Республиканы Ташкёпюр бла Адиль-Халкъ эллеринде фельдшер-акушер пунктла ишленедиле. «2014-чю – 2017-чи джыллада эмда 2020-чы джылгъа дери эллени тири айнытыу» деген программаны тамалында бардырылгъан бу къурулушланы финанс джаны бла федерал эмда джергили бюджетле баджарадыла.
Фельдшер-акушер пунктла бир айны мындан алгъа ишлениб башланнгандыла. Ол кёзюуню ичине иги кесек иш этилгенди, айтыргъа, къабыргъалары сюелгендиле, башлары, терезе орунлары джарашдырылгъандыла. Бусагъатда мекямланы ичлери бла кюреше турадыла, инженер коммуникацияланы тартадыла. Хар фельдшер-акушер, пунктну уллулугъу 60 квадрат метрди. Аланы хар биринде процедура, акушер-смотровой, стоматология кабинетле боллукъдула. Аны кибик бу пунктлада дарман-дары сакъланнган гёзенле, персоналгъа джораланнган бёлмеле, кирген-чыкъгъан олтурурча джерле боллукъдула.
Эки мекямны да къызыу ишлегенлери себебли, джылны аягъына ала, хазыр болуб, эшиклерин ачарыкъдыла.
Комментарии