КЪРАР РЫМАТА РБОРЧ ДЫРХЪЙАТI

Афганистан совет рхъвква гІатырдахищтара йцІыз асквш 30 йазынархата Черкесск город йгьи ареспублика квтанай апхьартаква рапхьагІвчва суратгІврала йгьи ралацІараквала йанкъвакъвтІ. Черкесск городла йагъьта тшгІазырбаз асабиква пхата драйхІвахІвтІ йгьи адипломква рквнайыргатІ Россия Афганистан аветеранква радкІылара КЧР-ла ахъвшара апредседатель МАМЧУЕВ Исса. Ауи акІвымкІвагьи, йгІадзынгылуа чкІвыныргІа рпатриот бжьара къарута йаларцІауа гІарпхьадзауата амузей уыжвгІанчІви история хъвшара аунашвачпагІв Джьгватан Ирина йгьи «Афганская война» экспозиция зрыхІазырыз амонтажник Шрамко Юрий артшхъвага грамотаквала йгІалыркІгІатІ АлацІара гІврала йапхъахауа гыларта гІатылгатІ й-10-хауа аквтанай апхьарта апхьагІв КОЧКИНА Надежда, йгІвбахауа йгьи йхпахауа гыларта – йара ауи апхьарта апхьагІвчва РАМАРЧУК Полина, ФРОЛОВА Людмила. Йара ауи атшын Афганистан айсра йазынархата Къарча-Черкес Республикала йаныргІалу апхьартаква рапхьагІвчва руацІала йакІвшаз анкъвакъвра агІарбараквагьи гІарпхьадзахтІ. Ауат рпны йагъьта тшгІазырбаз йрайхІвахІвырныс амузей йгІадгылтІ арыпхьарали наукали КЧР аминистр лзаместитель БЕКИЖЕВА ФатIима йгьи Мамчуев Исса. АлацІараква згІвыз апхьагІвчва рпны йапхъахауа гыларта Привольна кыт квтанай апхьарта й-5-хауа класс апхьагІв САРИЕВА Милана йгІатылгатІ. Ауи «С честью выполнили долг…» зхьзыз лгІвыра апны Афганистан айсра зыла йыцІсыз лаба дгІайыквчважватІ йгьи адгьыл ахъахь апны амамыр ахв магІныта йаму гІалылкІгІатІ. Красный Курган кыт аквтанай апхьарта апхьагІв КОРКМАЗОВА Асйат йылгІвыз алацІара йгІвбахауа гыларта гІатнагатІ, йхпахауагьи – Черкесск город й-17-хауа Гимназия апхьагІв КЪАРДАН Элла йылквнадыргатІ. Ажюри йалаз йшырхІвазла, Афганистан айсра йазынархата асабиква йдырхъйаз асуратква зымгІвагьи ухъа утадырхъвыцуата акІвын йшаъаз. Айкьангьашра ауыраква рымщтахь йапхъахауа гыларта Красный Курган кыт аквтанай апхьарта апхьагІв БИДЖИЕВА Милана, йгІвбахауа – Зеленчук станица й-1-хауа аквтанай апхьарта апхьагІв АБИСИЛОВА Аминат, йхпахауагьи – Къарча город й-4-хауа аквтанай апхьарта апхьагІв ЛАЙПАНОВА Армида йырквнадыргатІ.