ЛАГЪЬ КIАВКIАЗЛА ЙАПХЪАХАУА НХАРТАПI

Къарча-Черкес йгьи Черкесск город рымшква андыртлапIуз атшын хIреспублика апны Лагъь КIавкIазла йапхъахауа нышвкъварахчарта йгьи ауи адынхалрала завод гIахъыртIытI. Анхарта шIыц агIахътIра йазынархаз айззара йалан КЧР а-Хъада ТЕМРЕЗОВ Рашид, ЖКХ гIаршIыцхрала а-Фонд аунашвачпагIв ЦИЦИН Константин, Черкесск город амэр ТАМБИ Руслан, КЧР а-Правительства анхагIвчва, Прикубань район администрация агIащтийыгIвчва, аэкология хчара йадкIылу апхьагIвчва, астудентква. Темрезов Рашид Черкесск город адзхъа анышвкъвара адынхалрала завод руыхварныс шщаквдыргылыз, апроект абзазара йшаларжьыз йгIайззаз ахайыргIвазатI. Ауи йшгIаликIгIазла, хысквшала утхъахта Санкт-Петербург йакIвшаз аэкономика форум апны ЖКХ гIаршIыцхрала а-Фонди Къарча-Черкеси ангIалра адырчпалтI, аэкология а-Сквш апны азавод ауыхвара йалагарныс йагвынгIвытI. ХIкъраль аэкология хчара йазынархата Россия а-Президент Путин Владимир йлихыз ахачIвква дырхъйауата мараташварта тланыкъвала Черкесск уаналцIра йаныргIалыз апсабара йазарархуз анышвкъваракIапсарта хъддыргIвахтI. Заман айшысла азавод йапхъахауа акьазу руыхватI. Цицин Константин йшихIвазла, анхараква ауыла йгьалымгатI. – ЙгIвбахауа акьазугьи араъа йхIуыхварныс хIмурадпI. Азавод шIыц агIаныршара йазынхаз ауыхвагIвчва анхараква йырзалхыз апIатла швъатымцIыз ахъазла сшвзыразпI. Европала йгIадрысабапуа анышвкъвара адынхалрала азаводква йыршIырпшыта йшвуыхватI, – йхIватI Цицин Константин. Темрезов Рашид йшгIаликIгIазла, ЖКХ гIаршIыцхрала а-Фонд ацхърагIарала хIреспублика ауагIа рбзазара агъьчIврала псахрата йыншахьу гьмачIым. – ЙшварагIвараз атыдзква рпны йбзазуз гIвнабзазарта рзалхра апны ЖКХ гIаршIыцхрала а-Фонд гIахIцхърагIатI. Къарча-Черкес ари анархарала апрограмма апны асквш 2012-дза йгIарбаз ахачIвква дахIврала йалзыргаз асубъектква йрылапхьадзапI. Ари азавод хIкъраль йгьи хIреспублика аэкология аъаща агъьызчIвуаш апроект пхатшаква йрыуапI. Анышвкъвара адынхалра йаквыргIапсу азавод шIыц Лагъь КIавкIазла йапхъахауата йгIаншаз нхартапI. Ауыгьи гвщтIыхра гIауыланацIитI. Араъа йгIайззаз аэкология акцияква акIвзыршалауа чкIвыныргIа хIышта апсабара ахчара къару ъалашвцIауа ахъазла сшвзыразпI. Швара йшвапшу рбзирала Къарча-Черкес къагIитI, апсабара йазарархуш швхIаусыгIва гьгIаншум. ХIреспублика йцкьу, йпшдзу, йтынчу хIкъраль аштаква йъарылапхьадзу гвщтIыхра гIауыланацIитI. Аэкология зхчауа чкIвыныргIагьи анхарта шIыц гIаныршара йадынхалыз ауыхвагIвчва гвыпгьи сшвзыразпI,–йхIватI Темрезов Рашид. Ауи хIреспублика агIвнабзазарта - коммунальна млыкврхIара гIаршIыцхра йгьи аэкология хчара йъарыцикIуа рыхъазла Цицин Константин «КЧР-ла гIатгара зму ЖКХ анхагIвы» ЧIахIра хьзы йквнайыргатI. Тамби Руслан дангIачважвуз йшгIаликIгIазла, азавод шIыц ауыхвара Черкесск город аэкология аъаща зырбзиуаш амальква йрыуапI. – АкъральыгIва, агород властьква, ахъатачIв бизнес рацынхара абзирала хIреспублика апхъала йчIвырхъитI. Анышвкъвара адынхалра йаквыргIапсу азавод уыхвара араъа швапхата йъанамхъауа гьаъам. Байарата АлахI йгIахIитыз адгьыл, адзы, ахIауа хIсабиква рыхъазла йхIхчарныс дзачIвызлакIгьи йхIборчпI,– йхIватI Тамби Руслан. Цицин Константин йшгIаликIгIазла, апхъала йцIасыз йшвапху атыдзква ЖКХ артшхъвага рквнаргара хабза атагIащтIырххтI. Ужвы ауи аргвышхвага согIа аэкология хчара йазынхауа ауыжвгIанчIви нхартаква йырквнадыргалуштI. Уыхварала Россия а-Министерства йгьи ЖКХ гIаршIыцхрала а-Фонд йгIащаквдыргылхыз артшхъвага Цицин Константин азавод шIыц аунашвачпагIв Чехов КIазбек йыйттI. АгIачважвараква рымщтахь «Ирбис» зхьзу СКГГТА аэкология мгIвайсра йалу астудентква азавод шIыц анхара джвыквыржьырныс йрызхъарцIатI. Анхарта ангIахъыртIы асасчва анышвкъвара адынхалра апны йгIадрысабапуа атехника ддырбатI, азавод ауацIа шаныргIалу йапшытI. Черкесск город апны йазыркIкIуа анышвкъвара азавод шIыц йадыргалуаштI, сквшыкI тонн 40000 ауаъа йадынхалуаштI. АъачIвагIагIвчва йшгIалыркIгIазла, азавод абзирала аполигон апны йщтIадрызлуш анышвкъвара процент 27-ла йалдзгIуштI йгьи анышвкъвара адынхалра апсабара йгьазарархушым. ХIреспублика йгьи ЖКХ гIаршIыцхрала а-Фонд аунашвачпагIвчва шагвынгIвыз апшта, апхъахьыла ауаъа йгIвбахауа акьазу руыхварквын, анхара тыпквагьи гIаншуштI. УахьчIвала азавод шIыц апны уагIата 90-гIвы райхIа нхитI.