Актуально В ФСБ России по КЧР рассказали как распознать телефонных злоумышленников  СКФО Новый логотип курорта Эльбрус в КБР представили в студии Артемия Лебедева СКФО В Северной Осетии прошла донорская акция Актуально В КЧР родители старшеклассников сдали ЕГЭ Общество Карачаево-Черкесия наращивает объемы производства тепличных овощей

ХЬДЗЫЛА АТУРЫХ АБГЪЬЫЦКВА ЙЫРНЫЗЛУШТI

20.11.2018 412
ХЬДЗЫЛА АТУРЫХ АБГЪЬЫЦКВА ЙЫРНЫЗЛУШТI
Совет Союз а-Фыр КЪВНЫЖВ ЗамахIщари Уасман йпа абаза уагIа йырхъазымкIва хIхаквлагIвчва зымгIва рхъа зладухауа агIвычIвгIвысква дрыуапI. Ауи асквш 1916 агIан Дарыкъвакт апны дйытI. ЙыквлагIвчва дрылата дгIадзынгылтI, адгьылрхарджьыгIвчва рсабиква ъадрыпхьуз апхьарта, уадыргIвана атракторист курсква дгIарылгатI. Ауи амщтахь аколхоз дынхатI. Асквш 1937 агIан ар къвырльыкъвхара дызшIырттI. Совет-фин айсра агIан хъацIара ду гIайырбатI. Ауи архъв акомандир йгIайыхъвдаквицIаз ахачIвы йырхъйауата афин дивизия рштаб шалайрыхъвашаз анцIрала атурых йгIалахатI. Къвныжв ЗамахIщарии йыцыз айсыгIвчви агъа тшъанйыргIалыз ашIыпIа щаквдыргылуата апшыхвраква акIвдыршун. Ауи алаква зцIахIваз аджьанах пулеметгьи аквгылата дшымгIвайсуаз афинква рштаб дахъанагатI. Анамыца офицерква агвыквсраква рыцIа къвльайта йшакIвдыршуш йалачважвун. ХIхаквлагIв щарда дымхъвыцуата йпулемет йыргIапсын, ауат дрылахыстI. УадыргIвана ршвъаква азикIкIытI, йыркIра ртахъыз аштаква ъагIарбаз акарта шгIакIыдихуазымца аофицерква рыуа заджвы дшгIайпшуаз гвы айттI. ЗамахIщари генерал фаша зшвыз, йхвыз афингьи ашвъаквагьи йымата дгIахъынхIвыхтI. Ауи хъацIарата йгIайырбаз гватрадъа йыгьгIанымхатI. СССР а-Верховна Совет а-Президиум а-Унашвала, Совет Союз а-Фыр хьзы, «Золотая Звезда» йгьи Ленин йорден гIайквнадыргатI. Къвныжв ЗамахIщари Белоруссия агородкви акыткви ргIархвитхрала айбащра щарда дрылан. Орша город анамыцаква йдызмыркIыз айсыгIвчва дрылата хъацIара гIайырбатI. Ауи йгIайадзаз аконтузия йгIалцIла афронт дгIапшцIырщтхтI. Йышта дангIайхгьи йнапIква акврышв зынгьи дгьымчIватI, аколхоз йапшым аъачIвагIаквала дынхатI. ЗамахIщари Уасман йпа чкIвыныргIа щардала дрынйун, ашIаква рпатриот бжьара уысква дрылан. Къвныжв ЗамахIщари асквш 1992 агIан сквш 76 дыртата адуней йхIваджьтI. Псыжв аквта урам ауи йыхьыз нкъвнагитI, Черкесск город а-Фырква р-Аллея апны йчвахъабага бюст аныргIалпI. Псыжв кыт Ерыжв Зули лыхьыз зхъу акультура Тдзы апны октябрь а 7 Къвныжв ЗамахIщари йчвахъабага гъвы гIахъыртIытI. Ауи йазынархаз ахъмаштылра митинг йалан Абаза муниципальна район администрация ахъада Ныр МухIаджьыр, Абаза район ахъада Архагъ Къвырман, Псыжв кыт администрация аунашвачпагIв Тобыль Мурат, Къарча-Черкес Республика аветеранква р-Совет апредседатель йзаместитель Каккушев Хвсей, Социалист нхара а-Фыр КIьашвауа ДаткIа, КъвныжвыргIа рткъвым агIащтийыгIвчва, акыт ахIбачва р-Совет апредседатель АбытI МухIадин, апхьагIвчва. Амитинг апны йгIачважваз Ныр МухIаджьыр анамыца фашистква йырпшIагылата йайсыз хIхаквлагIвчва рхъмаштылра магIныта йаму гIаликIгIатI. – УахьчIва йгIахъхIтIуа Къвныжв ЗамахIщари йчвахъабага Псыжв абзазагIвчвагьи, йгIаталуа асасчвагьи амамыр гIахчарала хIхаквлагIв йалацIара шдуу гIаднаргвалашвахлуштI. Ауи йапшу ауысква ракIвыршара йгIахIыцIагылуа абанпара рыхъазла магIын ду амата йспхьадзитI, – йхIватI Ныр МухIаджьыр. Абаза район аимам Апса Анзор аджьабара митинг йалаз духIа гIадирахвтI. Ауи амщтахь Абаза район администрация ахъада Ныр МухIаджьыр йгьи Къвныжв ЗамахIщари йпхIа Аминат ачвахъабага апрапса гIапырырхтI. Совет Союз а-Фыр Къвныжв ЗамахIщари йчвахъабага агIахътIра йазынархаз амитинг апны йгIачважватI КЧР аветеранква р-Совет апредседатель йзаместитель Каккушев Хвсей, Социалист Нхара а-Фыр КIьашвауа ДаткIа, Псыжв кыт администрация аунашвачпагIв Тобыль Мурат, акыт ахIбачва р-Совет апредседатель АбытI МухIадин, КъвныжвыргIа рткъвым рыхьызла Азамат МухIарби йпа. Амитинг йалаз хъмаштылра дакъикъа йангыл амщтахь ачвахъабага ащапIы ахIврапшдзаква щтIарцIатI.  НагIвай район йаланакIуа ИконхIалкъ кыт апынгьи Абашта айсра Ду агIан хъацIара гIазырбауа йайсыз Совет Союз а-Фыр Кумуков Халмурза СахIатгьари йпа йыхъазлагьи йара ауи апш чвахъабага гIахъыртIытI. Ахъмаштылра митинг йалан НагIвай район администрация ахъада Керейтов Энвер, ауагIахъа уысквала, ажвлара коммуникацияквала йгьи печатьла КЧР аминистр йзаместитель Хвби Ислам, КумуковргIа рткъвым агIащтийыгIвчва, акыт абзазагIвчва. – ХIара хIыхъазла уахьчIва магIын ду зму мшыпI. Кумуков Халмурза йапшу хIхаквлагIвчва абанпараква зымгIва рыхъазла йшвапхапI. Абашта айсра Ду агIан зхъа йамайгьдзауата анамыца фашистква йырпшIагылыз дзачIвызлакIгьи анцIрала хIхъмаштылра йалазлуштI, – йгIаликIгIатI НагIвай район администрация ахъада Керейтов Энвер. АуагIахъа уысквала, ажвлара коммуникацияквала йгьи печатьла КЧР аминистр йзаместитель Хвби Ислам йгIачважвара апны атурых йауу закIгьи хIхъаштлырныс хIшахвитым, уахьчIвала йщаквгылу амамыр хIабадучва хвыта йазыртйыз даквгIашIастI. КумуковргIа рткъвым ахIба ахъмаштылра митинг йгIадгылыз, ачвахъабага агIахътIра зкъару алу зымгIвагьи разыра ажва рзынайырхатI. ИконхIалкъ кыт квтанай апхьарта апны йгIахъыртIыз Кумуков Халмурза йчвахъабага йгIадзынгылуа чкIвыныргIа р-Псадгьыл бзи йырбарныс йгьи йырхчарныс рборч хъадаква йшрыуу гIаднаргвалашвахлуштI.
412 просмотров


Комментарии

Написать
Комментарии >



Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный
Вступайте в сообщество RIAKCHR в “Telegram” Получайте свежие статьи и новые публикации на свой мобильный