ХIГВБАЙАРА ЙАГIВЫГАПI

Псыжв кыт апны сквшщарда зхъыцIуаз аклуб аъаща шамудзахуаз гIарпхьадзауата Абаза муниципальна район администрация атшазынархарала хIреспублика аунашвачпагIвчва культура Тыдз шIыц ауыхвара «Устойчивое развитие сельских территорий на 2014–2017 годы и на период до 2020 года» къральыгIва программа йаланадыркIтI. Заман айшысла уыжвгIанчIви квпшыра зму ауыхвара акыт аквта апны анцIрала йгылазшва пшдзата тшаннаргIалтI. Асквш 2018, февраль а 27 агIан йгIахъыртIыз Псыжв кыт акультура Тдзы уахьчIвала дахIврала йынхитI. Ауи адиректор ДЖЬАНЫМБЕЙ Алик Щорс йпа йшихIвазла, абзазагIвчва зымгIвагьи ауыхвара шIыц швабыжта йайгвыргъьитI, йыргвапата йакIвшауа ауысква йрылазлитI. АунашвачпагIв йшгIаликIгIазла, апшырта зал чIвартата 300 гIвнагылапI, аршIыйагIвчва ъагIвнанхуш, грим ъарчпуш апещква алачпапI. – Аклубква йанакIвызлакIгьи акытква рпны акультура аъаща йагIвыгата йгIамгIвайситI. Культура Тыдз шIыц ъахIзыруыхваз ахъазла КъарчаЧеркес Республика а-Хъада ТЕМРЕЗОВ Рашид йгьи Абаза район аунашвачпагIвчва швабыжта хIырзыразпI. УахьчIвала араъа гIахIвыгIвчва гвыпта гIвба нхитI – ахIбачви рыцIа йайцIбачвуи. Адоул асыгIвчви акъвабызчква рансамбльи йапшым аконцертква рагIан йызнымкIва разъазара гIадырбахьатI. Ауат йрыдынхалуа Гобозов Таймурази ЧквтIу Оксани швабыжта йнардзата ашIаква йрыдынхалитI. ХIкультура Тдзы апны агIахIвыгIвчва збжьауа Джьардис Аскьарби зуыс цIолата йыздыруа аъачIвагIагIвчва дрыуапI, сара сызлу «Абазги» ансамбль атшыбжьараквагьи йара араъа йакIвхIыршитI. УахьчIвала акультура Тдзы йынхауа зымгIвагьи швабыжта хIхъа аладухитI хIкытлагIв, РСФСР-ла гIатгара змаз артист Ерыжв Зули лыхьыз ъанкъвнагауа йгьи йгIахIырцIабыргырныс хIащтата хIынхитI, хIапхъала йынхаз ахIбачва йдырхIаз ашвапха байагьи гIахIрысабапитI. Абзазара йгIалалуа ашIыцраквагьи хъара хIгьырчвгылуам. Асквш шIыц, МартI а 8 йырзынархата абзазагIвчва рыхъазла йакIвхIыршаз аконцертква Абаза муниципальна район артистква ъагIалалыз ахъазла швабыжта сырзыразпI. ХIапхъахьылагьи зыхьыз бергьльу ашвахIвагIвчва Меремкъвыль Ачар, Напщ Аминат, ЛагIвычв СултIан, Шармат Гурам, «Абазги» ашвахIвагIвчва гвып датшагьи артист щардагIв злу концерт абаза кытква зымгIва рпынгьи хвыдъа йакIвхIыршара хIгвыгъапI. Абаза район аунашвачпагIвчва рцхърагIарала агIахIвыгIвчва гвып рыхъазла ауагIахъа фашаквагьи мачI-мачI йыгIдзахитI. Ауысква йшхIылшауа апшта йащтахIщтийитI, ХIашвцIа Аслан дыздынхалуа ашвахIвагIвчва чкIвынква йапшым анкъвакъвраква рпны бзита тшгIадырбарныс йахадзатI. ХIапхъахьыла «Драйв», «Магия танца» республика анкъвакъвраква хIрылазларныс тшхIрыхIазыритI. Акыт апны гIвапхьартакI, гIвсабигIзартакI, ршIыйара апхьартакI нхитI. Ауаъа йапхьауа асабиква рыхъазла абаза бызшвала йатакIу амультфильмква ргIарбара, хабзахчарала йапшым аъачIвагIагIвчва, арыпхьагIвчва, акыт гIаныршара ахъада Тобыль Мурат злу атерроризм йапшIагылуа айчважвараква адыгIгаллитI. Акыт абзазагIвчва-ахIбачва рыхъазла хIапхъахьыла ахвашаквала ахудожественна фильмква ргIарбара йапщылу ауысква уыжвласыла йалхIыргара хIгвыгъапI. Уыста йгIащтIыхIхлакIгьи абзазагIвчва зымгIвагьи йацыркIитI, акультура Тдзы йаргванта йаныргIалу Абашта айсра Ду йаладзыз рчвахъабага йанакIвызлакIгьи цкьата йынкъвыргитI, – йхIватI Псыжв кыт акультура Тдзы адиректор. Джьанымбей Алик йара апхьарта дапхьаркIвауата, асквш 1996 агIан зыхьыз бергьльу акомпозитор ЧквтIу Владимир йбжьуз «Абазги» ансамбль дрылалтI. Апхьарта амщтахь Ставрополь юридическа институт Черкесск городла ахъвшара дгIалгатI. Ауи амщтахь ар къвырльыкъв йхатI, Черкесск городла «Электрические сети» дынхатI, уахьчIвала хвысквша цIитIта Псыжв кыт акультура Тдзы унашва ахъыцIитI йгьи йгIайдахIвитI. АъачIвагIагIв шIаква ргIадзныргылра гьуыс майрам. Абаза уагIахъа ркультура, рыбызшва, рлитература, ржурналистика апхъала йызрымгIвайсуаш чкIвыныргIа зыргвышхвауа зымгIвагьи ажва пшдза щарда рквнагата йспхьадзитI. Псыжв кытла йахъазымкIва зыхьыз бергьльу аршIыйагIвчва ЧквтIу Владимир, Джьардис Аскьарби, Къраль МухIарби, ХIачвыкъваргIа Ращид, Аминат, КарасовргIа Асльани Къапльани датшагьи щардагIвы ршвапхала йгIадзынгылыз ари ачкIвын гврыхва йгIайызхъарцIаз ауыс джьауапкIра дула дадгылитI. Йхъапщыла Инги йари йрыгIзауа рыхIвсса чкIвынква Саиди Лаури ъагIадзынгылуа акыт акультура шхIаракIызлуш йазабакIуа ари ачкIвын ймурад пшдзаква зымгIва гIайдахIвыргIатI