Разы болуб чачылгъандыла

Къарачай-Черкесияны джюзле бла джашлары, къызлары Москваны баш окъуу заведениелерине кириб окъуйдула. Ара шахарны кърал къурулуш университети да бизни республиканы джаш тёлюсю аслам барыб окъугъан баш окъуу заведениелени бириди.
Джууаблы къуллукъчулары, заман заманы бла ала бла тюбешиб, окъууларыны барыуларындан, ол окъуу заведениелени битдирселе, аланы къайры барыб ишлерге мурат этгенлеринден хапар билгенлей турадыла. Кёб болмай КъЧР-ни Правительствосуну Председателини орунбасары, Къарачай-Черкесияны Москвада Таймаздан ишлеген келечиси Гогова Мадина ала бла тюбешгенди. Ол кюн аны бла бирге тюбешиуде университетни халкъла арасы окъуу аралыгъыны директору Толстых Елена, ол аралыкъны къуллукъчулары Гамов Богдан бла Петросян Римма да болгъандыла.
Гамов Богдан, университетден иги билим алыб чыгъар, барыб ишлеген джеринде адамла сыйын кёрюр, ауузуна къарар ючюн, студент окъуу программаны иги билирге кереклисини юсюнден, Петросян Римма да баш окъуу заведениеде окъугъан хар джаш бла къыз аны студент джашаууна тири къошулургъа, хар неде башламчы болургъа тыйыншлы болгъаныны юсюнден айтхандыла.
Тюбешиуде Москваны къурулуш университетин бошагъанланы ишге къалай алгъанларыны, алагъа къайда къалай тюбегенлерини юслеринден соруула бергендиле.
Гогова Мадина, джашла бла къызла республиканы халкъларыны адетлерин, джашау халилерин, маданиятларын иги билир, арада шохлукъ, къарнашлыкъ хауа къуралыр ючюн, ол ишлени бардыра турургъа мында Къарачай-Черкесиядан келиб окъугъан джашла бла къызладан студент бирлешлик къуралса керек эди, деген оюмну айтханды.
Студентле Гогова Мадинадан Къарачай-Черкесияда къурулуш инженерле изленнгенлери бла къалгъанларындан, республикада къурулуш индустрия къаллай халда болгъанындан хапар соргъандыла. Ала соргъанларына джууабла да алгъандыла.
Джыйылыуну ахырында Къарачай – Черкесияны Москвада Таймаздан ишлеген келечиси Гогова Мадина окъууда джетишимлери ючюн студентлеге Бюсюреу къагъытла бергенди, джердеш студентле бла тюбешиу къураргъа болушханы ючюн университетни башчылыгъына да джюрек разылыгъын билдиргенди.