Актуально Рашид Темрезов провел рабочую встречу с управляющим Карачаево-Черкесским отделением ПАО «Сбербанк России» Зауром Джазовым Актуально В КЧР определили лучшего учителя родного языка и литературы Актуально Глава КЧР Рашид Темрезов вручил ключи от 19 новых пассажирских автобусов Актуально «Россети Северный Кавказ» на 7,7 % улучшили платежную дисциплину потребителей электроэнергии в КЧР Актуально В ФСБ России по КЧР рассказали как распознать телефонных злоумышленников 

Республикамыздынъ Басшысы - Санкт-Петербургта

08.09.2018 352
Республикамыздынъ Басшысы - Санкт-Петербургта
Саьрсемби куьн СанктПетербургта Пискарев мемориал кабырында, Ана-Эли монументтинъ касында Карашай-Шеркеш Республикасынынъ Басшысы Рашид Темрезов эм Парламенттинъ спикери Александр Иванов «Блокадалы Ленинградтынъ коршалавшыларына, Карашай-Шеркеш Республикасынынъ яшавшыларына оьмирлик эстелик эм данък» деген язувы болган эстелик плитасынынъ торжестволы ашылувында катнасты. Ол сонъалыкта Эстелик Аллеясында салынды. Оьз баьтирлерин- блокадалы Ленинградты коршалаганлардынъ атларын оьмирлендирген кыраллардан эм россиялык регионлардан бу 101-нши плита болады. Торжестволы амалламада соьйлей келип, Рашид Темрезов Санкт-Петербургтынъ басшылыгына эм Губернатор Георгий Полтавченкога разылыгын билдирди. Губернатор Санкт-Петербургтынъ ямагатшылык аьрекетшилерининъ эм республикадынъ Правительствосынынъ Карашай-Шеркеш ериннен оьлген аьскершилердинъ атларын оьмирлендируьв акында ойды демевлеген. «Бу эстеликли шак СанктПетербург эм Карашай-Шеркеш Республикасы ара айкаслардынъ йылязбасында калаяк, эм, элбетте, ийги коьрим – кезуьвли кере биз яс аркага бизим ясы уьйкен аркамыздынъ йигитлиги куьшли болганын коьрсетемиз», - деди Р. Темрезов. Санкт-Петербургтынъ Губернаторынынъ тапшырувы ман торжестволы амалламада вице-губернатор Анна Митякина катнасты.
«Буьгуьнги амаллама – ол авыр шакларда шыдаган халктынъ уллы йигитлигин эске туьсируьв. Россияды эм Карашай-Шеркеш ерин узак заманнан бери алал айкаслар бириктиредилер. Бизде ортак кайгылы тарыйхымыз бар. 900 блокадалы, савлай дуныяды сенъкилдеткен куьнлер, оьз Аталыгына алал аьдемнинъ куватлыгын эм уллылыгын коьрсеттилер. Эм халкымыздынъ уллы йигитлиги эм Ленинградтынъ яшавшылары, Россиядынъ регионларынынъ, аьвелги союзлык республикаларынынъ элшилери, олардынъ йигитликлери аркалы кала сав калды эм енъди. Буьгуьнги амаллама дуныяда энъ маьнелиси - ол тынышлык экени акында эске туьсиремиз. Оьлгенлерге оьмирлик эстелик! Берекетти, ден савлыкты, эм, энъ маьнелиси, баьримизге тынышлыкты! - деди вице-губернатор Анна Митякина. Юзлеген бизим ердеслеримиздинъ атлары оьмирлерге блокададынъ тарыйхында калганлар. Олар –Магомед Эльканов, Вера Воронова, Маджир Гаджаев, Заваль Дауров, кардашлар Ибрагим эм Кертибай Аппаковлар. Ленинград фронтынынъ бир зенит-артиллериялык дивизионында Юнус Урусов, Хусей Джаубаев, Магомет Болатчиев, Магомет Хачиров, Аскер Бабоев, Ахмат Тамбиев, Умар Богатырев, Хусей Бабоев, Магомет Ахтаов согысканлар. Ленинградты коршалавдынъ катнасувшысы Даут Байчоров Болган. Онынъ омыравында 13 оькиметлик савгалар болганлар, сонынъ санында Кызыл Байрактынъ 2 ордени, Аталык кавгадынъ 1 дережели ордени эм коьплеген савгалар. Доьрт кере яраланган, ама госпитальден сонъ аьр дайым фронтка кайткан. Хаджи-Исмаил Бабоев – «Яшав йолынынъ» уьстиндеги коькти коршалап оьлгенлердинъ бириси. Ол баьри ленинградшылар уьшин кие ерде –Пискарев мезарында коьмилген. Ленинградты коршалавда Зекерья Гогуев, Георгий Каргинов, Николай Петров, Иван Скобара, Рамазан Темрезов, Владимир Хетагуров, Умар Чачев эм оьзгелер йигитлерше согысканлар. «Олар Ленинград каласын коршалаганлар, олардынъ коьплери аьле бир атув этпей де яшавларын бергенлер. Ама ол Уллы Енъуьвдинъ баасы болган. Буьгуьн Карашай-Шеркеш ерининъ коьплеген уллары мунда Россиядынъ культуралык бас каласында республикадынъ улларынынъ байрагын сыйлык пан алып барадылар, бизим кыралларды оькиметлик власть органларында сый ман коьрсетедилер. Уллы Енъуьвди ювыклатып, яшавларын бергенлердинъ алдында басымды тоьмен иемен», – деди биринши рангтынъ капитаны, Балтия флотынынъ драма театрынынъ директоры, РФ маданиятынынъ сыйлы куллыкшысы Нурчук Шидаков. «Энди Санкт-Петербургта яшайтаган КарашайШеркеш ериннен ердеслер Пискарев мезарындагы Эстелик Аллеясына келмеге, кавга Баьтирлери алдында басларын иймеге болаяклар. Карашай-Шеркеш ерининъ халкы Ленинград уьшин уллы согыста ердеслеримиздинъ катнасувлары, ортак Енъуьвге косымымыз уьшин ярык эстеликти саклаяк», - деди КЧР Басшысы.
  
352 просмотров


Комментарии

Написать
Комментарии >



Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный
Вступайте в сообщество RIAKCHR в “Telegram” Получайте свежие статьи и новые публикации на свой мобильный