Къэрэшей-Черкес Республикэм мэкъумэш хъызмэтымкIэ и Министерствэм ерыскъыхэкIымкIэ, абы елэжьынымкIэ промышленностым и къудамэм и IэщIагъэлIхэм иджыблагъэ Черкесск къалэм дэт сатущIапIэ, супермаркет тучанышхуэхэр щIаплъыкIащ.
Апхуэдэ лэжьыгъэр теухуауэ щытащ гъатхэпэм (мартым) и 13-м ехъулIэу цIыхухэр нэхъ зыщIэупщIэ, нэхъ къащэху ерыскъыхэкI продукцэм и уасэ нэхъ мащIэ дыдэр убзыхуным.
ЩIэплъыкIыныгъэхэм къызэщIрагъэубыдащ УФ-м и Правительствэм игъэнэIуа потребительскэ матэм иралъхьэ ерыскъыхэкIхэр, абыхэм хуэдэу зы цIыхум зы мазэм нэхъ мащIэ дыдэу хуэзэм. Апхуэдэу, зы мазэм зы цIыхум ишхыу къалъытащ: щIакхъуэхэкI, макаронхэкIыу килограмм 11; кIэртIофу килограмми 8,9-рэ; хадэхэкIыу килограмми 8; пхъэщхьэмыщхьэу килограмм 1,9-рэ; фошыгъуу, IэфIыгъэкIэу килограмм 1,8-рэ, лыхэкIыу килограмми 3; бдзэжьейхэкIыу килограмм 1,3-рэ; шэ, гъэшхэкIыу литр 19,8-рэ; джэдыкIэ 16,6-рэ; дагъэхэкI, маргарин, тхъууэ килограмм 1,1-рэ; нэгъуэщI ерыскъыхэкIхэу (шыгъу, шхынгъэфIэIу-гъэIэфIхэр, шей) килограмм 0,4-рэ.
ЩIэплъыкIыныгъэхэм къызэраг ъэлъэг ъуащи, Къэрэшей-Черкес Республикэм деж нэхъ мащIэ дыдэу потребительскэ матэм тохуэ сом 3010-рэ. Ар 2016 гъэм е 4-нэ кварталым щыIа уасэхэм нэхърэ сом 72-кIэ нэхъыбэщ, ауэ Урысей Федерацэм къыщекIуэкIым нэхърэ процент 35,4-кIэ нэхъ мащIэщ.
Лэжьыгъэр езыгъэкIуэкIа къудамэм и IэщIагъэрылажьэ пашэ Байкуловэ Лейла зэрыжиIэмкIэ, мыпхуэдэ щIэплъыкIыныгъэхэм къызэщIрагъэубыдэр ерыскъыхэкI щхьэхуэхэращ. Лэжьыгъэр зыхуэунэтIар уасэхэм я зэхъуэкIыныгъэхэр нэIэм щIэгъэтынращ. Апщыгъуэми, ягъэува мардэхэм имыкI, уасэ нэхъ мащIэу ерыскъыхэкIым, нэгъуэщIым сатущIапIэм трилъхьэр къыщIэгъэщыныр зыуи елъытакъым щIаплъыкI ерыскъыхэкIыр зыкIуэцIылъ, зэрахъумэ, и нагъыщэ, и дамыгъэ, нэгъуэщI щытыкIэхэм.
Комментарии