Къарачай-Черкес Республиканы Башчысы Темрезланы Рашид быйыл Правительствону членлери бла биринчи кенгеш бардырды.
Башчы алгъы бурун Правительствону членлерине, законну сакълагъанлагъа, кюч структуралагъа, къутхаргъан джол къуллукълагъа, Джангы джылда биригиб ишлегенлери ючюн, бюсюреу этиб, разылыгъын билдирди. Андан сора кенгешде 2019-чу джылгъа толтуруучу, законла чыгъарыучу, муниципал властланы органларыны этерик ишлери белгилендиле.
«Бютеулей алыб айтсакъ, Къарачай-Черкес Республикада Джангы джылны байрамы рахат ётгенди. Адамла кёб джыйылгъан джерледе халкъны тынчлыгъын бузгъан зат болмагъанды. Этилирге керекли джумушла тири баджарылгъандыла. Адамла бир-бирлерине ашхылыкъ, игилик теджей, Джангы джылны байрамы элледе, шахарлада къууанч халда ётгенди. Аны ючюн федерал, республикан властланы, кеси оноулу джергили органлагъа биригиб иш бардыргъанлары ючюн, джюрек разылыгъымы билдиреме», - деди Темрезланы Рашид.
Джангы джылда этилирге керекли уллу магъаналы ишлени арасында республиканы Башчысы Темрезланы Рашид миллет проектле баш орунну алгъанларын айтды. Быйыл Элни джылы болуб ётерин эсге салыб, аны бла байламлы этиллик джумушлада тохтаб да сёлешди.
«Эм алгъы бурун биз миллет проектле джашау орунлу болур ючюн тири кюреширге керекбиз. Бу джаны бла сизни хар биригизни къолугъузда этерик ишлеригизни белгилеген планы барды. Миллет проектни тамалында план бла этиллик ишле республикан бюджетде да бегитилгендиле. Былайда чертиб айтыргъа излегеним, миллет проектлени джашаугъа эм уллу дараджада хазырлаб кийирирге керекди. Анга хар министр энчи джууаблыды.
Аслан Анатольевич, сиз, министрле, кеси оноулу джергили органланы башчылары миллет проектлени толтуруу къалай баргъаныны юсюнден ыйыкъ сайын отчёт бериб турурча болум къураргъа керексиз. Ол заманда этерик ишибиз тири джюрюш бла барлыкъды. Къарачай-Черкесияны адамлары уа, быйыл огъуна миллет проектлени джашаугъа кийирилгенлери бла байламлы болгъан иги тюрлениулени сезерге керекдиле. Алай болур ючюн, биз къолубуздан келгенича керти ишле бардырыргъа борчлубуз. Аллай борчну Эресей Федерацияны Президенти В. Путин бла Правительствону Председатели Д. Медведев да саладыла. Аны тышында биз быйылны республикан дараджада Элни джылы этиб баямлагъанбыз. Шахарларыбызны ёсюмлерин тохтатмагъанлай, биз амалсыз юч затны этерикбиз. Аграрийлени джакъларгъа, джангы социал эмда коммунал инфраструктураны къурулушун башлаб, анга тири джюрюш берирге, элледе джангы иш орунла къураргъа керекбиз. Бу джууаблы ишге министрлени бири да къалмай къошуллукъдула. Хар санагъатда планнга кёре толтурулургъа керекли ишле теджелирге керекдиле», - деди республиканы Башчысы Темрезланы Рашид, сёзюн тамамлай.
Комментарии