Къарачай-Черкес Республиканы ара шахарында техника творчество бла кюрешген эм фахмулу 15 сабийге Черкесск шахарны мэрини ёчю берилгенди.
Фахмулу сабийлени алларында Черкесск шахарны мэрини биринчи орунбасары Алексей Баскаев сёлешгенди.
- Бу ашхы мероприятие быйыл тёртюнчю кере бардырылады, кеслерини къоллары бла сейир затла этген хунерли сабийлени таза джюрекден алгъышлайбыз, мындан ары да уллу джетишимле теджейбиз, - дегенди А. Баскаев.
Алайды да, фахмулу сабийлени хар бирине 15 минг сом бла Хурмет грамота берилгенди.
- Бу сабийлени Джаш техниклени станциясында юретген устазлагъа айырыб бюсюреу этерге тыйыншлыды. Ала ёсюб келген джаш адамланы фахмуларын чакъдырыргъа болушадыла. Аны бла бирге бу сабийлени аналары бла аталарына да разылыгъымы билдиреме. Аланы кючлери бла тамбла миллетге джарарча онглу адамла ёседиле. Черкесск шахарны администрациясы мындан ары да джаш адамланы арасында фахму джилтинлери болгъанлагъа болушлукъ этгенлей турлукъду, - деб къошханды Баскаев.
Саугъагъа тыйыншлы болгъанланы атындан Сюйюнчланы Алан сёлешиб, разылыгъын билдиргенди.
Комментарии