Къарачай-Черкесияда Бютеуроссия Олимпия кюнню белгилегендиле. Республиканы шахарлары бла районларындан бу уллу спорт байрамгъа 13 мингден аслам адам къошулгъаны да бегитеди Къарачай-Черкесияда спортха тыйыншлы эс бёлюннгенин. Аланы ичинде уллу, гитче да болгъанды.
Айтыргъа, Теберди шахарны «Азгек» атлы саулукъ аралыгъында спортну 10 тюрлюсюнден эришиуле ётгендиле. Алагъа къошулгъан адамланы саны да 400-ден аслам болгъанды.
Къарачай-Черкесияны ара шахарында ол кюн мотокроссдан ачыкъ турнир ётгенди. Анда хорламлы болур иннет бла Шимал Кавказ федерал округну джер-джеринден 50-ден аслам спортчу келгенди. Орам баскетболну (3х3) джюзден аслам адам ойнагъанды.
Спортну бу тюрлюсюн кёбле джаратадыла, ол себебден анга профессионал баскетболистле бла бирге кеслерини кючлерин-къарыуларын сынаргъа излегенле да къошулгъандыла.
Алайды да, Къарачай-Черкесияда Бютеуроссия Олимпия кюнню спортчула эслеринде къалырча ётдюргендиле.
Комментарии