Гъатхэпэм (мартым) и 24-м Къэрэшей-Черкесым и Iэтащхьэ Темрезов Рэшидрэ «Ипщэ-КъухьэпIэ банк» ПАО-м и тхьэмадэ Титов Евгенийрэ зэIущIащ.
Ипщэ-КъухьэпIэ банкым и унафэщI IэнатIэр Титов Евгений мы гъэм и мазаем (февралым) къыхуагъэфэщащ. Мы банкым къызэщIеубыдэ Урысейм и Ипщэм и хэгъуэгу 11, Ищхъэрэ Кавказыр, абы хэтуи Къэрэшей-Черкес къудамэр.
ЗэIущIэм деж къыщаIэтащ ди республикэмрэ банкымрэ зэрызэдэлэжьэным теухуа упщIэхэр. АтIэ, абыхэм щытепсэлъыхьауэ щытат иджыблагъэ ди хэгъуэгум и Iэтащхьэмрэ УФ-м и Сбербанкым и Правленэм и тхьэмадэ Греф Германрэ щызэIущIам.
Псоми я нэхъыщхьэу къыхагъэщар банкыр мыхьэнэшхуэ зиIэ инвестицэ проектхэм зэрыхэлэжьыхьынращ, апхуэдэщи, ди республикэм жыджэру щагъэзащIэ проектхэри къыхалъытэну жаIащ. Апхуэдэ Iуэхугъуэу Титов Евгений къызытеувыIар УФ-м и Правительствэм и тхьэмадэ Медведев Дмитрий турист лъэныкъуэм игъуэта зыужьыныгъэм и щапхъэу, фIы и лъэныкъуэкIэ къигъэлъэгъуа «Архъыз» проектращ.
Зэдэлэжьэныгъэм хуэунэтIауэ иджыри мыхьэнэ ин зиIэ зы Iуэхугъуэ зэIущIэм деж къыщаIэтащ. Ар теухуауэ щытащ банкым ику ит, хыхьэхэкI цIыкIум пыщIахэм защIигъэкъуэнымкIэ программэр гъэзэщIэным.
Сбербанкым къыбгъэдэкI хуэIухуэщIэхэм, хыхьэхэкIым хэтхэм папщIэ къызэрагъэпэщ Iуэхугъуэхэм кIуэ пэтми зэрызрагъэужьынымкIэ зэгурыIуащ.
— Ди инфраструктурэм нэхъри зедгъэужьынущ, псом хуэмыдэу къуажэхэм, жылагъуэхэм деж. Банкым къыбгъэдэкI хуэIухуэщIэхэр хэткIи тынш тщIыныр — ди къалэн нэхъыщхьэщ. Абы къыхэкIыу, хэгъуэгум дызэрыщылажьэм нэхъри едгъэфIэкIуэнущ.
Гулъытэ нэхъыбэ ядгъэгъуэтынущ ику ит, хыхьэхэкI цIыкIум хэтхэм. Мы лъэныкъуэхэм зедгъэужьынымкIэ лъэкIыныгъэфIхэр щыIэу къыдолъытэ, — жиIащ Титовым.
Комментарии