ПРИКУБАНЬ РАЙОН АХЪАДА ШIЫЦ

КЧР а-Хъада ТЕМРЕЗОВ Рашид Прикубань район администрация ахъада йхъвдаквцIараква ЧОМАЕВ Мухамат-Амин йшйырхъйушла аунашва мачвы ацIайцIатI. Мухамат-Амин Ибрагим йпа ауи апхъала атарифквали ахвквали ареспублика унашвахъцIарта йнапIыцIан. – Чомаев Мухамат-Амин архъйара, ахабзалыхра органква, акъральыгIва йгьи амуниципальна къвырльыкъвхартаква рпны дынхатI, абизнесгьи далан, – йхIватI Темрезов Рашид аунашвачпагIв шIыц анхагIвчва гвып драбайырдыруата. – Ауи анхара йазыхIазыру, йазычпу дунашвачпагIвпI, дъачIвагIагIвпI. РыцIа йхъадахугьи дгIвычIвгIвыс нардзапI, джьауапкIра йылапI, арайон апхъахьылагьи тшауацIнахра ахъазла ауагIа адикIылта ахачIвква йырхъйарныс йылшуштI. АхачIвква йрыуапI РФ а-Президент Путин Владимир йчпаз амай Унашваква рырхъйара. Арайон йаунашвачпагIвыз Казиев Хвсейн Магомед йпа арайон атшауацIыхра мгIва йтайыргылтI, ауи йадикIылыз агвып Мухамат-Амин Ибрагим йпа йшгIайыцIагылуаш йазхъасцIитI.