Къарачай-Черкесияны республикан аралыгъында Халкъланы биригиулерини байрамын белгилеу къууанч митингден-концертден башланнганды. Анга тёрт мингнге джууукъ адам къарагъанды.
Митингни аллы бла черкесскечиле бла къонакъладан къуралгъан колоннала къолларында Эресейни эмда Къарачай-Черкесияны кърал байракълары, патриот джазыулары болгъан плакатлары бла Ленин атлы орам бла шахарны мэриясындан Театр майданнга келгендиле. Колонналаны алларында юслеринде миллет кийимлери, къолларында байракълары болгъан джаш адамла баргъандыла. Патриот акцияны тамамлагъандан сора Черкесск шахарны Сабий творчество къаласыны активистлери «Эресей, алгъа!» деген музыка флешмоб къурагъандыла.
Халкъланы биригиулерини кюнюн белгилеу бла байламлы Къарачай-Черкесияны Башчысы Темрезланы Рашид бла республиканы адамларына Эресей Федерацияны Президенти В. Путинден, РФ-ны Правительствосуну Председатели Д. Медведевден, РФ-ны Федерал Джыйылыууну Федерация Советини Председатели В. Матвиенкодан, РФ-ны Кърал Думасыны Председатели В. Володинден, РФ-ны Президентини Шимал Кавказ федерал округда Толу эркинликли келечиси А. Матовниковдан, аны кибик властны федерал, джорукъ сакълаучу органларыны, къралны субъектлерини башчыларындан алгъышлау телеграммала келгендиле.
Байрамгъа аталгъан митингни-концертни кёзюуюнде КъЧР-ни Правительствосуну Председатели А. Озов Къарачай-Черкесияны Башчысы Темрезланы Рашидни атындан джамагъатны Халкъланы биригиулерини кюню бла алгъышлай: «Тыш джауладан къоркъуу келгени сайын бизни халкъыбыз, биригиб, анга къаршчы тура, Ата джурт ючюн джанын-къанын аямай сермеширигин кёргюзюб тургъанды. Бюгюн да биз тыш къоркъуугъа бирден къаршчы турургъа хап-хазырбыз. Къаршчы турургъа джетерча бир кючюбюз-къарыуубуз да барды. Биз барыбыз да кёб миллетли Эресейни адамларыбыз, ортакъ тарихи, ортакъ келир заманы болгъан бир уллу халкъбыз!
Халкъланы биригиулерини кюню керти келишмекликни, бир-бирибизни сыйлауну, кесибизни къралыбызны эмда кесибизни халкъыбызны джазыуларына джууаблылыгъыбызны сезиуню къууанчыны кюнюдю», - дегенди.
Республиканы Премьер-министри А. Озов, Эресей Федерацияны Президенти В. Путин 2018-чи джылны Доброволец бла волонтёрну джылы этиб баямлагъанын эсге салыб, бизни къралда ол къозгъалыу кенг джюрюш алгъанын айтханды. Аны бла бирге ол Къарачай-Черкесияда да кёб тюрлю волонтёр проект джашау орунлу бола баргъанын, республиканы миллетини джашауун иги этиу бла байламлы джарашдырылгъан талай тюрлю кърал программа ишлеб тургъанларын чертгенди.
Аны ызындан къууанч митингде Къарачай-Черкесияны Халкъ Джыйылыууну комитетини заместители, «Бирикген Эресей» деген политика партияны Черкесск шахарда джергили бёлюмюню политсоветини секретары А. Ганшин сёлешгенди. Ол, байрамны белгилерге келгенлени, ол сыйлы кюн бла алгъышлаб, Эресейни кёб миллетли халкъы бюгюн да кючлю биригиб болгъанын чертгенди. Аны себебли, дегенди ол, миллетни къралыны баш эркинлиги бла бойсунмауун сакълауда не тюрлю къыйын борчну да толтурургъа къолундан-болумундан келликди. Ол айтхандан, абыстол (ноябрь) айны 4-чю кюнюню магъанасы джылдан джылгъа ёсе, бегий барады. Ол бизни тарихибизни сюерге, къралыбызны бюгюню бла келир заманы ючюн тириликни къатларгъа, джууаблылыкъны ёсдюрюрге чакъырады.
КъЧР-ни Джамагъат организацияларыны миллетле арасы советини председатели, румлуланы «Кали-архи» деген джамагъат организацияларыны джергили бёлюмюню тамадасы В. Кузнецов да, Халкъланы биригиулерини кюнюню магъанасыны юсюнден айта, Ата джуртну хар заманда да миллет идеясы политика джаны бла да, дин-тин джаны бла да бир затны тамалында - анда джашагъан халкъланы бирикдириуню тамалында – къуралгъанды, дегенди. Бюгюн да алайды, келир заманда да алай болуб турлукъду.
«Бирикген Эресейни» Къарачай-Черкес регионал организациясыны исполкомуну башчысыны орнун толтургъан Джамбаланы Р., митингде сёлеше, бизни Ата джуртну рахатлыгъы бла джашнаууну тамалы мындан ары да биз тарихибизни къалай багъалатханыбыз бла иннет-тин шартларыбызны къалай сакълагъаныбызгъа кёре боллугъун айырыб чертгенди. Аны юсюнден бизни къралны Президенти В. Путин кёб кере айтханды. «Бирикген Эресей» партия, Къарачай-Черкесияны башчылыгъы, ол салгъан излемлени толтура, халкъны бирлиги бла келишмеклигин бегитир, экономика бла миллетни джашауун ёсдюрюр мадарла этгенлей турадыла, дегенди ол.
Халкъланы биригиулерини къууанч митингинде Черкесск шахарны 7-чи номерли орта школуну директору Ш. Копсергенов да алайгъа джыйылгъан джамагъатны байрам бла алгъышлаб сёлешгенди. «Халкъланы биригиулерини кюнюн белгилей, - дегенди ол,- биз кесибизни къралыбызны халкъы болгъаныбызны, бизни къралыбыз бизни юйюбюз болгъанын, аны себебли биз аны джетишимлерине къууаннганыбызны, керек кюн а аны къорууларгъа бирден ёрге турлугъубузну чертебиз».
Республикан перинатал аралыкъны поликлиникасыны тамадасы Ф. Борсова да Халкъланы биригиулерини кюню джамагъат огъурагъан байрамланы бири болуб белгиленнгенини юсюнден айтханды. Ол эресейчи халкъны джигит тарихини бюгюннгю тёлюлени къралларын сюйген, анга толу берилген адамла этиб ёсдюрюуде уллу магъанасы болгъанын да чертгенди.
Черкесск шахарны 5-чи номерли гимназиясыны сохтасы А. Карасов, ёсюб келген джаш тёлюню атындан сёлеше: «Бизни къралны не джаны бла да джетишимли ёсюб баргъаны аны халкъыны бирлиги бла къысха байламлыды. Бирикген халкъ не къыйын сынауну да хорлайды. Ол себебден биз бирлигибизни кючлюден кючлю эте барыргъа керекбиз», - дегенди.
Театр майданда митинг бошалгъандан сора къууанчны андан арысы «Джашил айрымкан» паркда бардырылгъанды.
Байрам митингле-концертле Къарачай-Черкесияны шахарлары бла эллерини барында да болуб ётгендиле. Алада 25 мингден аслам адам болгъанды.
Комментарии