ЛАГЪЬ КIАВКIАЗ АТРАНСПОРТ АТШАУАЦIЫХРА

Сентябрь а 26 СКФО-ла РФ а-Президент йгIащтийыгIв МАТОВНИКОВ Александр Ингвыщ Республика аквта Магас апны алачIвара акIвйыршатI. АлачIвара СКФО йаланакIуа ашIыпIаква рпны атранспорт инфраструктура атшауацIыхра йапщылу ауысква йырзынархан. Матовников Александр алачIвара гIахъитIуата йшгIаликIгIазла, Лагъь-КIавкIаз Федеральна округ аэкономика ахъазла атранспорт индустрия рахIа змагIны дуу ахча гIалцIыртаква йрыуапI. СКФО ауацIала айха мгIваква километр 2-н зыкь гIарыцIаркIитI, автомобиль мгIваква – километр зыкь 86 райхIа. Каспий тенгьыз апны рахIа хъгалра зму атранспорт коммуникацияква йрыуапI Махачкала тенгьыз хвгIахвтра порт. Ауи «Север – Юг» дуней транспорт коридор йаланакIырныс лшара амапI. СКФО ауацIала аэродромта быжьба аъапI. – Ага ауаса йаъазтынгьи, уахьчIвала атранспорт йгьи ауи аинфраструктура рнадзара угьарыразуам. АуыжвгIанчIви транспорт-логистика квтаква рнамхъара, йажвыз атранспорт айха мгIвала атрыпара уысква ртшауацIыхра гIашIаркIитI. Афедеральна мгIваква райхIара йщардахаз атранспорт ныкъвара йгьаквыргIапсым. Ауи йгIалцIла амгIва пхастаква йрылахIитI. Махачкала тенгьыз хвгIахвтра порт транспортла уызладгылуаш амгIваква ъанамхъауа, агъбаква ъажвыз йгIарылцIла атенгьызла ахIатла пкъыгIваква ратрыпара йалдзгIитI. Аэропортквагьи агIаршIыцхра йазыбжапI. Авиация сеть ъаным йгIалцIла аокруг асоциальна-экономика тшауацIыхра тащахІахитI. Россия а-Президент Путин Владимир дгIачважвауата йшгIаликIгIазла, ГIвадахь Россия апны атранспорт ргIапсща атшауацIыхра агIвадахь шIыпIаква йырхъазымкIва, хIкъраль шабгу асоциальна-экономика апхъаламгIвайсра зпщылу йалачпу хачIвыпI, – йхIватI Матовников Александр. СКФО-ла РФ а-Президент йгIащтийыгIв аокруг йаланакIуа ашIыпIаква рвласть органква афедеральна органквагьи рыцта йызлапшыз ауысква рырхъйарала ражванахъаква гIаргырныс рыхъвдаквицIатI. Лагъь КIавкIаз ауысквала РФ аминистр Чеботарев Сергей, транспортла РФ аминистр йапхъахауа йзаместитель Алафинов Иннокентий, а-Федеральна мгIва агентства аунашвачпагIв Старовойт Роман йгьи атранспорт уысква рхъпшылрала а-Федеральна къвырльыкъвхарта аунашвачпагIв йзаместитель Ахохов Асланбек рведомстваква СКФО ашIыпIаква рпны атранспорт ргIапсща йгьи аинфраструктура ртшауацIыхрала амальта йнарахвуа йгIаквчважватI. Магас йакIвшаз алачIвара йалаз хIреспублика а-Хъада Темрезов Рашид Къарча-Черкес ауацIала атранспорт инфраструктура йгьи атранспорт уысква радгалра шакIвшауала доклад гIайчпатI. – ХIара хIыхъазла амгIваква хIреспублика йагIарбагапI, хIкурортква рысасчва рнашхгьи, ужвыгьи йгIайырныс ртахъырагьи ауат раъаща акIвпI йызпщылу. АмгIваква рнадзара хIреспублика абюджет йайхIу хъахIарата йазалуа атуризм индустрия йацхърагIитI, ауи йахъазымкIва, аэкономика отраслькви аквтанай йгьи йхвыцу ахIаракьатчпари ртшауацIыхра йахъвитI, – йгIаликIгIатI Темрезов Рашид. Ауи йшгIайхIвазла, транспортла РФ а-Министерства йгьи «Росавтодор» рцхърагIарала йцIыхъвахауа асквшква КъарчаЧеркес ауацIала шIыпIа йгьи межмуниципальна магIны зму мгIвата йдырчIаджьыз километр 124 гIарыцIаркIитI, федеральна магIны рымата – километр 450. ЦхIата йгьи цхIа хъысыртата быжьба гIадыршIыцхтI. ХIшIыпIа аунашвачпагIв атенгьыз КвайчIва йазцуш «Кисловодск–Черкесск–Адлер» мгIва ауыхвара шатахъдзу Ставрополь край агубернатор Владимиров Владимиргьи йшацIикIуа гIаликIгIатI. РФ а-Правительства а-Председатель Медведев Дмитрий йхъвдаквцІара дырхъйауата Лагъь КIавкIаз ауысквала а-Министерства, «Росавтодор», Ставрополь край йгьи Къарча-Черкес рунашвачпагIвчва ауи ауысла апроект йадынхалитI. Матовников Александр йшгIайхIвазла, ауи апроект Россия а-Президент Путин Владимир дахайыргIвазатI, хIкъраль аунашвачпагIв ауи йгвапхатI. АлачIвара апны апроект йацызкIыз Ингушетия а-Хъада Евкуров ЮнусБекгьи атенгьыз КвайчIва йазцуш амгIва ЛагъьКIавкIаз Федеральна округ абзазагIвчва Краснодар край акурортква рцарала рзаман шгIанарайшысуаш гIаликIгIатI. ХIызту асквш Архыз йгьи Домбай турист шIыпIаква уанцауа Къвбина дзыгIв йхъысуа пщбата йалыцIуа цхIа ду руыхватI. «Черкесск–Домбай» А-155 трасса й-96-хауа акилометр апны Теберда дзыгIв йхъу ацхIа арчIаджьра мызкIи бжакIила рыцІа ласыта йалдыргатI. ЙгIайуа амыз Мурудж дзыгIв йхъу ацхIа акапитальна рчIаджьра йалгуштI. Арат ацхIаква «Домбай» щхъа-тларыджа курорт йадзхъапI, атуристква ауаъа тынчта йнадзарныс ахъазла рмагIны дупI. Къарча-Черкес ауацIала атуризм рыцIагьи тшауацIнахра ахъазла Архыз йгьи Домбай федеральна магIны зму автомобиль мгIвата йрызцауа йрыуата километр 89 дырчIаджьырныс йгьи метр 309 зуру искусственна мгIва уыхварата жвба ргIаршIыцхра хачIвыта йрымапI. «Медовые водопады» турист комплекс азыгIальаматра азызбауа рпхьадзара йъалахIауа йгIалцIла «Развитие внутреннего и въездного туризма в Российской Федерации» федеральна программа апкъ йтата КъарчачкIвын район апны 7,5 километр зуру «Конзавод–Коммунстрой–Медовые водопады» автомобиль мгIва агIаршIыцхра акIвшатI. Йара ауи апрограмма апкъ йтата хIызту асквш «Дукка–Пхия–Кислые источники» мгIва атранспорт йгьи аинженер инфраструктурала апроект йадынхалитI. Ауи амгIва Уарп район апны аминерал дзгIацIцIыртаква ъаныргIалу ашIыпIакви «Архыз» курорти аднакIылуаштI, асквш ауацIа йапымшвтуата атуристква ргIайра йацхърагIуштI. Датшагьи йапшым акъральыгIва программаква рбзирала асквшква 2018–2019 руацIа 9,5 километр гIазцIазкIуа автомобиль мгIвата быжьба гIадыршIыцхуаштI. «Асквш 2024-дза Россия Федерация атшауацIыхрала ауагIахъа йгьи астратегия хачIвква руысла» РФ а-Президент й-204- хауа й-Унашвала хIреспублика «ЙшварагIвараду йгьи знадзара хIагIу автомобиль мгIваква» уагIахъа проект абзазара йалажьра джвыквнацIатI. Магас йакІвшаз алачIвара апны датшагьи ЙазакIу алхраква рымш ацIыхъвагIарбараква йгьи СКФО ашIыпIаква ацифра телебара йшазыхIазыру йрыквчважватI. Йызлапшыз ауысква зымгIвала ащаквыргылраква нарахвтI.