БАСШЫ ЯНЪЫ ОКУВ ЙЫЛЫ МАН КУТЛАДЫ

1 сентябрьде КарашайШеркеш Республикасынынъ Басшысы Рашид Темрезов Черкессктинъ 5 номерли гимназиясында Билимлер куьнине багысланган торжестволы линейкада катнасты. Быйыл гимназияга 40 йыл толады – 1978 йылда сегиз йыллык мектеп ортак ортабилимлендируьв отанына айландырылган. Соннан бери билимлендируьв учреждениеси республикадынъ мектеплери арасында алдышылардынъ бириси болган, а окувшылар туьрли конкурсларда эм олимпиадаларда ийги билимлерди коьрсеткенлер. Соьлеги заманда гимназияда 1631 окувшы окыйды, олардынъ 172 –си биринши класска барганлар. СКФО-да РФ Президентининъ ваькил элшисининъ ярдамшысы Алексей Гасанов пан, Парламенттинъ спикери Наталья Бондаренко ман бирге окувшыларды, ата-аналарды эм окытувшыларды окув йылынынъ басланувы ман кутладылар.
Карашай-Шеркеш ерининъ Басшысы баьри окувшыларга янъы етимислерди, енъуьвлерди эм ясы уьйкенлерге сыйлавды сагынды. А окытувшыларга эм олардынъ ата-аналарына шыдамлыкты эм балалардынъ етимислери уьшин куванышты сагынды. «Янъы окув йылынынъ басына биз ийги тамамлар ман еттик – окув классларда, спорт залларда эм мектеп столовыйларда ремонт эттик, янъы замангы алатларды эм кабинетлерге муьлк алдык, библиотекалык фондты янъырттык, Псаучье-Дахе авылында янъы балалар бавын эм Прикубан районынынъ Холоднородниковский селосында мектеп+балалар бавы билимлендируьв комплексин курдык. Россия Федерациясынынъ Президенти Владимир Путин власть органлары алдында билимлендируьв тармагын арбатынгы оьрлендируьв бойынша уьйкен эсапларды салады. Бас эсаплардынъ бирлери – эки сменалык окувды тайдырув эм эски, баьле-казага ушыравга кавыфлыгы болган мектеплерден окувшыларды коьшируьв. Оькинишке, бизде ярым оьмир артта курылган мектеплер де бар. Ама биз бу эсапты шешемиз. Тек сонъгы эки йыл артта республикада 3192 орынга 4 билимлендируьв учреждение курылган, а 2024 йылга дейим биз тагы да 27 янъы мектепти курмага планлаймыз. Бизде ким уьшин курмага кереги экени бар – быйыл биринши класска 6000 мынънан артык бала барады, озган йылдагыннан ол 100 балага артык. Биринши класслардынъ окувшыларынынъ саны йылдан-йылга оьседи. Буьгуьн биз, элбетте, разылык соьзлерди билимлендируьв аьрекетининъ ветеранларына эм оьз йигит ислери мен эм дайымгы яратувшылык излевлери мен окувшыларда билимлерге, яратувшылыкка, тувган республикамызга суьювликти тербиялайтаган окытувшыларга айтамыз. Баалы окытувшылар, шыдамлыгынъыз эм зегенлигинъиз, йогары кеспилик усталыгынъыз уьшин савболынъыз. Тагы да бир кере олар уьшин биринши кере мектеп шанъы занъыраяк бизим баалы биринши класстынъ окувшыларын кутлайман, эм сосы вакыт сизге янъы етимислердинъ, янъы ойлардынъ эм яркын сезимлердинъ басланувы болсын», - деди оьзининъ соьзинде КЧР Басшысы Рашид Темрезов. СКФО-да РФ Президентининъ ваькил элшисининъ атыннан ваькил элшидинъ орынбасары Алексей Гасанов кутлады.