КЪАЗАХСТАН ЙГЬИ КИРГИЗИЯ РПНЫ АЧВАХЪАБАГАКВА ДЫРГЫЛУАШТI

Къарча-Черкес Республика а-Хъада ТЕМРЕЗОВ Рашид акъарча уагIахъа Квта Азия йтыргищтара йцIуа асквш 75 йазынархата йакIвшаз амитинг апны Къазахстан йгьи Киргизия рпны агIвыма шта апны зчIвылахъв зауыз рыхьызла чвахъабага ргылрала йщаквыргылра гIарылайхIватI. Аджьабара митинг аполитика репрессия йалашвата асквшква 1943– 1957 рагIан Квта Азия збзазартахаз акъарча уагIахъа рыхьызла Къарча город апны йдыргылыз ачвахъабага адзхъа йакIвшатI. Ауи йалан РФ а-Федеральна Айззара а-Федерация а-Совет йалу САЛПАГАРОВ Ахмат, КЧР АуагIа Айззара (а-Парламент) а-Председатель ИВАНОВ Александр, КЧР а-Правительства а-Председатель УАЗ Аслан, КЧР йаунашвачпагIвыз БАТДЫЕВ Мустафа, хIреспублика а-Парламент адепутатква, а-Правительства анхагIвчва, ажвлара йгьи адин организацияква, агородкви арайонкви ргIащтийыгIвчва. Амитинг гIахъыртIра апхъала Къарча город аурамквала адепортация йалашваз рцриква рсуратква, рыхьыз зныз агъвычкIвынква рнапIыцIакIта уагIа зкьпхьадзара ачвахъабагадза йгIамгIвайстI. Ауи амщтахь Лагъь КIавкIаз амсылманква ркоординационна Квта аунашвачпагIв, КЧР амсылманква р-Дин Унашвачпарта амуфты БЕРДИЕВ ИсмаилхIаджь, Къарча-Черкес акьльиса АгIвадахь округ апротоиерей СУБТЕЛЬНЫЙ Евгений амитинг йгIадгылыз духIа гIаддрахвтI. – УахьчIва хIтурых апны рыцIа йгвъаджьыгIваз амш гIахIгвалашвахитI, сквш 75-ла утхъахырквын, щымтанамазта акъарчаква тгIачвала ахIатланкъвгага вагонква йтадырчIван, Квта Азия йгьи Къазахстанла йджвыквылтI, – йхIватI Темрезов Рашид йгIайззаз тшырзынайырхауата. – Йауыраз йгьи йгIапсараз амгIва, амла, ахьта, акъару йгIанамгуа анхара, йжьыхьыдаз ахъпшылра йгIарылцIла зыкь 43-гIв адуней рхIваджьтI, ауат сабита зыкь 22-джь рылан. Ауаса зцриква зчвыдзыз, джьабагIа ду злазхIваз акъарчаква тшгьдымрыдзтI, нхарала фырра гIадырбауата йъатанагаз адгьыл апны акыт млыкврхIара къару щарда аларцIатI. ХIреспублика а-Хъада йшгIаликIгIазла, акъарча уагIахъа рыбызшва, ркультура гIащаквыржьырныс рылшатI, р-Псадгьыл бзибарата йазрымаз гьырчвымдзтI. УахьчIва хIхачIв хъада ауат асквш хIатлаква хIхъмаштылра, хIапхъахьыла ауи апш рыцхIагIа шгIанымшахуаш хIазхъвыцра акIвпI. – Ари амитинг апны Къазахстан йгьи Киргизия рпны зчIвылахъв зауыз, акъарчаква йырхътысыз асквш хIатлаква рхъмаштылра йазынархата агIвыштакI рпны ачвахъабагаква рыргылра йазхъвыцырныс «Къарачай Алан Халкъ» жвлара организация тшазынасырхитI, – йгIачважвара йгIацицIахтI Темрезов Рашид. – Сара сшазхъвыцуала, ачвахъабагаква йгIаталуа асквш апны йгылазлара, ауи ахъазла агIвыма уысквала а-Министерства хIрачважвата йчпачIву агвынхIыргIвра атахъыпI. «Къарачай Алан Халкъ» жвлара организация аунашвачпагIв Хабов Руслан амитинг йалаз акъарчаква антырга йапхъахуз асквш агIан рпроцент 24 амли ахьти йшгIарцымхаз гIадйыргвалашвахтI. – УахьчIва араъа з-Псадгьыл йтыргата зкърар зчвымдзыз рфырра квырмыш азыхIчпарныс хIайззатI, – йхIватI ауи. – Ауат асквшква рагIан з-Псадгьыл хвыц зчвыдзыз акъарчаква йыгьхIхъазым, ЛагъьКIавкIаз йгьи Россия ауагIахъа щарда льажьакIгьи рымамкIва арепрессия йалашватI. – Сквш 75-ла утхъахырквын, аноябрь мшква акъарчаква рыхъазла йхьшвашвадзахатI, – лхIватI йащтагIайуата ажва змаз, забаду арепрессия далашваз КЧР АуагIа Айззара (а-Парламент) адепутат Ляшова Елена. – УахьчIва йъатыргуздза йнамдзауата амгIва апны адуней зхIваджьыз, адуней йгIаквылгIвацата адгьыл йартхыз гIахIгвалашвахитI. Ауат тгIачва гIандыршушын, саби рыгIзушын, ауаса йгIадымрискIва йлахьыдахатI. «Адыгьа Хасэ – Черкес парламент» жвлара мгIвайсра аунашвачпагIв Асланов Али акъарча уагIахъа анхара йшазгIашыкъыз гIаликIгIатI. – Жвипщсквша руацIала йырхътысыз аджьабагIа ауагIахъа тшдырра гьамрыдзтI, – йхIватI ауи. – Адепортация асквшква рагIан акъарчаква йрыуаз щардагIвы Социалист Нхара йа-ФырхатI, аорденква гIарквнадыргатI, йбергьльу апхьахьахатI, уысагIвхатI йгьи йыгIвгIвхатI. «Абаза» жвлара организация аунашвачпагIв Дзыуа Зауыр йгIачважвара апны акъарчаква асквш хIатлаква рагIан рхъа шнадмыркъвыз, азахвара шгIащаквгылхуашла