кОмсОмОл – Оьмирлик тарЫЙХта

2018 йылдынъ 29 октябринде кыралымыз комсомолдынъ 100 йыллык мерекесин белгилеек. ВЛКСМ-нынъ 100 йыллыгын байрамшылавга аьзирленуьв РФ Президенти Владимир Путиннинъ 2016 йылдынъ 1 декабринде Федераллык Йыйынына аьр йыллык Ой-хатында айткан тапшырувы ман озгарылады. Савлай Россияда, сонынъ санында Карашай-Шеркеш Республикасында мерекеди озгарув бойынша уйгыншылык комитетлер туьзилгенлер. Оькиметлик миллет библиотекасы йыл бойында бир кесек тематикалык выставкаларды уйгынлаган, библиотуьннинъ калыбында «Комсомол ман айырылмаякпан – оьмирлерге яс болып калаякпан!» билдируьвлик-юбантув амаллама озгарылган. Тоьгерек столда тарыйх илмилерининъ докторы Мухтар Магометович Бекижевтинъ «Сквозь ветры яростных атак» деп аталган янъы китабынынъ презентациясы озды. Китап комсомолдынъ 100 йыллыгына багысланган. Китапта яс-явка организациясы акында хабарланады. Онйыллыклардынъ бойында ол коьплеген совет аьдемлерининъ аркалары уьшин яшав мектеби болган. Ол Элимиздинъ баьтирлик тарыйхына уьйкен косым эткен. Бу организация кыралымыздынъ эм халктынъ бактысы уьшин тынышсыз яс-явкады биргелестирген. Китаптынъ бетлерин актара келип, оьмирдинъ «тынысын» сезбеге болады. Амалламада КЧР Халк Йыйынынынъ (Парламентининъ) депутатлары, КЧР маданият министри Рамазан Бороков, КЧР миллетлер ислери, коьлемлик коммуникациялар эм баспа бойынша министрининъ орынбасары, аьлимлер, язувшылар, журналистлер, СМИ-лер етекшилери катнастылар. Амалламадынъ конаклары эм катнасувшылары уьшин «Комсомолдынъ данъклы йолы» китап-иллюстрациялар выставкасы, «Карашай-Шеркеш ерининъ комсомолшылары – Уллы Аталык кавгасынынъ баьтирлери» деп аталган эм оьзге тематикалык выставкалар уйгынланган эдилер. Документальли фильм коьрсетилди, комсомол йырлары занъырадылар. Библиотекадынъ куллыкшылары комсомолдынъ мерекесине «Кавга ман уйытылган сыдыралар» («Строки, опаленные войной») деген йыйынтыкты аьзирлегенлер. Онда бизим ердеслеримиздинъ – Уллы Аталык кавгасынынъ катнасувшыларынынъ 200-ге ювык хатлары киргистилгенлер. Олардынъ коьбиси сол заманларда комсомолшылар болганлар