ФЕДЕРАЛЛЫК МИНИСТЕРСТВО Д Е М Е В Л Е Й Д И

Карашай-Шеркеш Республикасын официаллы йоклавынынъ калыбында Керуьв Кавказдынъ ислери бойынша Россия Федерациясынынъ министри Сергей Чеботарев республикадынъ Басшысы Рашид Темрезов пан бирге белсинли кепли емис бавларды туьзуьв бойынша «Карашай-Шеркеш бавлары» ООО-дынъ уьстинликли инвестициялык проектининъ таралтылувынынъ барысына белги бердилер. РФ министри Сергей Чеботарев эм КЧР Басшысы Рашид Темрезов Адыге-Хабль муниципал районынынъ юртында туьзилген белсинли кепли бавлардынъ майданларын тергедилер. Буьгуьнге КЧР-да емис бавлардынъ, эгилген алма тереклердинъ майданы 200 гектардан артады. Соны ман биргесине Керуьв Кавказдынъ ислери бойынша РФ министрине кыралда курылган биринши эм сынъар бир белсинли кепли кертпе бавды коьрсеттилер, сондай болып, кертпединъ биринши онъысын да презентацияладылар. Буьгуьн кертпе бавынынъ майданы 3 гектар болады. Инвестициялык проектти арбатында таралтув кертпе бавын 20 гектарга дейим кенъейтуьвди карарлайды. Тамамында ол соьлеги Россияда туьзилген энъ уьйкен кертпе бавы болаяк, а Карашай-Шеркеш ерине тийислисинше кыралдынъ кертпе орталыгы деп айтпага болаяк. «Карашай-Шеркеш бавлары» компаниясынынъ директоры Айдын Ширинов баьри куллыклар да соьлеги замангы технологиялар бойынша толтырылатаганы эм тек аталык яс терекпери кулланылатаганы, а бавшылыктынъ белсинли технологиялары йогары онъыслыкты, продукттынъ сапатлыгын коьтеруьвди эм онъыстаьвекеллигин тоьменлетуьвди аьжетсизлейтаганы акында Сергей Чеботаревка хабарлады. Инвестициялык проекттинъ проектлик куваты йылына 10300 тонна емис продукциясы болады. Сосы проектти таралтув Карашай-Шеркеш Республикасында тек бавшылык тармагын янъыдан туьзуьвге эм емис продукциясынынъ рыногында соралатаган йогары сапатлы куьндеслесуьвлик болымлы продукцияды болдырувды ярастырувгатувыл, а ерли яшавшыларды исши орынлар ман аьжетсизлемеге де амал береди. Булайда белгилеп озайык, буьгуьнги куьнде «Карашай-Шеркеш бавлары» ООО-дынъ куллыкшылары тек ерли яшавшылар боладылар, бавларда олар, коьбинше аьлде, аьеллери мен куллык этедилер. Оннан баска болып, сосы инвестициялык проекттинъ баскалыгы сол, емис бав толысынша аталык экпе материалдан туьзилген. Яс тереклер вируссыз технология бойынша оьстирилгенлер эм тийисли халклар ара стандартларга яваплайдылар. Аьвелде сондай экпе материалды савлайына импортламага керек болган. Инвестициялык проектти таралтувдынъ кезуьвли шагы опталык-боьлистируьвши орталыкты курувды карарлайды. Ол тек йыйылган онъысты сакпавга тувыл, а продукцияды - емислерди йыл бойы таралтувга да сымарланган. Регионда сондай опталык-боьлистируьв орталыгынынъ аьрекетлеви 250 аьдемди исши орынлар ман аьжетсизлеек, ол да айлак бек маьнели. Бавларды йоклавдынъ калыбында КЧР Басшысы Рашид Темрезов, федераллык министр Сергей Чеботарев эм «Карашай-Шеркеш бавлары» ООО-дынъ басшысы Айдын Ширинов республикада елеклерди: ер електи, боьлдиргенди эм голубикады оьстируьвдинъ йолларын да тергедилер. Неге десенъ эгиншиликтинъ соралув ман пайдаланатаган сосы тармагын оьрлендируьв уьшин баьри мырсатлар республикада бар. «Карашай-Шеркеш бавлары» ООО-дынъ директоры СКФО регионлары уьшин министерстводынъ майданында емис-елек продукциясынынъ выставкасын уйгынламага, сондай болып, бавшылыкты оьрлендируьв соравлары бойынша Керуьв Кавказдынъ баьри субъектлерининъ агрономларынынъ, инвесторлардынъ, илмиликбирлесуьвлерининъ эм тармак союзларынынъ элшилерининъ катнасувы ман йыйылыс озгармага Минкавказдынъ басшысына ой этти. Адыге-Хабль районын йоклавынынъ ызында Керуьв Кавказдынъ ислери бойынша РФ министри Сергей Викторович Чеботарев предприятиеде келеекке ийги коьринислери болтаны эм соннан себеп, соьзсиз де, демев алмага кереги акында ойын билдирди. «Сизинъ проектинъиздинъ оьрленуьви уьшин баьри амаллар туьзеекпиз, неге десенъ ол савлай кыралга керек», - деди Керуьв Кавказдынъ ислери бойынша министри, ойын тамамлап.