«ГЕОРГИЕВСКАЯ ЛЕНТОЧКА» АКЦИЯ ЦIАСХАТI

СквшигIадза Россияла АйгIайра амш йапылуата «Георгиевская ленточка» акция акIвшитI.
Къарча-Черкес Рспубликагьи ауи йацыркIуата
Черкесск йаныргIалу АйгIайра парк апны акция
джвыквырцIатI.
Айсра-патриот Квта
аунашвахъцIагIв Магкаева Светлана йшылхIвазла, ари амш Черкесск город йаныргIалу апхьартаква рапхьагIвчва гIадрайгватI. Ауат май а 9-дза
ленточката жванзыкь ауагIа йрыларшуштI.
–Сара йгIвысквшахитIта «Георгиевская ленточка» акция салалитI, –
йхIвитI Черкесск йгIвбахауа апхьарта апхьагIв
КIарма Дамир. – Акция
йгIадзынгылуа абанпара рпатриот бжьара йаланархIитI, хIахIбачва Абашта айсра Ду агIан хъацIарата йгIадырбаз ахъмаштылра йгIалахара йазынхитI.
– Сквшщарда агIвсхьатI
Абашта айсра Ду алгищтара, ауаса ауи ацIыхъватшараква ужвы йъагIадзазгьи йхIылахIхIвитI.
Айсра зымгIва рацкIыс
йрыцхIагIа дуу гIаншарапI, – лхIватI Черкесск
городла аветеранква рсовет апредседатель Печуро Надежда Александр
йпхIа. – УахьчIва АйгIайра амш хIапылуата ари
акция джвыквхIцIитI. Апхьартипхьадза, унагIвипхьадза айгIайра адамыгъа нашылитI. ЧкIвыныргIа, швыжвгIванд мамырызтI, ахIбачва айгIайра
гIатыргара ахъазла хвыта йазыртйыз швхъшвымраштлын.
Акция зшIытгата йамапI: «Сара йыздыритI,
сара хвы азызбитI». АбзазагIвчва ргвпы йаларцIауа аленточка айсра
йаладзыз ауагIа ахъмаштылра йшалу, амамыр
зхчаз аветеранква йшырзыразу йыргIарбагата йырпхьадзитI.
Черкесск йгIвбахауа
апхьарта адиректор бжьарала йзаместитель Денишаева Льильа МухIамад йпхIа йшылхIвазла,
ари айззара амщтахь рапхьарта ъаныргIалу угIалагата КIавкIазскIа урам
аурала йгIаршIашвауа абзазагIвчва зымгIва ргвпква
ленточка рыларцIатI.
СынчIва ауи анкъвгащагьи апсахраква аларцIатI. АгIвычIвгIвыс йгвпы
апны акIвпI ауи ъалайцIуш, амашинаква, асумкIаква йырцрархIва гьауашым.
Асасчва ргIачважвараква рымщтахь «АйгIайра
парк» йаныргIалу айщчва нышвынтара, афырква рчвахъабагаква рпны
ахIврапшдзаква щтIарцIатI.