Къарча-Черкес Республика
йаланакIуа Къвмыш
кыт адзакIьа Абашта айсра
Ду агIан КIавкIаз щхъахъысырта
апны афашистква
йырпшIагылата зхъа
щтIазцIаз хIхаквлагIвчва
рчвахъабага музей аныргIалпI.
Ауи асквш 1968
агIан йгIахъыртIытI. Амузей
дот квпшыра амапІ
йгьи Лагъь КIавкIазла
рыцIа йпхатшу мемориал
комплекспI. Ачвахъабага
Къарча-Черкес ВЛКСМ
аобком анхагІвчва ргІаджвыквцIарала
Ставрополье,
Краснодар край,
Дагъстан рбзазагIвчва
шIаква йазыркIкIыз ахчала
йыруыхватI.
Ащхъахъысырта апны
йакIвшаз айбащраква
зджьара йгIанымхауата
йхьантан. Домбай
тшпсщарта йцауа атуристква
амузей адзхъа йгIашIаслитІ,
анамыцаква атенгьыз
КвайчIвала йхъызымщтыз,
зхъа йамайгьдзаз
рхъмаштылра квырмыш
азырчпитI, ауаъа йаныргIалу
аэкспонатква
швабыжта йрымаджьащахъвата
йырпшитI, ргвгIанаграквагьи
йазалху акнига
йанырцIитI.
Асквш 2018 амемориал
комплекс сквш 50
ахъыцIитI. Ауи йадахIвуата
«Годы, опаленные
войной» экспозиция апкъ
йтата ареспублика атурых-культура
йгьи псабара
музей апны ачвахъабага
йгIаквчважвауа гIарбара
гIахъыртIытI. Ауи
ноябрь а 20-дза йакIвшуштI,
тшахазыргIвазара
зтахъу зымгIвагьи
драйгвитI. АгIарбара апны
амузей ачвахъабага
ангIахъыртIуаз йахъырхыз
асуратква, зхъвадиква
гIараухта ачIвыла
йартхыз айсыгIвчва рыхьызква,
амузей йгIаквнадыргаз
артшхъвагаква
аныргIалпI. Ауи акIвымкIвагьи,
Ставрополь город
абзазагIвчва – аби апи
Боровков Николайи Владислави
йдрыхIазырыз
«Защитники перевалов
Кавказа» композиция,
Къарча город йауу аршIыйагIв
Брюхина Эльвира
лпанно «Пришла война»,
йапшым авымпелква,
Покрышкин Александр
йбюст датшагьи
пкъыгIва щарда гIарбапI.
Амузей-чвахъабага аунашвачпагIв
Кущетерова
Наталья йшылхIвазла,
ари апш гIарбара атурых-культура
йгьи псабара
музей-заповедник апны
йапхъахауата йадыргалтI.
Ауи агIарбара йгІадыргалыз
аэкспонатква
йауацIыхта дрыквгIашIастI,
атурых йазгвалымсым
хIхаквлагIвчва зымгIвагьи
амузей йылрайгвитI.
Получайте свежие новости на электронную почту
Комментарии