АЖВЛАРА УЫСКВА ЙРАДГАЛАГIВПI

Й-17-хауа асквшышвква рагIан Италия, Франция, Англия йгьи Германия рпынква сквшщарда руацIа йакIвшуз айсраква рагIан ар зларкIуашыз ахча анрымахмыз ртахъырала йайсуашыз айсыгIвчва зшIыртуан. Ауат йрыртуашыз ахча атарала чIахIра хьзыла йдыргвыгъун йгьи айсра апны йгIадырхIуз ахъахIара рыцагIвыршун. Зтахъырала йайсуаз айсыгIвчва ракIвпI йапхъахауата волонтерта йызпхьауа йалагаз. Ауи асквшква йгIашIарышвта аволонтерква рымгIвайсра псахра щарда адзатI, адкIылара щарда гIандыршатI. УахьчIвала ауат йдырхъйауа ауысквагьи щардахатI, йапшым айззараква радгалра апны цхърагIара ддрадзитI, ахIврапшдзакваларцIитI, анышвкъваракIапсартаква дрыцкьитI датшагьи. КъарчаЧеркес Республика апынгьи аволонтерква рымгIвайсра тшауацIнахитI, сквшигIадза йалалуа ауагIа рпхьадзара йалахIитI. «Алашара» жвлара организация апынгьи МАМБАТ Белла Вячеслав йпхIа унашва зхъылцIауа чкIвыныргIа ртшауацIыхрала ахъвшара йаланакIуа аволонтерква радкIылара нхитI. Белла асквш 1998 агIан Черкесск апны дйытI, ртгIачва Къарапагва йталхын, ауаъа акыт апхьарта дцатI. Асквш 2014 агIан «Полиглот» колледж дыцIалтI. «Банковское дело» йгьи «Право организации социального обеспечения» ъачIвагIаква гIацIылган, СКГГТА апхьара дыцIалхтI. – Апхьарта саныцIаз йгIашIарышвта уыжвгIандзарагьи зымгIва сымаджьащахъвата, ашIыцраква сырзыпшгIауа йапшым айззараква радгалраква срылалитI. «Полиглот» колледж апны апхьара анджвыквсцIагьи аволонтерква рымгIвайсра тшадскIылтI. Ауи амщтахь «Алашара» жвлара адкIылара апны йгIаныршу чкIвыныргIа ртшауацIыхрала ахъвшара ГIап Эльдар унашва зхъицIуз аволонтерква срылалтI. Ари асквшква руацIа шIыцра щарда здыртI, ауагIа джьащахъваква срынйатI, сдунейпшыща тшауацIнахтI, абаза бызшва, хIуагIа ркультури рцIаскви тшрыхасыргIвазарныс сылшатI, – лхIвитI Белла. Асквш 2018 агIан Мамбат Белла лынхара гIалыркIгIауата «Алашара» жвлара адкIылара апны чкIвыныргIа ртшауацIыхрала ахъвшара даунашвачпагIвта ддыргылтI. – Абаза чкIвыныргIа хIреспублика ажвлара бзазара йалалырныс бзи йгьырбум. Асквш ауацIа зны йакIвшауа абаза уагIа ркультура а-Мш йгьи Абаза хъвмарраква ракIвымкIва датша зджьарагьи абазаква хIкультура гIахIырбарныс гьхIылшум, йауа ухIварыквын, чкIвыныргIаазгIашыкъра гьрылам. Апхьартаква рпны асабиква йрыму азыгIальаматраква гIадрыбергьыльта ауи анархарала рыцIа цIолата йрыдынхалырквын, ауат ркъаруква йрызхъарцIауа, йыртахъу тамамта йырдыруа йгIадзынгылырквын бзихушын. ХIреспубликалагьи хIкъральлагьи йапшым анкъвакъвра щарда акIвшитI, ашIаква тшгIадырба ъауаш айззараква адыргалитI, ауат йрылалуаш абаза чкIвыныргIа гIаууачвапI, – лхIвитI апхIвыспа. УахьчIвала ахъвшара зланхауа апрограмма Белла йлылхтI. Аволонтерква ргвып «АбзихагIвчва» ахьызпI. ЧкIвыныргIа йазалху фашала йадгалапI. – «Алашара» жвлара адкIылара анхагIвчва айззара дукI тшаназхIрыхIазыруа, аволонтерква дасу йхъвдаквцIараква джьауапкIрала йдырхъйитI. ЗымгIвагьи йазакIу ауыс хIшазынхауа багъьата йырдыритI. СынчIва йакIвшаз абаза культура а-Мш адгалра уысква волонтерта 48-гIв гIарылалтI, йагIвсыз асквшква йгIарыквухырквын, ауат рпхьадзара гIванла йщардапI. Абаза хъвмарраква Мыква Нелли йадылгалтI, Джыр Диана аквагрим зтахъыз апшыгIвчва йырзылчпатI, заджвгьи уысдъа дыгьгIанымхатI, – йгIалылкIгIатI Белла. АпхIвыспайшылхIвазла, аволонтерква рпхьадзара сквшигIадза йрылахIитI, ауат абаза уагIа рыхъазла сабапкI рчпарныс рымагIальаматхитI. СынчIва Ростов, Саратов, Москва йаныргIалу аъачIвагIацIгартаква йыцIалуаз волонтерта йынхаз чкIвыныргIа рыхъазла «волонтерские книжки» рзырчпан, дасузлакIгьи уыста дызлаз, йдахIвраква ауаъа йанырцIатI. Аволонтерква апхьара йаныцIалуаз баллкI рзаладырхIатI. Ауи апш лшара рымапI. АъачIвагIагIв шIа йшылпхьадзауала, апхьагIвчва урыдынхалра йхъаду уыспI йгьи ауи анархарала йапшым апроектква лырхитI. Ауат йрылапхьадзапI «ХIапхъанчIвиква рыщтала» зхьзу апроект. Ауи апкъ йтата Къарапагва йгьи Къвбина кытква ршIаква тшазыркIкIын, Къвбина йгьи Къарапагва кытква шгIаншазла атурых йахадыргIвазатI. Ауаъа йгIатыцIын, зымгIва абаркIыта Къарапагва йдырхаутI. Ауи йапшу агIаншараква рпны абаза чкIвыныргIа абадыритI, йащтаныкъвауа йалагитI, акытква ртурых ддырдыритI. – АуыжвгIанчIвиква апхьагаква йыгьрыпхьум, ауи йгIалцIла йрымаджьащахъву амальква гIасрысабапуамцара ашIаква хIкультура, хIхабзаква йшрыхагIвазуш садынхалитI. ДасузлакIгьи йыбызшва, йуагIахъа ртурых йдырра ахъазла йхIылшауа ауысква хIырхъйитI, – лхIватI Белла. «Арт молодежь» проект абльын апны йапшым асуратква чпара акIвпI йыззынарху.Абазахъвмарраквайырдамыгъаз ахысыгIв хъацIи апхIвыси ртурасква АлбыргIан апхьарта абльынкI апны йанырцIатI. Ауат лызхыз Джьджьу Рустам йгьи Хабатова Лаура ауи ауысква рпны йгIадрайгватI. Ауат Хъвыжвду акультура Тдзы абльын апны абаза уысагIв бергьльы Мыхц Кьарим йсуратква рыгIвныс тшдрыхIазыритI. Белла йшылхIвауала, суратипхьадза йара амагIны амапI. АпхьагIвчва рпахьла ахачIвква рзыргылуа, апроектква лырхуа йырбжьауата анхараква акIвдыршарныс ргвыгъапI. ХIуагIахъа ртурых йазынарху апхьара сахIатква адыргалуаштI. Йапхъахауа акурс йапхьауа астудентква рыхъазла «Посвящение в студенты» хъвлапны адыргалуаштI. Ауатква ашIаква абадырдыруаштI. – ХIынхара апхьарта йапхьауа асабиква рпны йджвыквхIцIара атахъыта йспхьадзитI. Ауат рпатриот бжьара йаквкIта хIадынхалуа, рыбызшва, руагIахъа. ркультура бзи йырбауа, хвы аквырцIауа йгIадзынхIыргылырквын, уачIвы абаза унашвачпагIвта йынхуштI, абаза уагIахъа йрапхъагылагIвхуштI, – йгIалылкIгIитI Белла.