Сочиде озган Россиялык Инвестициялык форумынынъ калыбында Красная полянада Россия Правительствосынынъ Председатели Дмитрий Медведев кыралымыздынъ субъектлерининъ басшылары ман йолыгыс озгарды. Онда соьз каты социаллык туспарланган политикадынъ калыбында регионларга белсинли эм тебенли болувга демев калай этпеге болаягы акында барды.
РФ премьер-министрининъ белгилевинше, йыйылыстынъ темасы – финанслар эм бюджетлик аьжетсизленуьв баьри регионлар уьшиин оьткир сорав болады. Онынъ айтувына коьре, бу йоьнелисте коьп янъы ойлар тувадылар. Суьйтип, налог шаклары арасында шыктажларды коьшируьв йорыгы туьрлендирилген. Ол зат келимлерге налогты эсаплав мыратта этилген.
Бу йылдан баслап, берк алкоголь продукциясына акцизлерден келимлердинъ туьсуьвлерининъ мардасы 10 процентке оьстирилген.
Дмитрий Медведевтинъ белгилевинше, соьлеги заманда Правительство 2025 йылга дейим регионларды оьрлендируьв оькиметлик политикасынынъ Негизлер Планын таралтувдынъ уьстинде аьрекетлейди. Бу маглуматка Россия Президенти Владимир Путин кол баскан.
– Энъ бас деп соьлеги заманда биз бирге алатаган амаллардынъ пайдалыгын билмеге эм келеекте калай ислеегимизди карамага керекпиз. Аьл авыр болып калады. Бир кесек ийги туьрленислер сезиледилер, ама, менимше, олар коьлем болмага кереклер. Озган йылда регионлык бюджетлердинъ дефицити тоьменлеген – 170 миллиард маьнеттен 12, 5 миллиард маьнетке дейим.
Бу зат, соьзсиз де, маьнели эм ийги етимис. Маьселели регионлардынъ саны да тоьменлейди, онда оькиметлик борыш келимлерден артык.
Ама толысынша алып караганда, борыш «юги» айлак сезимли болып калады, – деди Д.Медведев.
Субъектлердинъ басшылары алдында соьйлей келип, Дмитрий Медведев регионлардынъ борыш пан маьселелерин шешуьвге Правительство бюджет кредитлерин беруьвди бардыраяк, деди.
– Быйыл бу мыратка 200 миллиард маьнет акша шыгармага планланады. Ама бу акша амалларын алаяк уьшин айырым шартларды толтырмага керек, айтпага, бюджетлердинъ дефицитлерин тоьменлетуьв бойынша каты борышларды толтырмага тийисли, – деди Д.Медведев.
Оннан баска бюджетлик аьжетсизленуьвди бир тегисли этуьв уьшин дотациялардынъ оьлшемлери оьстирилееклер.
Йолыгыста бюджетлер ара политикасын ийгилендируьв бойынша оьзлерининъ ойларын Правительстводынъ агзалары, кыралымыздынъ субъектлерининъ агзалары билдирдилер. Д.Медведев бир кесек тапшырувлар этти.
Комментарии