Хвби Осман йуысаква йгІарыпхьатІ, йажваквала йалу ашваква пшдзата йырхІватІ.