ЧКIВЫНЫРГIА АТШЫБЖЬАРАКВА РЗАДЫРГАЛТI

«Россети Северный Кавказ» йаланакIуа «Карачаево-Черкесскэнерго» анхагIвчва хIреспублика йхIаракIу апхьартаква йрыцIу чкIвыныргIа рыхъазла атшыбжьараква адыргалтI. Черкесск город йтагылу Лагъь КIавкIаз къральыгIва академия (СКГА) апны йгIаныршу «Эльбрус» студент уыхвара гвып АдыгьахIабльа район апны аэлектростанцияква шынхауа, мцаблыра ангIаншара йшдрычвуа ддырбатI. ЧкIвыныргIа рапхьара апны йгIарыхъвуш шIыцра щарда рдыртI, электроэнергия шгIадырхарджьуа, ауи абзазагIвчва йшырзынадзауа йауацIыхта тшахадыргIвазатI. Ари атшын чкIвыныргIа йгIарынйаз АдыгьахIабльа район аэлектросетьква ринженер хъада Байбагисов Тимур, адиспетчер ахIба Мажер Александр рылапш йыцIу аобъектква шынхауа, абзазагIвчва электроэнергияла йшадыргалуа астудентква йрархIвтI. Аэлектрикква атшыбжьараква ъакIвдыршауа аполигон апны аэлектроэнергия цIарысква, атрансформатор пунктква аныргIалпI. Астудентква ауат шынхауа, йшдырчIаджьуа ддырбатI. – ХIынхарта аъачIвагIагIвчва тшъарбжьауа аполигон апны астудентква йгIашвыхъвуш дырра швауаштI, аэлектролинияква рпны гвжважвагIва уыс аныншара амальта йгIадрысабапуа, амцаблыраква шдрычвуа, атрансформаторква шдырчIаджьуа швдырбуштI, – йхIватI Байгаисов Тимур. Мажер Александр атрансформатор подстанция апны мцаблыра аныншара ауи йызлапшIагылуа аъамапсымаква шгIадрысабапуа астудентква йрайхIвтI. ЧкIвыныргIа ркъару, рдырраква ауыс апны йгIадрысабаптI, амцарычвгаквала атшыбжьараква, архъвыхраква дахIврала йырхъыстI. Атшыбжьараква рыпкъ йтата ачкIвынчви ахIвсси аэнергетик дызланхауа ачгIвычаква ршвыта ток злацауа айхацIаква анапышвтра йшапырщылхуа, ацIарысква йшырхъалуа гIадырбатI. АуыхвагIвчва гвып йрылаз агIвыхIвссагьи ачкIвынчва йгIархьымшвауата рхачIвква дырхъйатI. – АхачIвква майрата йхIзахъвдаквымцIызтынгьи, атшыбжьараква швабыжта йджьащахъван. АцIарыс ухъалра ахъазла къару щарда уыквнахитI, цIахьы угIабгъапшырныс ушвитI. УахьчIва атшыбжьараква хIзадызгалыз, аэнергетик йынхара йауацIыхта хIахазыргIвазаз аъачIвагIагIвчва хIырзыразпI, – рхIватI «Эльбрус» студент уыхвара гвып йрылу Маткова Лилия йгьи Астежева Эллина. ЧкIвыныргIа зымгIва атшыбжьараква шакIвшазла йразхатI. Ауат атрансформатор подстанция апны амца шдрычвуаз, ацIарыс йшхъалуаз зырхъвыхуаз аъачIвагIагIвчва астудентква йгIалырхыз аъачIвагIа цIолата йддырдырырныс йшхIазыру, анхара йазгIашыкъта штшауацIырхуа йаквшахIатхатI.