ден савлыкты саклавга эс

Бийсемби куьн Москвада Россия Федерациясынынъ Правительствосынынъ Председатели Дмитрий Медведев Карашай-Шеркеш Республикасынынъ Басшысы Рашид Темрезов пан йолыгысты. Юртымыздынъ Басшысы Премьерминистрге Карашай-Шеркеш ерининъ социал-экономикалык оьрленуьвининъ, промышленностьте, авыл хозяйствосында эм туризм тармагында инвестициялык проектлерди яшавга эндируьвининъ тамамлары акында айтты. Рашид Темрезов Дмитрий Медведевке эм Россия Правительствосына КарашайШеркеш Республикасынынъ социаллык эм оьзге, сонынъ санында ден савлыкты саклав тармагында демевлеви уьшин разылыгын билдирди. «Правительстводынъ демеви аркалы, быйыл биз республикадынъ ден савлыкты саклав тармагында, боьтен де, аналыкты эм балалыкты демевлев соравында алдыга уьйкен сезимли адым эткенмиз. Быйыл биз 3 уьйкен эмлев учреждениесин кулланувга беремиз, муннан алдын республикада ондайлар болмаган», – деп белгиледи йолыгыста Рашид Темрезов. Регионнынъ етекшиси белгилевинше, быйыл соьлеги замангы медициналык алат-садак пан ярастырылган эм кулланувга аьзир болган республикада биринши коьп профильли балалар больницасы 245 орынга 14 клиникалык туьзилислери мен, саьвле (лучевая) терапиясын озгармага болаяк соьлеги замангы онкологиялык орталыгы эм республикалык перинаталь орталыгынынъ янъы диагностикалык блогы курылганлар. Келеек йылда тагы да бир уьйкен медициналык объекти – 450 орынга кала балалар поликлиникасы кулланувга берилеек. Регионнынъ арбатынгы оьрленуьвине Россия Президентининъ «2024 йылга дейим шакка Россия Федерациясынынъ миллет эсаплары эм оьрлендируьвдинъ стратегиялык мыратлары» деп аталган Указынынъ негизинде ярастырылатаган Карашай-Шеркеш ерининъ «Ден савлык» Миллет проектинде катнасувы болаяк.