РДУНЕЙПШЫЩА АТШАУАЦІЫХРА ЙАЦХЪРАГІИТІ

Никулин Сергей йыхьыз зхъу ареспублика саби библиотека апны й-16-хауата «Читатель года» анкъвакъвра акІвшатІ. Ауи аволонтерква ры-Сквш йгьи чкІвыныргІа акнига бзи йырбауата йгІадзынгылра, йрылу аршІыйара чІвец атшауацІнахра йазынархан. Анкъвакъвра гІвхъвыкІта йшан. Апхъапхъа асаби библиотека аъачІвагІагІвчва асквш 2018 ауацІала рыцІа джьгарта тшгІазырбаз акнига бзибагІвчва ртдзыхьызква гІадрыбергьыльтІ. Ауат 64-гІв йнадзитІ, дзачІвызлакІгьи рпны йрыхІазыруашыз хачІвы йыздыргылтІ. АпхьагІвчва алацІара, эссе, агІахІвахра хвыцква ргІвытІ. Ажюри асабиква ркъальам йгІахъыцІыз анхараква зымгІвагьи рнадзара шхІагІу, рхъвыцща шцІолу, йгІалырхыз анархара шджьащахъву гІалыркІгІатІ. АчІахІра грамотаква зыртыз апхьагІвчва абаза сабиквагьи рылапІ: й-2-хауа акласс апхьагІв – ГУМБА Амаль (Черкесск, й-17-хауа Гимназия); й-3-хауа акласс апхьагІв – ДЖЬМАКЪВЫЛ Дарина (Черкесск, й-5-хауа Гимназия); й-3-хауа акласс апхьагІв КЪВАПСЫРГЬАН Аделина (Черкесск, йгІвбахауа квтанай апхьарта); й-3-хауа акласс апхьагІв ЦЕКЪВА Рем (Черкесск, й-5-хауа Гимназия); й-5-хауа акласс апхьагІв ДЗЫГIВА Амина (Черкесск, й-5-хауа Гимназия). Асаби библиотека афойе Черкесск город аквтанай апхьартаква рапхьагІвчва рынхараква аныргІалын, ауат тшрыхазыргІвазаз зымгІвагьи йыргвапхатІ. Ауи акІвымкІвагьи, абиблиотека рыцІа йгврыхву апхьагІвчва «Читатель», «Лукоморье», «Дворец муз», «Журнальная империя» зхьзыз ауыс джьащахъваква йрылан. Акнигаква ъаныргІалу акІарышвтаква йрыквцІларкІыз ашвъабыгъьквала асабиква майрата дасу дызлазлара ртахъыз ахъвмарщаква гIарауанта йанкъвакъвхуан. Ареспублика саби библиотека апны чкІвыныргІа рыхъазла йадыргалуа анкъвакъвракви олимпиадакви йанакІвызлакІгьи сабапра рылата йакІвшитІ. Ауи йапшу амальква йгІадзынгылуа ашІаква рдунейпшыща атшауацІыхра йацхърагІитІ.