Зеленчук районну «Колобок» атлы школгъа дери учреждениесинде, «Доступная среда» деген федерал нюзюрлю программаны джашауда орунлу эте, сакъат сабийлеге болушургъа джораланнган къауум къураллыкъды.
- Зеленчук район республикада эм уллуду, былайда школгъа дери учреждениелени саны 26 болады, - дегенди КъЧР-ни окъуу бла илму министри Инна Кравченко. – Сакъат сабийлеге тыйыншлы болумла къураргъа кереклиси хакъды. «Колобок» сабий садны федерал программагъа
къошуб, къыяулу сабийлени ары алыргъа мадар чыкъгъаны ашхы иш болгъанды.
Сакъат сабийле бла ишлерге терен билимлери болгъан логопедле, психологла, тьюторла, медицина къуллукъчула чакъырыллыкъдыла. Аны бла бирге сабийлени саулукъларын игилендирирге джораланнган ишлени къайгъысы да этилликди.
Ол къауумну борчу кемизли сабийлеге заманында психология эмда педагогика джаны бла болушлукъ табдырыуду, аланы школгъа хазырлауду. Аны бла да къалмай, аталагъа-аналагъа керекли консультация эмда методика болушлукъ этерге да боллукъдула.
Былайда сокъур эмда сангырау сабийле бла ишлерик энтда бир къауумну къурар мурат барды – ол коррекцион эмда профилактика ишле бла кюреширикди.
Комментарии