«ХІАРА – РОССИЯ ХІАКЪРАЛЬГІВПІ»

Россия а-Мш йадахІвуата АдыгьахІабльа асаби ршІыйара Тдзы апны «Мы – граждане России» зхьзыз гвыргъьахъв адыргалтІ. Ауаъа Россия МВД МО «АдыгьахІабльа» хъвшара аъачІвагІагІв Каракаева ФатIима, Апсуа йгьи Садова кыт гІаныршараква рхъадаква рзаместительква, збальыгъ йнадзаз чкІвыныргІа рпаспортква рырттІ. Ан-абачва зцыз акъральгІв шІаква МАМЕДОВ Руслан, МАМЕДОВА Залина, КІВЫЖДЗА Амир йгІарыртыз ашвъа зджьара йгІанымхауата йайгвыргъьатІ. – УахьчІва йнанаркІыта швара Россия атшауацІыхра йазынхуш къральгІвта швалтІ. ХІара йазхъахІцІитІ Конституцияла йрыбагъьу швхвитнагІакви швхъвдаквцІаракви мыгІвхъжвымгауата йшвылшауа шшвырхъйуш, – йхІватІ анабачва рыхьызла йгІачважваз КІвыждза Ращид. Артитстква КІвыждза Дамири Сатучиев Астемыри Россия акъральгІв шІаква рыхъазла ашва рхІватІ. Асаби ршІыйара Тдзы адиректор КІвыждза Гващамыдагьи ауат пхата драйхІвахІвтІ. Ауи чкІвыныргІа йъанызлакІгьи р-Псадгьыл хвыц зынгьи йырхъддымраштылырныс йаквгІазшІылттІ. Россия акъральгIв шІаква рыхьызла паспорт гІазыртыз КІвыждза Амир ахІбачва аразыра ажваква рзынайырхатІ йгьи разхъацІара йшамайжьушла йыргвыгъатІ.