Республиканы эмда Черкесскени Кюнюн белгилеген байрамда республиканы ара шахарында эки спорт объект ачылгъанды.
- Бюгюн Черкесскеге 191 джыл толады. Къууанчда саугъала бериледиле. Биз да бюгюн шахарны джамагъатына кёб функциялы сабий спорт майданчыкъны саугъа этгенбиз, - дегенди къууанч джыйылыуда Черкесск шахарны башчысы Евгений Беланов.
Бу спорт майданчыкъ шахарны шимал джанында орналгъанды. Аны уллулугъу 500 квадрат метрден атлайды. Спортну не тюрлюсю бла да кюреширге мадар болгъаны шахарчыланы бек къууандыргъанды.
Бу аламат, неси да джарашхан спорт майданда кече-кюн да бек джарыкъды, аны тюбю адамла джыгъылсала, джукъларын сындырмазча материалдан этилгенди, арыгъанла солурча узун агъач шиндикле бардыла – ол шахар бюджетни ачхасына ишленнгенди.
Байрам баргъан кюн регионда биринчи скейт-парк да ачылгъанды – ол «Джангы айрымкан» деген солуу паркдады, аны уллулугъу 800 квадрат метрге джууукълашады.
- Скейт-парк джаш тёлюге саугъабызды. Адамланы тилеклерин къабыл этиб ачханбыз бу сейирлик паркны. Спорт бла таукел эмда тири кюреширге сюйгенлеге энди тыйгъыч боллукъ тюлдю, – дегенди Черкесск шахарны мэри Руслан Тамбиев.
Комментарии