ХIУАГIАХЪА РЫЛАХЬ ГIАЗТПШУА АГIАЦIЩТРА

Абаза бызшвала йгIацIцIуа агазет аюбилей артлапIара – ауи зтшын йгIаншаз йгIашIарышвта йадгIапсалыз зымгIвагьи разыра ажва рзынауырхарныс швхIаусыгIва бзипI. УахьчIва, ауыжвгIанчIви технологияква анщардаха, зымгIвагьи Интернет гIадрысабапуа тшанырбжьа, агазет агIацIщтра джвыквызцIаз ахIбачва ауи гIапсарата йадырбалыз уыла йгIацIаужьхырныс баргвыпI. Ага ауаса йаъазтынгьи, абаза бызшвала йгIацIцIуа агIацIщтра йахъыцIыз асквш 80 анхIыртлапIауа ауи мгIвата йгIамнадаз, йапшым асквшква рагIан йадынхалыз рыхьызква апхьагIвчва йгIадхIыргвалашвахра атахъыта йазыгIбитI. Йапхъадзахауата хIыбызшвала йаныргIалыз агIвыраква латин графика йтагылата асквш 1933 агIан «Черкес пльыж» газет анапаква йгIарнылтI, УАЗ Дауыт КвайчIва йпа ауи агазет абаза хъвшара даунашвачпагIвын, абаза журналистика ащата щтIацIарала уыс ду йырхъйатI. СквшыкIла ауи апхъала ауагIа рарыпхьагIв ТОБЫЛЬ Тольыстан Закьарыйа йпа латин графика ащатала йгIанйыршаз алфавит гIазрысабапуаз агIвгIвчва шIаква йапхъахуз ргIвыраквагьи гIаншауа йджвыквылхьан. Асквш 1938 йгIашIарышвта ауагIа рахIварала алатин алфавит кириллицала йырпсахтI. Тобыль Тольыстан аурышв алфавит «лаба» алайцIан, абаза быжьква зымгIва гIанарбауата, уахьчIва йъагIадзаз йгIахIрысабапуа алфавит щаквгылтI. Абаза уагIахъа ртурых абгъьыцква дрыпшдзитI йапхъахуз ажурналистква рыхьызква Квырджь Умар, Ерыжв Умар, Эгьдза МхIамат, Шармат Михаил, Уаз Дауыт, Меремкъвыль НыхIв, МалхIваз Мурадин, Джыр ХIамид, Дарымва Умар. Ауат рынхара джыпхакI йтагылтI акIвын, Абашта айсра Ду гIалагатI, даргьи ркъальам абджьарла йырпсахра атахъхатI. Абашта агIархвитра йазгылата зхъа щтIазцIаз ажурналистква Меремкъвыль НыхIв, Егьдза МхIамат, Дударыкъва ХIаджьгьари, ТхIайцIыхв ДаткIа, МалхIваз Мурадин, Шармат Михаил рыхьызква абаза гIвыра атурыхгьи, ауагIахъа турыхгьи анцIрала йгIарылахатI. Совет уагIа АйгIайра ангIатырга афронт йгIапшцIыцIхыз хIыгIвычIвгIвыс гвымчIваква Джыр ХIамид, МалхIваз Фуъад, Наша Умар, Махва Санйат, Агырба Джьамльадин, Ерыжв Умар, ХIачвыкъва ЗамахIщари, КIвыдж ШахIым, КIьыщмахва МухIаджьыр, Цекъва Пасарби асквш 1945 ноябрь агIан агазет агIацIщтра джвыквырцIахтI. Ауат кьангьашагIвта, ргвышхвагIвта йырзалуан Уаз Дауыти Квырджь Умари.