Районну ёсюмю не халдады?

Мындан алда Къарачай-Черкес Республиканы Башчысы Темрезланы Рашидни Джёгетей Аягъы районну администрациясыны башчысы Лайпанланы Мурат бла тюбешиую болуб, ол аны бла муниципалитетни бара тургъан джылда социал-экономика ёсюмюню эсеблерин сюзгенди.

Эки джаны да бир аууздан чертгенден, районну быйылгъы баш кёргюзюмлери къууанырчадыла. Мында Россия Федерацияны Президенти В. В. Путинни май указларын толтуруу бла байламлы белгиленнген ишле башдан аякъ толгъандыла. Сёз ючюн, Джёгетей Аягъы шахарны Московский микрорайонунда парк зона ариу джарашдырылгъанды, районну эллеринде Культураны юч къаласы джангыртылгъандыла, аны кибик башха джумушла этилгендиле. Мында районну социал инфраструктурасын андан ары ёсдюрюу да иги джюрюш алгъанды.


Алай болгъанлыкъгъа районда алкъын этилирге керекли ишле аз тюлдюле. Аланы юслеринден айта, Темрезланы Рашид районну башчысыны эсин мында орналгъан эллени суу кереклилерин баджарыу аланы бири болгъанына бёлдюргенди. Лайпанланы Муратдан аны толтурур мадарла этеригин да излегенди.
Къарачай-Черкесияны Башчысы Темрезланы Рашид Джёгетей Аягъы район гитче эмда орта бизнесни ёсдюрюуню республикан программаларына тири къошулургъа кереклисин а айырыб чертгенди. Неден да алгъа, дегенди ол, бу иш мында эл мюлк бла, алай демеклик адамла не джумушла бла кюреше эселе, ала бла къысха байламлы болургъа керекдиле.