СКФО Преимущества покупки пластиковой сетки у OPT Relation СКФО 1. Технические характеристики, сертификация продукции и регистрация технических характеристик СКФО В республиках СКФО на 61% вырос спрос на образование с господдержкой СКФО В Ставрополе состоится общегородская зарядка   СКФО Дагестан создаст аналог зарубежных курортов

ГРЕЧИШКИН ЙЫГIАПЫН

16.08.2019 276
ГРЕЧИШКИН ЙЫГIАПЫН
РшIыйара злаз асуратчпагIв ГРЕЧИШКИН Павел Моисей йпа асквш 2009 июнь агIан адуней йхIваджьтI. Ауи дъауаз Ставрополь край апны ансисквша «Гречишкинская весна» зхьзу фестиваль акIвдыршалитI. ХIызту асквш июнь а 10 Ставрополь город йаныргIалу асурат галерея апны йхътIу ашIыпIа йыргIвуа асуратква ъагIадырбаз й-VII-хауа фестиваль акIвшатI. Ауи йалан Россия йапшым агородква йгьи Китай йгIартыцIыз асуратчпагIвчва. Йбаргвыз асквш 1933 агIан амла тшачвызхчуз ГречишкинргIа ртгIачва Ставрополь край йаланакIуа ТатаркIа кыт йгIатыцIын Къарча-Черкес, Коста Хетагурова кытла йгIаквачтI. РшIыйара злаз Павел абыхъв сагьасаква, Къвбина дзыгIв, абна чвыцIаква анцIрала ддыргъартI. Ауи йалкIгIата Шоан бхъви адзакIьала йаныргIалу акьльиси рымадзаква цIолата ййырдырра йтахъын. Асквш 1957 агIан ауи Теберда заповедник аунашвачпагIвчва рахIварала апсабара музей ахъазла суратквакI йдрычпарныс ддрайгватI. СквшыкI ауацIа асуратчпагIв дамайчуата дынхатI. УахьчIвала ауи йыршIыйара зырхъвыхуа аъачIвагIагIвчва йшырхIвауала, йгIвыз асуратквала КIавкIаз апсабара цIолата йууырдыр ауаштI. ЦхIашвыла, амзагIвцIлаквала йхъгIву абыхъвква, агвалква, ахIатшп джьащахъваква бзидздзата йгIазырбарныс зылшаз Гречишкин Павел йсуратква апшыгIвчва йанакIвызлакIгьи чIыдахъвы йгIалыркIгIауата йыргвапхитI. Апейзажист ъаза йанакIвызлакIгьи шIыцракI дазыпшгIун, ашIыпIа пшдзаква йызнымкIва дгIарыквхъынхIвхуамца датша хъатакIла йшгIайырбушыз дащтан. «Утро в Теберде», «Солнечная долина», «Домбайская фантазия», «Три сосны» суратква злархъйу амаль швабыжта йджьащахъвапI, йырпшлакIгьи йара йзаргвану закI гIаликIгIарныс йылшитI. Гречишкин Павел Абашта айсра Ду агIан хъацIара гIайырбауа дайсытI. ЙрапхIаква йгIарылалыз ахьта Теберда апны дъадзанхуз азаман ауацIала йырбзихахырныс йылшатI. Ауи Волга, Суздаль, Кърым, Ярослав область датшагьи Россияла шIыпIа пшдза щарда рпсабара сурат гIазырбауа йгIвытI. ЙызнымкIва Индия, Италия, Греция, Непал, Трыкв, Мексика, Япония даъан. Йара йшипхьадзузла, КIавкIаз йазынайырхаз асуратква зымгIва рацкIыс рыцIа бзита йгIайдахIвтI. Ауи йсуратква къральта 40 рмузейква рпны йаныргIалпI. ХIызту асквш «Гречишкинская весна» фестиваль Архыз апны йадыргалтI. ХIшIыпIа абыхъвква рпшдзара йанакIвызлакIгьи ршIыйара чIвец злу агIвычIвгIвысква аргвышхвитI, йыззынадзазла йгIашIамсуата рапхъала йчIвырхъарныс йаквнаргвышхвитI. Гречишкин Павел йыршIыйара байагьи ауи йаквшахIатхитI.
276 просмотров

Читайте также



Комментарии

Написать
Комментарии >



Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный
Вступайте в сообщество RIAKCHR в “Telegram” Получайте свежие статьи и новые публикации на свой мобильный