К и з ы и ы ЙИЫГЫС

«Машук-2019» Керуьв-Кавказ яс-явка форумынынъ уьшинши кезуьвининъ доьртинши куьни, аьдеттегинше, СКФО-дынъ куьни деп белгиленген эди. Яс-явка форумынынъ катнасувшылары ман йолыгыска СКФО-да РФ Президентининъ ваькил элшиси Александр Матовников эм Керуьв Кавказдынъ ислери бойынша министр Сергей Чеботарев келген эдилер. - Мунда баьриси де оьзлерин коьрсетпеге болаяклар, сиз вакансиялар ярмалыгында катнаспага, етиспейтаган компетенциялар алмага, алдыга ымтылмага болаяксынъыз. Форумнынъ сосы кезуьви сизинъ уьшин оьзлик эм кеспиликоьсуьвдинъ маьнели шагы болганын, оьз мыратларынъызга етискенинъизди сагынаман, - деди йолыгысты аша келип Александр Матовников. Онынъ соьзлерине Сергей Чеботарев косылды. - Мунда келгенинъиз уьшин сизге муьсиревимиди билдиргим келеди. Форум айкасув, пайдалы билдируьвлер алув уьшин ийги амал болады. Меним яслык шагымда чиновниклер мен айкаспага, оларга оьз соравларымды бермеге амалым болмаган. Ама сизде сондай амал бар. Сонынъ уьшин де келеекте сизинъ аранъызда болган яс аьдемлердинъ бир кесеклери мен бир министерствода ислемеге болаягым акында да ойлайман, - деди ол. Керуьв Кавказдынъ ямагатшылык-политикалык яшавына багысланган йолыгыс ашык айкасув кепте озды эм саьат ярымга созылды. Форумнынъ катнасувшылары ямагатшылык организацияларды акша амаллары ман демевлевдинъ маьнелиги, экологиялык аьлди ийгилендируьв, яс-явка арасында спортты яйылдырув акында соравды коьтердилер. Сыйлы конаклардынъ белгилевинше, аьлиги заманда аьрекетлевдинъ уьстинликли туспарлавлары регионда куллыксызлыктынъ маьселесин тайдырув ман, авыл хозяйствосын, туризмди оьрлендируьв мен байланыслы. Сергей Чеботарев айырым болып, кишкей эм орта эпшилликти оьрлендируьв соравын айырым белгиледи. - Кишкей эм орта бизнести оьрлендирмеге керек. Аьлиги заманда кишкей эм орта бизнести оьрлендируьв бойынша федераллык корпорация Керуьв-Кавказ федераллык округына 2019-2025 йылларга 56 миллиард маьнет сымарлаган. Ол аз тувыл. Соьле сизде оьз исинъизди ашув уьшин ийги амал туваяк, - деди ол. Йолыгыстынъ ызында сыйлы конаклар яс аьдемлерге оьз йоравларын айттылар. - Кылыгынъыздынъ лидерлик касиетлери яшавынъызда керексинлер. Мени эситсинлер, коьрсинлер, ярдам этсинлер деп колынъыздан келген баьри затты да этинъиз. Сизге етимислер сагынаман, - деди Александр Матовников. - Билимге ымтылыслы болынъыз. Оьз тувган юртынъызды, бизим уллы кыралымызды суьйинъиз. Суьйим коьп болган сайын, ийгилик те, етимисте коьп болады,- деди Сергей Чеботарев