Джангы джылны аллы бла Къарачай-Черкес Республиканы Башчысы Темрезланы Рашид регионну бир къауум сабийлерине саугъала хазырлагъанды.
Аланы Башчыны Джангы джылны Нызысына аталгъан къууанчда алгъандыла сабийле.
Айтыргъа, эндреуюк (декабрь) айны 25-де Черкесскени Маданият къаласында окъуу джылны ичинде кеслерини не джаны бла да юлгюге тыйыншлы джюрютген сохталагъа – иги окъугъанлагъа, олимпиадалада алчы орунлагъа чыкъгъанлагъа, джамагъат ишлеге тири къошулгъанлагъа – КъЧР-ни Башчысыны Джангы джылны Нызысына багъышланнган байрамы болгъанды. Ары республиканы шахарлары бла районларындан 600 сохта келгенди. Аланы барысына да Башчыны атындан саугъала берилгендиле.
Эндреуюк айны 26-да аллай Джангы джылгъы байрам къыйын джашау болумлары болгъан сабийлеге аталыб бардырылгъанды – ары да 600 сабий келиб, республиканы Башчысыны саугъаларын алгъанды. Къууанчла сагъат 10-да эмда 14-де ётгендиле.
Эндреуюк айны 27-де 200 кемизли сабийге багъышланнган байрам сагъат 10-да бардырылгъанды.
Аны бла да къалмай, школлада эмда къошакъ билим берген учреждениеледе окъуу-билим алыргъа мадарлары болмагъан 1100 сакъат сабийге да берилгендиле саугъала Темрез улуну атындан.
Андан тышында да 8500 ёксюз сабийге – ала нолевой бла биринчи классны сохталарыдыла – КъЧР-ни Башчысыны саугъалары берилликдиле.
Комментарии