Къарча-Черкес Республика аунашвачпагIв Темрезов Рашид Керч город апны РФ а-Президент Путин Владимир йакIвйыршаз а-КъральыгIва Совет апрезидиум алачIвара далан. Ауи ГIвадахь Россия апны атранспорт инфраструктура тшауацIнарыхра йазынархан.
АлачIвара апхъала а-КъральыгIва Совет йгIадгылыз Керч атурых йапщылу апхъанчIви чвахъабага Митридатск чвымла йапшытI. Ауи асквшква 1833–1840 рагIан йыруыхватI, ачвымла Керч аквта площадь йгIалагитIта абыхъв ахъыквдза йнадзитI.
Путин Владимир алачIвара гIахъитIуата ГIвадахь Россия апны атранспорт инфраструктура тшауацIнарыхра магIныта йаму гIаликIгIатI. Атранспорт инфраструктура тшауацIнарыхра йапщылу ГIвадахь Россия асоциальнаэкономика аъаща йгьахъазым, Россия шабгу ахъазла ауи магIны амапI. РФ а-Президент йшгIаликIгIазла, Россия апортква йгIарыдыргалуа апкъыгIваква хпа йчпата ахъвыкI айхIа Азов йгьи КвайчIва тенгьызквала йгIаргитI, ГIвадахь Федеральна округ акъраль аимпорт пкъыгIваква гIатагарала, хIырхарджьыгIвчва рпкъыгIваква агIвымакъральква йгарала магIын ду амапI.
– КвайчIва йгьи КаспийскI тенгьызква йрызцауа амгIваква хъгалрата йгIахIыртуа гIахIрысабапра атахъыпI,–йхIватI Путин Владимир. – УахьчIва хIтахъыраква йырхъазымкIва апхъала хIпшуата ауагIа йгьи ахIатлаква ратрыпара адыгIгалра атахъыпI.
А-КъральыгIва Совет алачIвара апны йатрыпачIву ахIатлаква йъарылахIауа йгIалцIла ЮФО апны ахIатлаква ратрыпарала аргIапсща тшауацIнарыхра йалачважватI.
Путин Владимир ауагIа ратрыпарала атранспорт цхърагIараква рнадзара агъьчIвра шатахъугьи даквгIашIастI.
Транспортла РФ аминистр Соколов Максим йгIачважвара атранспорт хъвшараква ртшауацIыхрала ахачIвква йырзынархан.
Комментарии