Накъыгъэм (майм) и 21-м Али-Бэрдыкъуэ къуажэм щекIуэкIащ Кавказ зауэр зэриухрэ илъэс 151-рэ зэрырикъум теухуа щыгъуэ пэкIу. Абы къекIуэлIащ Къэрэшей-Черкес Республикэм и Правительствэм и тхьэмадэм и къуэдзэ Уэз Мурат, КъЧР –м туризмымкIэ, курортхэмрэ щIалэгъуалэ IуэхухэмрэкIэ министр Эркенов Анзор, КъЧР-м и ЦIыхубэ ЗэIущIэм (Парламентым) и депутатхэр, Хьэбэз районым и Iэтащхьэ пщэрылъхэр пIалъэкIэ зыгъэзащIэ Байчорэ Беслъэн, Хьэбэз районым и депутатхэм я Советым и тхьэмадэ Хьэмыкъуэ Хьисэ сымэ, къуажэхэм я Iэтащхьэхэр, жылагъуэ зэхыхьэхэм я лIыкIуэхэр, районым щыпсэухэр. ЗэIущIэр къызэIуихкIэрэ, Али-Бэрдыкъуэ къуажэм и ефэнды КIэщт Александр дыуэ яригъэщIащ зауэ гуащIэм хэкIуэдахэм папщIэ. Иужьым псалъэр иратащ Хьэбэз районым и Iэтащхьэ пщэрылъхэр пIалъэкIэ зыгъэзащIэ Байчорэ Беслъэн. Кавказ зауэм щхьэусыгъуэ хуэхъуам, лъэпкъхэм къахухэкIам къытепсэлъыхькIэрэ, абы игъэбелджылащ зауэм и нэщIэбжьэр адыгэ лъэпкъым и гум сыт щыгъуи зэрилъэнур. - Нобэ Къэрэшей-Черкесым щыпсэу лъэпкъхэм, дунейм щикъухьауэ щыпсэу адыгэхэм ягъэлъапIэ Кавказ зауэр зэриухрэ илъэси 151-рэ зэрырикъур. А зауэм и тхыдэ напэ кIуэцIхэр мыкIуэдыжын гуауэ джэрпэджэжу ди гум икIакъым иджы къыздэсым. Адыгэ жылэ щэ бжыгъэ лъэрыщIыкI ищIащ а зауэм. Хы ФIыцIэм итхьэлар, хамэ щIыналъэм зи псэр щызытар бжыгъэншэщ, езы лъэпкъышхуэри дуней псом щрикъухьащ. Абы и ужь лIыщIыгъуитI текIыжами, нобэ дигу къыдогъэкIыж зи щIыналъэр зыхъумэу зи псэр зытахэр, Кавказ зауэм хэкIуэдахэм щхьэщэ яхудощI, лъэпкъым зэрихьа лIыгъэм хуэфэщэн пщIэ идотыж. Пащтыхьыдзэм къыхуихьа лъапсэрыхым къела лъэпкъ Iыхьэ мащIэм и купщIэр, щэнхабзэр, пщэдейрей махуэм хуэгъэза фIэщхъуныгъэр имыгъэкIуэдын хузэфIэкIащ. Мы зэманми террорым и мафIэ лыгъейм кърихужьа лъэпкъхэм яхэту, КъуэкIуыпIэ гъунэгъум, Щамым щыщ ди лъэпкъэгъу куэд Урысейм, абы хэт адыгэ хэгъуэгухэм я щхьэ кърахьэлIэж. ТхьэмыщкIагъуэ ихуа ди лъэпкъэгъухэр мэгугъэ дэIэпыкъуныгъэ къалъысыну. ИкIи ди пщэрылъ пажэщ абыхэм дадэIэпыкъуныр. А зауэм къыхэтхыпхъэ дерсхэм я пажэщ мамырыгъэм, зэгурыIуэныгъэм и уасэр къызэрыдгурыIуэн хуейр, псом хуэмыдэу, лъэпкъыбэу зэхэпсэухь ди хэгъуэгум деж. Арами нобэ къыдгурыIуэкъым Кавказ зауэм хэкIуэда ди лъэпкъэгъухэм яхуэгъэза щыгъуэ пIалъэр Къэрэшей-Черкес Республикэм деж дэсыгъуэ махуэу щIамыщIар. Абы и IуэхукIэ республикэм и лIыщхьэхэм захуэдгъазэкIэрэ, къызыхуедджэну дызыхуейр ди лъэпкъыр къыхагъэщхьэхукIыну аракъым, атIэ лъэпкъыу хъуар зэхуагъэдэнращ. Мы махуэм, адыгэу Хьэбэз районми, республикэми, дуней псоми щыпсэухэми захуэдгъэзэну дыхуейщ дяпэкIэ апхуэдэ зауэ нэщIэбжьэ ямылъагъужыну. Сыт хуэдэ лъэпкъи апхуэдэ гуауэ химыгъаплъэкIэ,- жиIащ Байчорэ Беслъэн. Абы и ужь утыкум къыщыпсэлъащ Уэз Мурат. ИкIи игъэбелджылащ Кавказ зауэм и Iэ щIыIэр лъэпкъ куэдым зэралъэIэсар, хьэзабрэ гуауэрэ къызэрыхуихьар. - Лъэпкъхэм яхузэфIэкIащ тхыдэ напэкIуэцI гуауэхэр къызэранэкIын. Нобэ Кавказри, абы щыпсэу лъэпкъхэри Урысей къэралыгъуэшхуэм и зы Iыхьэщ. ИкIи къыдгурыIуэн хуейщ зауэ блэкIам и нэщIэбжьэр дяпэкIэ сыт хуэдэ лъэпкъми къазэрылъэмыIэсыжыпхъэр. Ди зэкъуэтыныгъэм, мамыр зэдэпсэукIэм едгъэфIакIуэу дыпсэун хуейщ. Лъэпкъ е дин зэхэгъэж къэдмыгъэхъуныращ, ди щIэблэм пщэдейрей махуэм и уафэ къабзэ ялъыдгъэсыныращ ди пщэрылъ нэхъыщхьэр,- жиIащ Уэз Мурат. Къызэхуэсахэм я пащхьэ къыщыпсэлъащ КъЧР-м и ЦIыхубэ ЗэIущIэм (Парламентым) и депутат Червоновэ Еленэ, Хьэбэз районым и Адыгэ Хасэм и тхьэмадэ Даур Мухьэмэд, Хьэбэз къуажэм и Адыгэ Хасэм и тхьэмадэ Даур Мусэ, Али-Бэрдыкъуэ къуажэм и е1-нэ еджапIэм щеджэ Ажий Зэмрэт сымэ, нэгъуэщIхэри. Дэтхэнэми ягъэбелджылащ зауэм и гуауэр зыщыбгъэгъупщэ зэрымыхъунур, нэгъэсауэ дерс пэж абы къызэрыхэхыпхъэр. Дуней псом щыпсэу адыгэхэм я гъусэу, шэджагъуэм, сыхьэтыр 12-м техуэу, пэкIум къызэхуэсахэр дакъикъэкIэ хуэщыгъуащ Кавказ зауэм хэкIуэдахэм. Иужьым, удз гъэгъахэр хуагъэтIылъащ, щхьэщи хуащIащ Кавказ зауэм хэкIуэдахэм папщIэ дуней псом щыяпэу ягъэува фэеплъ сыным. Предыдущая новость 1381 просмотров Следующая новость Читайте также Я гъащIэр – щIэблэм я щапхъэ пащхьэщ 15.05.2015 376 Мэзыр къэгъэсэбэпыным 21.07.2016 449 Получайте свежие новости на электронную почту Подписаться Комментарии Написать
Комментарии