РАБАДУЧВА РЫЩТА ДЫРЦИТI

«АхIба йыщта айцIба йымгIвапI» рхIвитI. Щта пшдза лызкъьауа агIвычIвгIвыс йцIыхъвагьи пшдзахитI, тшауацIнахитI. Гвым апсыхIва бзазартата йызчпаз хIабадучва зпщылаз арахвырхIари адгьылрхарджьри тшауацIддрыхуа йгIамгIвайситI ауат рцIыхъвала йгIадзынгылуа абанпараква. УахьчIва зхабар швахасыргIвазуш, зысквшквала агIвгара бзи зызбжьу ГIВКIЬАТI Алибек Джьамаль йпа йгьи ОГВЫЗ Борис Тосльамбакь йпа йагвлачвапI, рынцIра айхIара арахвырхIари ауасахчари йырпщылан. ГIвкIьатI Алибек быжьгIвысабичва рпны дгIвыджьхитI. Абар ауи йчкIвынхъа шгIайгвалашвахуа: «Саба Джьамаль йгьи ауи йыцыз хъачва къомыгIвкI ауандырквала Эгьзакь Дади Ажьи Бубакьыри айсра йшнардасуаз здырхитI. Ауи азаман пщбахвба сквшы сыртахарын. Асквш 1942 август анамыцаква акыт йгIаталта апхьарта тшанандыргIал, мадза-мадза, аныла-арыла агвара гъыцIараква хIрыцIагылата хIырпшуан. Ауат акIьадыгвква йгваралуанта йрауаз – къаз, квтIу, уаса, квтIагъь, хшлыцI йазымцIгIауа йамцIасуанта йгIагварыргун. ХIанчва ауат рмурад шпIайу, хIсакъхара шатахъу гIахIархIвуан». Айсра сквшква анакIвшуз атгIачва баргвыра щарда йыршIашватI. Раба айсра дпшцIан. Алибек анамыцаква акыт йантырцах апхьартата йырчпахыз БежанргIа ртыдзква рпны дапхьун. Ауаса хкласскI рахIа дампхьауата дгIацIцIхын, уасахчата йунакъващ ГIвкIьатI РаскIа дйыцылтI. Алибек уасахчата дшынхузымцара ар къвырльыкъвхара дызшIырттI. Ауаъа айсра уысква дрызджьгарта, йквра дазцIабыргта тшгIайырбатI. Ауи й-310- хуз артиллерия полк а-Баракъ Къапщ дацIагылан, йборч йнардзата йъайырхъйуз ахъазла архъв рразыра швъа гIайквнадыргатI. Йапшым артшхъвагаквала йхърыста айсра йгIахъынхIвыхыз йаба йапшта, йаргьи йборч дазцIабыргта дгIацIцIтI. Йкъвырльыкъвхара далгата дангIахъынхIвых Чква Рамед, Узден Ризуан, Апса ХIазраъиль унашва зхъырцIуз афермаква рпны жвхьагIвыта дыквын, уацIыхъван тшпсщара дчIвахындзыкIьара рахвхчата дынхатI. Гъынгьи пхынгьи – ква гIакварыгьи, сы гIасрыгьи йуыс зынгьи йгьапымкъьатI. Алибек запыт йгIайгвалашвахитI дызцынхаз, зрызкъ хIальаль йшIу амацIаугIвы Огвыз Насиба, мшыркъварала рнашх гIащтIызхуаз Къахвын Смирнов, рахIа йангIапсарагьи зкъвабыз абжьыла йгIащтIызхуаз Огвыз Тамара датшагьи. Ауи гIвыпхIчва гIадзынйыргылтI, унагIва хIвапсагIвата йбзазитI. АкIьадыгв йтшкIару йхъапщыла Гващапагви йари, ага рныбыжьла йшIахмызтынгьи, рынхара гьашIадрысуам, рырахв рахвыпI, йынкъвицауа атшы йара йхъауысгьи алайхитI, акIьадыгвгьи рхIатыр алайбитI.  Огвыз Борис агалагьи дайцIбапI, ауаса ауыгьи дчкIвынта анхара шбзазараз гIайгвынгIвытI, йща йалата дгIадзынгылтI. – Сара 14 сквша рахIа сыртамкIва апхьара кIасрышвын, «Красновосточна» совхоз йхпахауа архарджьырта хъвшара ХъныхIв Пакъа унашва зхъицIуз ахшгIахьарта ферма жвхьагIвыта сцатI, – йхIвитI Борис йчкIвынхъа сквшква гIайгвалашвахуата. – Ауаъа хвы змаз, анхара йасайыз ахIбачва гвыбзыгъаква сыршIашватI. Ажвхьара «акъвышраква» сдырдыртI, айгвыгIврала скIвдыршатI Ленин йорден гIазквнадыргаз Хъакъвпщ КIвнаца, «Анхара Абаракъ Къапщ», «Анхара а-ЧIахIра» орденква йрынкъвгагIвыз Огвыз Тамара, Агырба Льильа датшагьи. Ауат ргIацхърагIарала ажвхьара сащцатI, жвы 20-ла салаган, агIсквша руацIа жвы схьатI. уацIыхъван асовхоз йгIвбахауа архарджьырта хъвшара апны уасахча ахIбата йынхуз Эгьзакь Нарыкь йгьи Айсан Ромик уаса рыцсхчатI. Борис днымхахуищтара сквш къомкI цIитI, ауаса йунагIва апны рахвы, уаса, тшы нкъвицитI. Борис дызпщылу арахвырхIара йща йалапI йыцбзазауа йпа Зауыргьи. Ауи арахвырхIара йахъазымкIва, атштлапкъ бзиква йырхIитI. Аби апи ацацхърагIитI, йайкьангьашитI, рымлыкв йшаздырхIуш, йгIадзынгылуа асабиква рщапIы шдрыбагъьуш йахъазымкIва, йынхауа йунагIва анасыпи арахIмати шыгIвну рархIвитI, анхара йгIацIадыргылитI. – Сыгвла ГIвкIьатI Алибек аща црита акIвпI дшспхьадзауа, – йхIвитI Борис. – УыскI ахъа гIащтIысхырквын, дгIадзитIта йсхауа агъьызчIвуаш зымгIвала дгIасылабжьитI. Анхара йгIацIагылыз, щта пшдза лызкъьаз агвлачва ГIвкIьатI Алибек йгьи Огвыз Борис хIабадучва гIазцIагылыз анхара шбзазару, арахвырхIара шымлыкву, адгьыл хIшарчауа йгIадзынгылуа асабиква йрархIвитI, апшдзара йазырбжьитI.