Къарапагва кыт йбзазауа
райхІарагІв ршІыйара
рылапІ. Ауат ашва
рхІварныс, уыса аларцІарныс,
йапшым аргылчІвква
йрыдынхалырныс зынгьи
йгьагІщум. ХІабльала
йайззалитІта ргвы абащтІыхитІ,
азаджв йгІатгараква
азаджв драйгвыргъьитІ,
ахІвахІвраква йзынадырхитІ,
рыцІагьи ддыргвышхвитІ.
Къвайдан кыт йгІадзынгылыз
АрргІа Анжелика
ауи йапшу аъащаква
лхъатала дрыквшахІатхатІ.
Асквш 2002 агІан
ауи Къарапагва кыт абзазагІв
КIьыщмахва Музакьыри
лари унагІвара
гІандыршан, 16 сквша
цІитІта акъыльаквшвара
ду рызбжьата йбзазитІ.
Анжелика апхьарта
й-9-хауа акласс амщтахь
Черкесск город йаныргІалу
апедколледж дахІврала
дгIалгатІ. Лынхара
лцри Къвайдан кыт апны
йджвыквылцІатІ. Дшынхузымца
Къарча-Черкес
къральыгІва университетгьи
дыцІалын дапхьатІ,
магистратура дгІалгахуаштІ.
АпхІвыс шІа лаби лани
пхата дгІарыквчважвитІ,
анхара йачІвыта йшгІабзазаз
гІалылкІгIитІ. Анжелика
лгІвахщчви лари
гІвысквша рапхъала адуней
зхІваджьыз ран
дшгІвычІвгІвыс нардзаз,
дшпшказ йанйапхьадза
йгІаргвалашвахитІ. Раба
йгвы шдырбзиуаш йащтапІ,
зымгІвалагьи цІагылагІвта
йзалитІ. Йаргьи
нхарадъа дыгьзычІвум,
акыт аколхозква аналаз
электрикта, чІапщагІвыта
дынхатІ, аунагІва апны
рахвы нкъвицитІ.
КІьыщмахва Анжелики
Музакьыри хгІвыпхІчва
рымапІ. ЗымгІвагьи
апхьарта апны рдахІвраква
бзита тшгІадырбитІ.
АхIба Полина й-9-хауа акласс
дапхьитІ. Апхьартала,
арайонла, ареспубликала
йакІвшауа анкъвакъвракви
олимпиадакви дрылазлитІ,
лгІатгараквагьи
гьгвымхам. Полина уыса
алалцІарныс дхІвынчІитІ,
лгІахІвахра чкІвынкІгьи
Ростов йгІацІцІыз «Космос»
азкІкІра йаншвалтІ.
Ауи йлыщтагІайуа Самири
Алини й-8-хауа йгьи
й-4-хауа классква рпны
йапхьитІ. РахщахІба лгІатгараква
рхъа аладухитІ.
Полина лан лапшта дарыпхьагІвхара
лгвыгъапІ.
ХІапхъахьыла ъачІвагІагІв
гврыхвата дшалуаш дыздыруа
зымгІвагьи йазхъарцІитІ.
КІьыщмахва Анжелика
асквш 2011 йгІашІарышвта
Къарапагва кыт
апны апычІв классква алрыпхьитІ.
ЛъачІвагІагьи
зджьара йгІанымхауата
йылгвапхитІ, лхъагьи аладухитІ.
– Асабиква срыдынхалырныс
бзи йызбитІ,
даргьи йгІасызхъарцІауазшва
йаъапІ. Йапхъахауата
апхьарта ашвхъымса
зщапІы гІахъызгаз
асаби йпщбахауа акласс
дангІалгауа здунейпшыща
щаквгылуа йалагаз
гвыбзыгъа чкІвынта
даналра швабыжта угвы
йаланархIитІ, – лхІвитІ
арыпхьагІв.
Анжелика йшгІалылкІгІазла,
лхъапщыла йани
йаби цІагылагІв бзита
йылзалитІ. Асабиква лыцрыгІзитІ,
аунагІва уысква
ацырхитІ, ракъыль
аквшвауа йбзазитІ.
Сквшы гІважва рапхъала
абаза кытква рпны
унагІвара йалалыз ашІаква
йъагІадзынгылыз
ахакв кІадрышвуанта насып
пшгІара агородла
йгІахъуан. УахьчІвала абаза
кытква зымгІва рпынгьи
аъаща датшахатІ.
Дасу йпсадгьыл хвыц
кІайрышвта датша зджьарала
йуышвырныс йыгьгвжважвахуам.
Акыт архъаква
дырхарджьитІ,
йшауаш апшта тшандыргІалитІта
йынхитІ, йбзазитІ.
Ауи Къарча-Черкес
Республика аунашвачпагІвчва
рбзирагьи ймачІымкІва
йалапІ. Йапшым
афедеральна программаква
дахІврала абзазара
йаларжьитІ, кытипхьадза
апны апхьартаква
руыхвитІ, йдырчІаджьитI,
аспорт площадкІаква андыргІалитІ.
Ауи ахІатырла,
йгІадзынгылуа чкІвыныргІагьи
йапхьитІ, дасу
йгвы йгІащтIнахуа аспорт
квпшыраква гІалырхырныс
алшараква зымгІва
гІадрысабапитІ.
ЛокІ пшдзакІ йагІвызу
Къарапагва кыт ъаныргІалу
апсабара йангІалдзауата
атыдз шІыцква ансисквша
йгІарылахІитІ,
гІвысквша цІуата дахІврала
йынхауа арыпхьара
квта йапхьауа асабикви
ауат йрыдынхалуа арыпхьагІвчви
рхъагвы аквыта
руачІвымш йапылитІ.
Получайте свежие новости на электронную почту
Комментарии