Регионлар ара байланыслар

Юма эртеси куьн Карашай-Шеркеш Республикасынынъ Басшысы Рашид Темрезов, Кабарты-Балкар Республикасынынъ Басшысынынъ борышларын заманлыша толтырувшы Казбек Коков эм Адыгей Республикасынынъ Басшысы Мурат Кумпилов Майкопта регионлар ара ислесуьв соравларын тергедилер. Йолыгыста уьш регионнынъ толтырувшы власть органларынынъ эм Администрацияларынынъ элшилери катнастылар. Карашай-Шеркеш ериннен элшиликтинъ санына КЧР Парламентининъ спикери Александр Иванов, республикадынъ Правительствосынынъ Председатели Аслан Озов, КЧР Администрациясынынъ эм Правительствосынынъ етекшиси Мурат Озов киргенлер. Буьгуьн биз биргелес ислесуьвдинъ янъы йоьнелислерин карастырувга бермеге аьзирмиз. Мысалга, математикалык билимлендируьв тармагында, уьйткенде, КБР-дан эм КЧРдан зегенли балаларды окытувга, республикаларынъыздан туспарлы алувга специалистлерди аьзирлевге, специалистлердинъ усталыкларын оьстируьвге амаллар бар. Оннан баска биз регионлардынъ социал-экономикалык оьрленуьвлерининъ тармагында, цифралык экономикады эм инновациялык аьрекетликти оьрлендируьвде, илми эм производство арасында байланысларды беркитуьвде куьшлеримизди бириктирмеге болаякпыз, – деди Мурат Кумпилов. Оьзининъ соьзинде Рашид Темрезов республикалар ара тар экономикалык эм культуралык байланыслар туьзилгенлери, туьрли тармакларда узак болжаллык биргелес аьрекетлик акында келисуьвлер туьзилгени акында айтты. – Бизим республикаларымызда коьплеген йоьнелислер бойынша коьп ортак затларымыз бар, эм бизде боьлискендей де, етимислер болган затларымыз да бар. Биз экономикалык эм дослык айкасларымызды арбатын да оьрлендиреекпиз. Соны ман биргесине яс-явка политикасына, Адыгей, Кабарты-Балкар эм Карашай-Шеркеш республикаларынынъ яс-явка ямагатшылык организациялары ара байланысларды беркитпеге тийисли. Оннан баска яратувшылык эм илми интеллигенциясынынъ да биргелес аьрекетлиги маьнели, – деди КЧР Басшысы. Республикамыздынъ етекшиси 2022 йылда Карашай-Шеркеш, КабартыБалкар эм Адыгей Республикаларынынъ туьзилгенли 100 йыллыгына багысланган биргелес амалламаларды озгарув бойынша да биргелес аьрекетликтинъ маьнелигин белгиледи. Йоклавдынъ калыбында республикалардынъ етекшилери Адыгеядынъ аьвелги басшылары ман – Аслан Джаримов пан эм Аслан Тхакушинов пан йолыгыстылар. Йолыгыста КЧР Басшысы коьплеген йыллардынъ бойында кардаш регионлар йылы айкасларды саклаганлары – бир-бирининъ аьдетлерин эм культураларын сыйлап, бирге маьнели политикалык эм экономикалык соравларын шешуьвдинъ сулыбын йыйганлары акында айтты. КЧР Басшысынынъ эм Правительствосынынъ пресс-службасы. Регионлар ара байланыслар Ю