ЛЕНА ЛТОРТКВА

АгIвычIвгIвыс ъачIвагIата тшыззибжьалакIгьи закIгьи зынгьи йыгьчIыдахушым, йдырраква ъагIайрысабапуаш йауаштI. УахьчIва сара швзабасырдырра стахъу сквш 38 йырту АлбыргIан кыт абзазагIв ТIЫКIВА Лена лакIвпI. Лена Гвым кыт ДжьанайргIа МухIамади Гали рунагIва дгIадзынгылтI, йжвбахауа акласс дангIалга Черкесск апны бухгалтер ъачIвагIа дапхьатI. УадыргIвана Ставрополь кытмлыкврхIара академия бухучет афакультет дгIалгахтI, бухгалтер ъачIвагIала цысквша дынхатI. Лылахь ангIацIцI Лени ТIыкIваргIа рычкIвын ХIамзати унагIвара йалалтI, ауаса ауи асквш 2009 АлбыргIан кыт дгIатанагатI. ХIамзати Лени пакIи пхIакIи гIадзындыргылитI. – Санхвыцыз уалагата амацIаура бзи йызбитI. Апхьарта санцуз акъальам йанакIвызлакIгьи йснапIыцIакIын, «сарыпхьагIвхушзапI»-хIва схъвыцуан. УадыргIвана хар счпауа салагатI. ЗаманкI анагIвс хъабра джьащахъвата йаласпауа, ахъабра чпащаква схъыркъьалуа йцатI. Ауыгьи йсъачIвагIахушдзысщун, – лгIагвалашвахраква сыцагIвылшитI Лена. – Сабита хъагIара бзи йзымбауада? Саргьи торт рызсрыдзуа салагатI. Асабиква торт анырзысчпарыз гвыргъьарата йтарцIуз збун, йащтагIайуа ансчпушыз джьащахъвата йрыпшдза шауаш сазхъвыцуан. Ауасамца саланахIватI, стортква збаз йыргвапхан, йсдрычпауа йалагатI. Саргьи ауагIа рразыра лахIваракI гIасыланацIан, азакIи азакIи йапшымкIва йгIасхъвыцуан. УадыргIвана Интернетла акондитер ъазаква рторт ачпаща сапшуа, сдырра йаласырхIауа, ашIыцраква тшырзызбжьауа салагатI, – лхIвитI Лена. Азаман уацымгIвайсра ахъазла закIы уазычпазлара, апсахраква тшрыквуыргIапсра атахъыпI. ТIыкIва Лена абухгалтерра дапхьазтынгьи аторт ачпара дхънакъьалтI, ауи аъачIвагIа лгвы йгIащтIнахитI, йылхъатачIв уысхатI. АунагIва уысквагьи ацлырцауа дынхитI, ауыгьи хъахIара лызгIанагитI, Лена лынхара апны йгIалтахъхуш аъамапсымаква лара йылхвгIахитI, интернетткванква йгIадылрыщтиитI. Черкесск къала йазалхта йаъу аткванква дцазапытитI. Ауат шгIалрысабапуаш, атортква шылрыпшдзуш амастерклассква дырпшуа тшырзылбжьитI, шIыцрата йгIаншауа тшгьахьлыршвум. Лена лтортква уанырпшра напIы ахьыста йгьудырам, зны йызшIашваз йгIванхауа йащтагIамиуата йыгьгIанхум. АуагIа ргвыргъьараква – йанйыз амшква, атацанадылраква, айгвабараква йырзынархата йылчпитI. Ауи агIан ахIбачва, унагIвара йалалуа, айгвачва радгылра, апхIвыспа чкIвынква, ачкIвынчва, асабиква йырзылрыхIазырыз атортква дара йрыквыргIапста асурат джьащахъваква рнылцIитI. СуратчпагIвкI йапшта Лена тортипхьадза ршIыйарала дадгылитI. Ауи лтортква ршIашватI АлбыргIан, ЙынджьыгьчкIвын, ХIабаз район йаланакIуа акытква рбзазагIвчва. Черкесск, Ставрополь рпынгьи лхабар ргIата йлызгIайыз аъапI. ТIыкIва Лена бзидздза йылбата тшыздылкIылыз ауыс лгвы йъацчпу акIвзапI йызгIалдахIвуа. Ауи лторт зшIашваз хIвахIврата йылзырхIваз, ажва пхата йылзынадырхаз АлахI йгIалпигалхтI, ахъагIара джьащахъваква ззылчпуш ахайырква лщардазтI