ХIЫБЫЗШВА ДДЫРДЫРИТI

СквшигIадза май ангIадзара асабигIзартаква рынхагIвчва гвалагIваласра рылапI. Ауат щарда йыздынхалыз, йапхъахауа згIатгараква йрайгвыргъьауа ахвыцква асабигIзарта йгIалгитIта апхьарта йырщтийитI. Псыжв йаныргIалу «Звездочка» сабигIзарта йгIацIцIуаз асабиквагьи гвыргъьахъв рзадыргалтI. АбжьагIвчва МАХВА Эльвира йгьи КIЬАШВАУА Линда йырбжьаз ахвыцква швабыжта йрызгвапан. Асабиква рбжьагIвчва ауысаква рзынадырхатI, йдрыхIазырыз агIахIвраква гIадырбатI. Ауат амультфильм йалу афырквагьи йрынйатI. Агвыргъьахъв йалаз Буратино апхьара магIныта йаму гIайгвындыргIвын, портфель йырттI йгьи адырраква ркъраль ддрайгватI. Агвыргъьахъв апны йгIачважваз асабигIзарта аунашвачпагIв МАЛХIВАЗ Маргарита Сальымгьари йпхIа зымгIвагьи згIвадара шырзылтахъу лхIватI. – Апхьарта шваныцIалрагьи асабигIзарта апны швыззырбжьаз швх ъшвымраштылын. ШвыгIвзачва ргвы швамсын, бзита швапхьа. Анчви абачви швунагIваква тынчызтI, уахьчIва швшгвыргъьауа апшта швынцIра ауралагьи швнашх щтIыхызтI, швылшараква дууызтI, – йгIалылкIгIатI МалхIваз Маргарита. ЙуанргIа Назими Аси Черкесск йбзазитI, ауаса рпа Дамир «Звездочка» сабигIзарта дыргитI. Ауи сынчIва апхьарта дыцIалуаштI. – ХIунагIва апны абаза бызшвала хIчважвитI. Ахвыцква асабигIзарта йанджвыквылра рыбызшва надрыскIьитIта урышв бызшвала йчважвауа йалагитI. ХIара хIсабиква рыбызшва рдырра ахъазла «Звездочка» сабигIзарта йгIагIгтI. Араъа абжьагIвчва амш шабгу асабиква абазала йрачважвитI, – лхIвитI Йуан Ася. Ахвыцква ранчви рабачви асабигIзарта анхагIвчва швабыжта йырзыразпI. – УахьчIва сара гвалагIваласракI сылапI. СынчIва хIпхIвыспа Алина апхьарта дцуштI. АсабигIзарта дъадзагIайыз асквшква руацIа зынгьи хIыгвква гьбжамызтI, абжьагIвчва хIсабиква къару щарда рыквдрыдзтI. Агвыргъьахъвква радгалра джьауапкIрала йадгылитI. ЙанакIвызлакIгьи шIыцракI, джьащахъваракI гIархъвыцитIта асабиква хъыркъьалитI. АсабигIзарта анхагIвчва зымгIва сырзыразпI, –лхIватI Гимай Земфира. «Звездочка» аунашвачпагIв МалхIваз Маргарита йшылхIвазла, сынчIва асабигIзарта пщгвыпкI гIацIырщтитI, ауат 77-гIв йнадзитI. ХIапхъалагьи сабита 60-гIв рызгIайуашта йгвыгъитI. – Анчви абачви щымта рыгвква тынчта рсабиква хIызгIаныржьра хIазынхитI. Асаби амш шабгу араъа данаъазара ауи азаман джьащахъвата йшигуш хIащтапI. Ахвыцква тхэквондола, ангьльыз бызшвала, гIахIврала атшыбжьараква хвыдъа йцарныс рылшитI. РыцIа йхъаду – амш шабгу абаза бызшвала йчважвитI. АбжьагIвчва зымгIва абазала йчважварныс хачIв хъадата рпахь йгылапI. ХIара асабиква хIыбызшва дхIырдырра йалкIгIу гватра азалхIхитI, – лхIвитI МалхIваз Маргарита. Ахвыц йапхъахауата йани йаби йыцымкIва дъагIанхауа асабигIзарта апны дзынйуз ауагIа ракIвпI ауи ажвлара «дачIвыта» дызчпауа. Ари асабигIзарта йтшкIару асабиквагьи абжьагIвчвагьи тгIачвата йаларпапI, ахвыц йыбызшвала дчважвауа, ауи бзи йбауа дырбжьитI. Асабиква йыртахъу зымгIва ъанахъауа, хъагIата, чIащыгIвата йъадырчауа, йгвапу абжьагIвчва ъарыцу апны ртшауацIыхра йазхIитI. Апхьарта йнардасыз ахвыцква ари асабигIзарта пхата ргвы йшгIатахуш йазхъахIцIитI.