Черкесскеде «Купол» деген саулукъ сакълау комплексде уллу спорт байрам ётгенди. Анда КъЧР-ни Физкультура бла спорт министерствосуну келечилери, аны кибик тренерле, сабий-спорт школгъа джюрюгенле ГТО комплексни мардаларын толтургъандыла.
КъЧР-ни физкультура бла спорт министри Ёзденланы Рашид кесини энчи юлгюсю бла спорт саулукъну тамалы болгъанын кёргюзгенди.
- Бизни баш муратыбыз ГТО комплексни мардаларын толтуруу керекли эмда магъаналы иш болгъанын адамлагъа ангылатыуду, - деди Ёзденланы Рашид, джыйылгъанланы алларында сёлешиб.
Алайды, 60-дан аслам адам кючлерин, къарыуларын, чыныкъмакълыкъларын танытыр ючюн кюрешдиле. Экзамен бергенлени барына да тёреле карточкала бердиле, аланы юслеринде анча-мынча упражнениени тындырдыла деб, къол салыб, шагъатлыкъ этдиле.
Бу уллу спорт байрамгъа къошулгъанланы барысыны да кёргюзюмлери аман болмадыла. Гитче Къарачай районда сабий-джаш тёлю спорт школну тренери Бостанланы Борис, джылы 72-ге келгенине да къарамай, айырылыб джетишимли болду. Ол кёб турмай Джангы Зеландияда ветеранланы арасында бардырыллыкъ Бютеудуния спорт оюнлагъа къошуллукъду.
Комментарии