МЫГIВХЪГАРА НЗЫРШАУА ДЖЬАУАП ДДЫРКIИТI

«Росреестр» КЧР-ла а-УнашвахъцIарта апны асквш 2018 агIан рынхара агIарбараква йъарылачважваз алачIвара акIвшатI. Ауи йалан «Росреестр» СКФО-ла а-УнашвахъцIарта знапIыцIу ЧЕРНУХИН Николай, КЧРла афедеральна инспектор ЯСЬКО Юрий, КЧР а-Правительства а-Председатель йзаместитель ПОЛЯКОВ Евгений, аграрна политикала йгьи апсабара гIарысабапрала КЧР АуагIа Айззара (а-Парламент) акомитет апредседатель ВЛАСЕНКО Наталья, экономика тшауацIыхрала КЧР аминистр НАКIВАХВ Али, промышленностьли хвгIахвтрали КЧР аминистр АРГВЫН Мурат, амлыкв йгьи адгьыл азазаъащаквала КЧР аминистр БУГАЕВ Дмитрий, КЧР апрокуратура, Россия ФССП КЧР-ла а-УнашвахъцIарта ргIащтийыгIвчва, «Росреестр» КЧР-ла а-УнашвахъцIарта анхагIвчва. «Росреестр» КЧР-ла а-УнашвахъцIарта знапIыцIу УРУСОВ Марат айззара апны йызлапшуашыз ауысквала айшыста дгIачважватI. УадыргIвана ауи йзаместительква КАРАКЕТОВА Стелла йгьи ОРДОКОВ Аслан «Росреестр» КЧР-ла а-УнашвахъцIарта асквш 2018 нхарата йакIвнаршаз йгIаквчважватI. Каракетова Стелла йшылхIвазла, асквш 2018 ауацIа акъральгIвчва рымлыкв акъральыгIва кадастр йанырцIара ахъазла ахIвара швъата 18675 гIарадзатI. АкъральгIвчва ртшазынархараква дырхъйауата объект 18223 акъральыгIва кадастр йанырцIатI. Амлыкв шырхъатачIвыру зырцIабыргуа швъа гIапшцIыргарныс 76467-гIвы тшгIарзынадырхатI. Каракетова Стелла ан капитал, ипотека йа датша кредит гIазрысабапта гIвнабзазарта зхвгIаз акъральгIвчва рымлыкв ашвъа йанцIарала нхарата йакIвдыршазгьи даквгIашIастI. Ауи йшылхIвазла, асквш 2018 агIан абанкква рцхърагIарала йатдымрыпауа млыкв зхвгIаз гьмачIгIвым. – ЙагIвсыз асквш абанкква тшырзыназырхаз йрыуата 1312-гIв ипотекала гIвнабзазарта рхвгIатI. УагIата 4597-гIв ипотека анагвындыргIвуаз ан капитал, агIвнабзазарта сертификат ахчаква гIадырбатI, – лхIватI Каракетова Стелла. Ауи йшгIалылкIгIазла, «Росреестр» КЧР-ла а-УнашвахъцIарта тшазыназырхауа йрыуата аэлектронна цхърагIараква гIазрысабапуагьи йрылахIитI. ЙагIвсыз асквш апны а-УнашвахъцIарта аъачIвагIагIвчва электронна квпшыра зму швъата 13626 йрылапштI, асквш 2017 йгIаквухырквын, хвпроценткIла йщардапI. – Аэлектронна амаль ашвъаква рагвныргIвра арыласитI. Ари анархарала ауысква агъьхIчIвуата акъральыгIва власть органква, ашIыпIа хъаунашвахъцIара органква, анотариусква, акредит организацияква, ауыхвара нхарта пхатшаква аргваныта хIрыцынхитI, – йгIалылкIгIатI Каракетова Стелла. Ордоков Аслан йатымпауа амлыкв акадастр хвы шщаквдыргылуа, адгьылква йырзынарху акъральыгIва рхъвыхраква шакIвдыршауа даквчважватI. Ауи йшихIвазла, асквш 2018 агIан адгьылква йырзынархата йакIвдыршаз архъвыхра 532 рагIан адгьыл штаква гIаркIуата, йшакIвым йгIадрысабапуата мыгIвхъгара 276 ашвъа йанырцIатI. АмыгIвхъгараква нзыршаз зымгIва административна джьауап ддыркIытI (къвады ддыршватI). – ХIреспублика апны адгьылква шгIадрысабапуа анхIырхъвыхуа КЧР апрокуратура анхагIвчвагьи гIахIцхърагIитI. Асквш 2018 ауацIа апрокуратура органкви хIунашвахъцIарти юридическа хъата зму адгьылла ахабза мыгIвхъыргата быжьгIаншаракI гIадрыбергьыльтI йгьи джьауап ддыркIытI, – йхIватI Ордоков Аслан. Ордоков Аслан йатымпауа амлыкв акадастр хвы шщаквдыргылуа, ауи йазыразым акъральгIвчва ртшазынархараква йшрылапшуагьи даквчважватI. Ауи йшгIаликIгIазла, асквш 2018 апны йатымпауа амлыкв акадастр хвы йазыразымкIва «Росреестр» КЧР-ла а-УнашвахъцIарта апны йгIаныршу акомиссия 191-гIв тшазынадырхатI. Ауат йрыуата 37-гIв юридическа хъата зму ракIвпI. ЗымгIва шалу 78-гIв ршвъаква йыгьрылампштI, хгIвы ршвъаква дара ртахъырала йхъындырхIвыхтI. – АмакIыраква рапхъала аобъектква ркадастр хвы сом мильуан 3191,83 аъара йнадзун, атшазынархараква йанрылапш амщтахь сом мильуан 2780,4-дза йгIанакъвытI, – йхIватI Ордоков Аслан. Ауи акъральыгIва геодезия рхъвыхраква шакIвдыршауа даквчважватI, асквш 2019 апны ахачIвквагьи гIайхIватI. «Росреестр» КЧР-ла а-УнашвахъцIарта ахъвшара «ФКП «Росреестра» аунашвачпагIв йхъвдаквцIараква зырхъйауа Тоторкулова Динара хIреспублика арайонква, акытква, культура тынха магIны зму аобъектква рмажаква шщаквдыргылуа, йатымпауа амлыквла йзакIу акъральыгIва швъа (ЕГРН) йшанырцIауа гIалхIватI. Ауи йшгIалылкIгIазла, асквш 2018 апны жвизкыткI, муниципальна гIаныршарата хвба, датшагьи агIштакI йырзынарху амажаква ЕГРН йанырцIатI. Ауи йахъазымкIва, Уарп район апны Краснодар край йгьи Къарча-Черкес йрызбжьу амажагьи швъала йдрыбагъьатI. – Асквш 2018 ауацIа культура тынха магIны зму аобъектква йырзынарху жвипщ мажакI щаквхIыргылтI йгьи объект 75 культура тынхата йшпхьадзула ЕГРН йанхIцIатI. АмакIыракIгьи гIанымшауата Къарча-Черкес йгьи Краснодар край рмажа щаквхIыргылтI, – йгIалылкIгIатI Тоторкулова Динара. Ауи датшагьи унашва зхъылцIауа ахъвшара тшазыназырхауа йгIадрысабапуа аэлектронна цхърагIараквагьи сабапрата йрылу даквчважватI, апхъахьыла хачIвква гIалхIватI. Айззара йалаз шагвынгIвызла, амуниципальна гIаныршараква рпны адгьылква йрызарархауа гIашIаркIуаштI, аштаква ашIыпIа бюджетква хъахIара шрызгIаргуаш апшта архъвыхраква дрымчуаштI. «Росреестр» КЧР-ла а-УнашвахъцIарта йгьи КЧР а-Правительства рынхагIвчва ауи гIардахIвра ахъазла баргвыра ъану акыт администрацияква рпны айззараква шакIвдыршушла йагвынгIвытI.